KORONAVİRUSA YOLUXANLARIN SAYI - CANLI STATİSTİKA

22 il əvvəl bacısına təcavüz etdi, illər sonra isə qızına... — Azərbaycanda DƏHŞƏTLİ HADİSƏ

22 il əvvəl bacısına təcavüz etdi, illər sonra isə qızına...
18:20
09.10.2019
28078
Ölkə
A
Abşeron rayonunda namus üstündə bacanağını öldürməkdə təqsirli bilinən Teymur Babayevin (cinayət işində adı keçən şəxslərin ad və soyadları şərti verilib – red.) cinayət işi üzrə məhkəmə prosesi başa çatıb.

"Ölkə.Az" publika.az-a istinadən xəbər verir ki, Teymur Babayev 2018-ci il iyulun 26-da, gecə saatlarında yaşadığı Abşeron rayonu, Saray qəsəbəsi, nömrəsiz fərdi yaşayış evinə gəlib. O, övladı Səbinənin həyətdə bikef oturduğunu görüb.

Qızı xalasının ərindən və bibisi oğlundan şikayət etdi

Teymur Babayev qızından bikef olmasının səbəbini soruşub. Səbinə sərxoşluq vəziyyətində olan xalasının əri Mədət Əliyev və bibisi oğlu Xəyyam Məmmədovun bir neçə dəqiqə öncə burada olarkən ona pul qarşılığında cinsi əlaqədə olmağı təklif etdiklərini bildirib.

Bundan sonra Teymur Babayev Mədət Əliyevin istifadəsində olan mobil telefon nömrəsinə zəng edib və onun hərəkətinin mahiyyətini aydınlaşdırmağa çalışıb. Həmin vaxt Mədət Əliyev ona təhqiredici ifadələr işlədib. Buna görə də o, telefonu söndürüb.

Daha sonra Mədət Əliyev ona zəng edib, mübahisələrinə aydınlıq gətirmək üçün Abşeron rayonu, Saray qəsəbəsi, Heydər Əliyev küçəsindəki “quyu” adlanan əraziyə gəlməyi tələb edib.

“Quyu” başında dava

Teymur Babayev Mədət Əliyev tərəfindən ünvanına nalayiq söyüşlər söyməsi və övladı Səbinəyə əxlaqsız təklif etməsinə görə qisas alıb, onu cəzalandırmaq məqsədilə yaşadığı evin mətbəxindən götürdüyü bıçağı əynindəki şalvarın arxa cibinə qoyub.

Sonra o, “quyu” adlanan əraziyə gəlib. Ərazidə onu gözləyən Mədət Əliyevə əl ataraq yaxasından yapışıb, aralarındakı qarşılıqlı dalaşma zamanı cibindən yerə düşən həmin bıçağı götürərək onun bel nahiyəsinə xəsarət yetirib.

Qətl

Mədət Əliyev həmin vaxt xəstəxanaya yerləşdirilib. Ona ixtisasli tibbi yardım göstərilməsinə baxmayaraq iyulun 28-də vəfat edib.

İstintaq orqanı tərəfindən Teymur Babayevin barəsində Cinayət Məcəlləsinin 126.3-cü (ehtiyatsızlıqdan zərərçəkmişim ölümünə səbəb olma) maddəsi ilə ittiham elan edilib.

“Pul müqabilində cinsi əlaqədə olmağı təklif etdiklərini söylədi”

Cinayət işi üzrə təqsirləndirilən şəxs qismində ifadə verən Teymur Babayev bildirib ki, usta işləmiş mərhum Mədət Məmmədovun yanında fəhləlik edib. Onun sözlərinə görə, iyulun 26-da, saat 20 radələrindən Mədət, bacısı oğlu Xəyyam və iş yoldaşı İlqar Səmədov ilə Saray qəsəbəsində yerləşən “Yetər” şadlıq sarayının arxasındakı pivəxanada pivə içiblər: “Bir-iki saat keçdikdən sonra Xəyyam və Mədət kafeni tərk etdilər. İlqarla mən isə pivə içməyə davam etdik. İlqarla bərabər evə qayıdarkən övladım Səbinənin çöldə kefsiz oturduğunu, qarşısında qonşuluqda yaşayan Sadifin dayandığını gördüm. Ondan nə baş verdiyini soruşdum. Qızım Xəyyamla Mədətin ona pul müqabilində cinsi əlaqədə olmağı təklif etdiklərini söylədi”.

