\"İlk təbriki doğmalarımdan aldım\"
İfaçı özəl günündə "Ölkə.Az"-ın əməkdaşının suallarını cavablandırıb.
O, ilk təbrikini doğmalarından aldığını bildirib:
“İlk məni təbrik edən bibim oğlu və bibim qızı oldu. Sonra ATV və İctimai kanalda mənim haqqımda süjet yayımlandı. Daha sonra, çalışdığım Bakı Musiqi Akademiyasından və Elmi Şuradan zəng vurub, məni təbrik etdilər. Sağ olsunlar, bütün sevənlərim məni diqqətdən kənar qoymurlar. Gün hələ yeni başlayıb, axşama qədər təbriklər gəlməkdə davam edəcək”.
O, ad gününü sadə, ailə arasında qeyd etməyi daha çox sevdiyini də bildirib.
“Bilirsiniz, dünyanı öz cənginə almış koronavirusun bu cür yayılması, pandemiya halına çevrilməsi, insanların bu qədər əzab çəkdiyi bir vaxtda ad günümü qeyd etməyə heç əhvalım yoxdur. Ümid edirəm ki, tezliklə biz bu bəladan xilas olacağıq. Ancaq mən hər zaman ad günümü daha sadə, ailə arasında qeyd etməyi sevmişəm”,- deyə Xalq artisti qeyd edib.
Əməkdaşımızın “Həyatınızın yeni ilində özünüzə ən çox nə arzuluyarsınız?” sualına Fidan Qasımova belə cavab verib:
“Ancaq möhkəm can sağlığı, güc, qüvvə. Təkcə özümə yox, ətrafımda olan əzizlərimə, dostlarıma, bütün insanlara”.
Xalq artisti onu təbrik edənlərə təşəkkür etməyi də unutmayıb.
“Məni təbrik edən hər kəsə öz təşəkkürümü bildirirəm. Çox sağ olun”.
Xatırladaq ki, Fidan Qasımova 17 iyun 1947-ci ildə Bakıda dünyaya göz açıb.
Vüsalə Balayeva
Ölkə.Az
