İlhamənin oğlu: \"Yas mərasimlərinə on mindən artıq xərcim çıxıb\"

- Orxan bəy, İlhamə xanımın bacısı Gülbahar Quliyeva bildirib ki, onun ölümüylə bağlı bütün xərcləri dövlət çəkib. Doğrudanmı belədir?

- Bəli, dövlət baş daşının, məzarın və Rəşid Behbudov Teatrındakı vida mərasiminin xərcini çəkib. Dövlətin nümayəndəsi kimi mədəniyyət və turizm naziri Əbülfəs Qarayevə minnətdarlığımı bildirirəm. Qırx mərasimindən də tez-martın 18-də baş daşı qoyuldu. Buna görə, nazirə minnətdarlığımı bildirirəm. O ki qaldı yas mərasiminə, dövlətin bizə borcu yox idi ki, yas mərasiminin xərcini çəksin. Yas mərasimlərini mən vermişəm. Bunu təsdiqləmək üçün Təzəpir məscidiylə əlaqə saxlayıb, məlumat ala bilərsiniz. Oradan deyərlər ki, məclisin xərcini kim ödəyib. Yəqin Gülbahar xanımın yadından çıxıb. Yeməkləri özü bişirirdi, bazarlığını da siyahı yazıb verirdi, mən alıb gətirirdim.

- Belə şeyləri soruşmazlar. Ancaq mübahisəli məsələ olduğu üçün bu sualı verməyə məcburam. İlhamə xanımın yas mərasimlərinə nə qədər xərciniz çıxıb?

- Təkcə üç mərasiminə 6500 manat xərcim çıxıb. Başqalarını deməsəm də olar. 

- Bəs ümumi xərc?

- On mindən yuxarı xərc çəkmişəm.

- Bu xərc şəxsi büdcənizdən çəkilib?

- Borc da götürmüşəm, qızılları da girov qoyub pul götürmüşəm.

- Qızıllar özünüzə məxsus olub?

- Xeyr, İlhamə xanımın qızıllarını.

- Ancaq bildiyimə görə, hazırda qızıllar sizdə deyil...

- Bəli, qızılların hamısı Beynəlxalq Bankın saxlanc məntəqəsindədir.

- Bəs girov qoyub pul götürdüyünüz hansı qızıllar idi?

- Girov qoyulanlar da artıq təhvil verilib. 

- Qarşı tərəf bildirir ki, Orxan şou yaradır...

- Məni çoxdan tanıyırsınız. Şou yaratsaydım, İlhamə xanım rəhmətə gedəndən sonra üzə çıxardım. 

- Yəni qarşı tərəf o vəfat edəndən sonra üzə çıxıb?

- Bunu mən yox, ictimaiyyət desin. Bəli, üzdə olanları da olub.

- Bildiyimə görə, bacıları da ayrı bir məclis verəcəklər.

- Bəli.

- Təklif etdinizmi ki, gəlin bu məclisi bir yerdə verək?

- Mən elan etmişdim ki, fevralın 24-də il mərasimi olacaq. Toy deyil ki, hamıya dəvətnamə paylayım. Sabah rəhmətliyin hansısa dostu da bir məclis verə bilər. Hər kəs azaddır.

- Sağlığında ətrafında xeyli sənət adamları var idi. Hiss edirsinizmi ki, onların böyük əksəriyyəti maraqlanmırlar, yoxdurlar?

- Çoxu yoxdur. Maraqlananlardan millət vəkili Novruz Aslandır. İlk gündən bu günə qədər zəng edir, maraqlanır. Yeri gələndə həm millət vəkilidir, həm ictimai fəaliyyəti var. Onun işi hamıdan çoxdur. Buna baxmayaraq, vaxt tapıb maraqlanır. Millət vəkili Elmira Axundova da maraqlanır. Müğənnilərdən Ədalət Şükürov, Nadir Qafarzadə, Cavanşir Məmmədov əlaqə saxlayırlar. Ədalət Bakıda olmadığına görə üzrxahlıq etdi ki, iştirak edə bilməyəcəyəm. Nadir də zəng vurmuşdu ki, efirdəyəm, tez çıxsam, gələcəyəm. 

- Vəkil Elmira Məmmədova bildirmişdi ki, İlhamə xanımdan 2 milyonluq miras qalıb. Bu real rəqəmdir?

- Yanlış rəqəmdir. Çünki əslində, qalan miras iki milyondan çox azdır.

- Varislik iddianız var?

- Bir şey deyim. Dünya malıdır, dünyada qalır. Heç kim bu dünyadan heç nə aparmır.

- Yəni varislik iddianız yoxdur.

- Xeyr. Əvvəldən vərəsəliyə iddiam olmayıb və vərəsə kimi heç bir məhkəmə instansiyasına müraciət etməmişəm.

- Sağlığında bacılarıyla əlaqələri var idi?

- İradə xanımla münasibəti vardı, gəlib-gedirdi, Gülbahar xanımla əlaqə yox idi.

- Münasibətin olmamağına xüsusi səbəb var idi?

- Özü bilirdi, mən də bilirəm. Ancaq bunu açıqlaya bilmərəm. Hətta danışmırdılar. O barədə "A-dan Z-yə" verilişində özü deyib və sosial şəbəkədə də videoçarx var. 

- Xəstə olduğu dönəmlərdə bacıları gəlirdilər?

- Mərkəzi Neftçilər Xəstəxanasında qapıdakı mühafizədən tutmuş, sanitarlara qədər maraqlana bilərsiniz. Gələnləri də olub, gəlməyənləri də.

İntiqam VALEHOĞLU
Fotolar: Nurlan Gülməmmədov
Ölkə.Az