“Söhbətimin olduğunu bildirdim”

Təqsirləndirilən şəxs qeyd edib ki, qızının bu sözlərindən sonra Mədətə zəng edib və ondan harada olduğu, Xəyyamla bir yerdə olub-olmadığı ilə maraqlanıb: “Cavabında Mədət məni nalayiq ifadələrlə təhqir etdi, telefon əlaqəsini kəsdi. Bir qədər sonra Mədət yenidən zəng edərək, Heydər Əliyev küçəsindəki “quyu” adlanan yerə gəlməyimi tələb etdi. Özümü müdafiə etmək və etdiyi hərəkətə görə Mədəti cəzalandırmaq məqsədi ilə mətbəxdən taxta dəstəkli mətbəx bıçağını götürdüm. Sonra Mədətin dediyi yerə gəldim. Orada Mədəti bacısının əri ilə birlikdə dayandığını gördüm. Mədətin yaxasından tutdum və onunla söhbətimin olduğunu bildirdim”.

“Dəqiq xatırlamıram”

Təqsirləndirilən şəxs deyib ki, Mədət onun əlindən çıxmaq istəyəndə qarşılıqlı olaraq dartışıblar və qəflətən ayağı sürüşərək yerə yıxılıb: “Yerdə qarşılıqla dava zamanı bıçaqla onun qarın nahiyəsinə bir zərbə vurdum. Bu zaman Mədət yarasını tutaraq məndən aralandı. Ola bilsin içkili və həyəcanlı olduğumdan Mədətin bədəninin dəqiq hansı nahiyəsinə xəsarət yetirdiyimi xatırlamıram. Orada olan Mədətin bacısını əri Şərif bıçağı mənim əlimdən almağa çalışsa da, buna nail ola bilmədi. Səhəri gün Mədətin aldığı xəsarətdən xəstəxanada öldüyünü eşitdim”.

“Bacıma görə yox, qızıma görə zərbə vurdum”

Teymur Babayev bildirib ki, Mədəti 1996-cı ildə digər bacım Səlbinaz ilə zorla cinsi əlaqədə olmasına görə deyil, öz qızı Səbinəyə əxlaqsız təklif etdiyi və onun özünün ünvanına nalayiq ifadələr işlətdiyi üçün bıçaqla zərbə endirib.

9 il cəza

Bu cinayət işi Bakı Ağır Cinayətlər Məhkəməsində hakim İradə Həsənzadənin sədrlik etdiyi kollegiyada araşdırılıb. Məhkəmənin hökmü ilə Teymur Babayev 9 il müddətinə azadlıqdan məhrum edilib.

Hökmdən narazı qalan Teymur Babayev apelyasiya şikayəti verib. O, cəzasının yüngülləşdirilməsini xahiş edib. Zərərçəkmiş şəxsin hüquqi varisi də apelyasiya şikayəti verib. O, Teymur Babayevin cəzasının ağırlaşdırılmasını, cinayətin digər iştirakçılarının müəyyən olunması üçün işin prokurorluğa qaytarılmasını istəyib.

Hər iki tərəfin şikayəti araşdırılması üçün Sumqayıt Apelyasiya Məhkəməsinə göndərilib. Hakim Vidadi Cəfərovun sədrliyi ilə baş tutan prosesdə apelyasiya şikayətlərinin dəlilləri araşdırılıb, sonda qərar elan edilib.

Qərara görə, hər iki tərəfin şikayəti təmin olunmayıb.

ŞƏRH YAZ
0

Azərbaycanın 16 şəhər və rayonunda xüsusi karantin rejimi başlayıb — SİYAHI

Azərbaycanın 16 şəhər və rayonunda xüsusi karantin rejimi başlayıb
06:00
Bu gün
3301
Ölkə
A
COVID-19 virusunun yayılma sürətinin azaldılması, eləcə də onun törədə biləcəyi fəsadların minimuma endirilməsi məqsədilə Goranboy, Göygöl və Mingəçevir şəhərləri, Bərdə, Xaçmaz, Samux, Siyəzən və Şəki rayonları daxil olmaqla, Bakı, Cəlilabad, Gəncə, Lənkəran, Masallı, Sumqayıt, Yevlax şəhərlərində və Abşeron rayonunda xüsusi karantin rejimi 2020-ci il 5 iyul saat 06:00-dan 20 iyul saat 06:00-dək uzadılıb.

"Ölkə.Az" xəbər verir ki, bununla bağlı Azərbaycan Respublikası Nazirlər Kabineti yanında Operativ Qərargah qərar qəbul edib.

Qərara əsasən, 2020-ci il 4 iyul saat 00:00-dan 20 iyul saat 06:00-dək Bakı metropolitenində sərnişindaşıma fəaliyyəti dayandırılıb.

Xüsusi karantin rejiminin sərtləşdirildiyi şəhər və rayonlarda aşağıdakı tarixlərdə həftəsonları bütün ictimai nəqliyyatın hərəkəti qadağan edilir:

4 iyul saat 00:00-dan 6 iyul saat 06:00-dək;

11 iyul saat 00:00-dan 13 iyul saat 06:00-dək; 

18 iyul 00:00-dan 20 iyul saat 06:00-dək.

Virusa yoluxma dinamikasının azaldılması istiqamətindəki tədbirlər çərçivəsində bütün ölkə ərazisində ictimai yerlərdə, o cümlədən küçələrdə, bulvarlarda, parklarda və digər yerlərdə şəxslərin (yaxın qohumlar, yəni ata-ana, nənə-baba, uşaqlar və bacı-qardaşlar istisna olmaqla) 5 nəfərdən artıq qruplarda cəmləşmək qadağandır. 

Xüsusi karantin rejiminin sərtləşdirildiyi Bakı, Cəlilabad, Gəncə, Goranboy, Göygöl, Lənkəran, Masallı, Mingəçevir, Sumqayıt, Yevlax şəhərlərində və Abşeron, Bərdə, Xaçmaz, Samux, Siyəzən və Şəki rayonları ərazisində  2020-ci il 20 iyul saat 06:00-dək həmçinin aşağıda qeyd edilən iş və xidmət sahələri üzrə fəaliyyətə icazə verilmir:

- nəzdindəki ərzaq mağazaları və apteklər istisna olmaqla, iri ticarət mərkəzlərinin fəaliyyəti;

- ictimai iaşə obyektlərində müştərilərə yerində xidmətlər;

- muzey və sərgi zallarının fəaliyyəti;

- bərbərxanaların, gözəllik salonlarının fəaliyyəti və kosmetik xidmətlər (o cümlədən, bu sahələrdə müştərinin evində və ya digər məkanda xidmət);

- təhsil müəssisələrinin fəaliyyəti (onlayn imtahan, müsabiqə və müsahibələr istisna olmaqla);

- açıq havada idman yarışlarının və oyunlarının keçirilməsi.

Xüsusi karantin rejiminin sərtləşdirildiyi şəhər və rayonlarda şəxslərin yaşayış yerini və olduğu yeri tərk etmələrinə aşağıdakı hallarda yol verilir:

- təxirəsalınmaz tibbi zərurətlə və hər hansı bir qrafik üzrə müalicə almaqla əlaqədar; (SMS icazə və “E-Təbib” mobil tətbiqi vasitəsilə) 

- ərzaq və digər gündəlik tələbat mallarının, habelə dərman vasitələrinin alınması, dövlət xidmətlərindən, bank, poçt və fəaliyyətinin davam etdirilməsinə icazə verilən iş və xidmət sahələrində göstərilən digər xidmətlərdən istifadə edilməsi zərurəti ilə, həmçinin açıq havada vaxtın keçirilməsi ilə əlaqədar; (SMS icazə və “E-Təbib” mobil tətbiqi vasitəsilə) 

- yaxın qohumunun dəfnində iştirakla əlaqədar. (102 Xidməti – Zəng Mərkəzi vasitəsilə)

Şəxs yaşayış yerini və olduğu yeri yalnız müsbət cavab aldıqdan sonra tərk edə bilər. Həyat və sağlamlığa bilavasitə təhlükəli vəziyyət yarandıqda yaşayış yerini və olduğu yeri tərk etmək üçün SMS - məlumatın göndərilməsi tələb olunmur. Həmçinin şəxslər məhkəməyə və ya hüquq mühafizə orqanlarına çağırıldıqda SMS - məlumat göndərilmədən yaşayış yerini və olduğu yeri tərk edirlər. Bu halda onlar məhkəməyə və ya hüquq mühafizə orqanına çağırılmalarına dair sənədi polis əməkdaşlarının tələbi ilə onlara təqdim etməlidirlər.

Fəaliyyətinə icazə verilən qurum və sahələrin işləyən əməkdaşları isə Azərbaycan Respublikası Nazirlər Kabinetinin 19 iyun 2020-ci il tarixli 208 nömrəli Qərarı üzrə müəyyən edilmiş qaydalara uyğun olaraq xidməti vəsiqələr və ya “icaze.e-gov.az” portalı vasitəsi ilə hərəkət edə bilər. 

Beynəlxalq və ölkədaxili uçuşlara müvafiq reys üçün bileti olan şəxslərin yaşadıqları və ya olduqları yerdən hərəkətinə onların biletləri əsasında, dövlət sərhədindən müvafiq qaydada ölkəyə daxil olan şəxslərin yaşadıqları və ya olduqları yerə gəlməsinə isə onların pasportuna vurulmuş ştamp əsasında yol verilir. Nəzərdə tutulan qaydalarla şəxslərin hərəkəti zamanı onların üzərində şəxsiyyəti təsdiq edən sənədlərin olması məcburidir. 

Nazirlər Kabinetinin müvafiq qərarı ilə müəyyən edilmiş hərəkət məhdudiyyətlərinin tətbiqi qaydalarının pozulmasına görə fiziki, hüquqi və vəzifəli şəxslər Azərbaycan Respublikasının qanunvericiliyi ilə nəzərdə tutulmuş qaydada inzibati və cinayət məsuliyyəti daşıyırlar. 

Qərarla müəyyən edilmiş hərəkət məhdudiyyətlərinin tətbiqi qaydalarına riayət olunmasına nəzarət Azərbaycan Respublikasının Daxili İşlər Nazirliyi tərəfindən həyata keçirilir.

Operativ Qərargah mövcud sanitar-epidemioloji vəziyyətdən irəli gələrək bir daha hamını şəxsi gigiyena, eləcə də tibbi-profilaktik qaydalara əməl etməyə, özünü və yaxınlarını virusa yoluxmaqdan maksimum qorumaq üçün preventiv tədbirlərin şərtlərinə əməl etməyə çağırır. Bu müddətdə yalnız ciddi ehtiyac yarandıqda evdən çıxmaq, ictimai yerlərdə digər şəxslərlə minimum kontaktda olmaq zəruridir. 

ŞƏRH YAZ
0

Bu gün 38 dərəcə isti olacaq

Bu gün 38 dərəcə isti olacaq
04:58
Bu gün
3578
Ölkə
A
Azərbaycanda iyulun 5-də gözlənilən hava şəraiti açıqlanıb.

"Ölkə.Az" xəbər verir ki, Ekologiya və Təbii Sərvətlər Nazirliyinin Milli Hidrometeorologiya Xidmətindən verilən xəbərə görə, Bakıda və Abşeron yarımadasında havanın yağmursuz keçəcəyi gözlənilir.

Şimal-şərq küləyi əsəcək. Havanın temperaturu Abşeron yarımadasında gecə 20-24, gündüz 32-37, Bakıda gecə 22-24, gündüz 34-36 dərəcə isti olacaq. Atmosfer təzyiqi normadan aşağı 757 mm civə sütunu, nisbi rütubət gecə 60-65, gündüz 35-40 faiz təşkil edəcək.

Abşeron çimərliklərində şimal-şərq küləyi əsəcək. Dəniz suyunun temperaturu Sumqayıt, Novxanı, Pirşağı, Nardaran, Bilgəh, Zuğulbada 23-24, Türkan, Hövsan, Sahil, Şıxda isə 24-25 dərəcə isti təşkil edəcək.

Sabah Azərbaycanın rayonlarında havanın əsasən yağmursuz keçəcəyi, lakin axşam saatlarında bəzi dağlıq ərazilərdə şimşək çaxacağı, qısamüddətli yağış yağacağı, dolu düşəcəyi gözlənilir. Şərq küləyi əsəcək.

Havanın temperaturu gecə 20-25, gündüz 33-38, dağlarda gecə 11-16, gündüz 23-28 dərəcə isti olacaq.

ŞƏRH YAZ
0
BAĞLA