İnternetimiz niyə zəifdir? — Baş redaktorlar şikayət etdi, provayderlər susdu, ekspert yol göstərdi

İnternetimiz niyə zəifdir?
16:55
20.10.2017
502
Ölkə
A

Son zamanlar olkədə internetin sürətindən şikayətlər az qala kütləvi hal alıb. Xüsusilə birbaşa internetlə işləyən qurumlar bu vəziyyətdən narazıdırlar. Məsələn, elə xəbər saytları...

"Ölkə.Az" xəbər verir ki, modern.az bununla bağlı bir neçə saytdakı vəziyyətlə maraqlanıb.

“Ölkə.az” portalının baş direktoru Məmməd Gülməmmədov bildirib ki, internetin zəifliyi onlarda da müşahidə olunur:
“Biz Ultel-in həm fiber-optik, həm də ADSL abunəçisiyik. Eyni zamanda Nar-ın 4G modemindən istifadə edirik. Təəssüf ki, internet sürətinin zəifliyi bu provayderlərin hamısında hiss olunur. Gün ərzində bir neçə dəfə həmin provayder şirkətləri ilə əlaqə saxlamaq məcburiyyətində qalırıq. Xüsusilə son bir aydan çoxdur ki, bu vəziyyət kəskin hal alıb. Məsələ ilə bağlı Nəqliyyat, Rabitə və Yüksək Texnologiyalar Nazirliyinə sorğu göndərsək də, onlar hər hansı problemin olmadığını deyir və istifadə etdiyimiz provayderlə əlaqə saxlamağımızı tövsiyə edirlər. Bilirsiniz ki, son vaxtlar ölkə daxilində fiber-optik kabelləşmə gedir, xətlər yenilənir. Ümid edirik ki, problem bununla əlaqəlidir. Lakin hər hansı rəsmi açıqlama verilmədiyi üçün biz də sadəcə fərziyyələr üzərində dayanırıq”.

“Azadinform” İnformasiya Agentliyinin baş redaktoru Niyaz Niftiyev qeyd edib ki, bir aydan çoxdur, internetin zəifliyini hiss edirlər:
“Bu barədə qoşulduğumuz provayderin məsul şəxsləri ilə demək olar ki, hər gün 3-4 dəfə telefon danışığımız olur. Onlar ATS-i, ATS- də onları ittiham edir. Hətta ATS-dən nümayəndə çağırıb xətləri yoxlatmışıq, modem-ə qoşulmanı dəyişmişik. Problem qalmaqda davam edir. Düşünürəm ki, aidiyyatı qurumlar məsələyə müdaxilə etməlidirlər. Bu sürətdə internetlə işləmək çox acınacaqlıdır”.

"Avtosfer.az" saytının baş redaktoru Elməddin Muradlının sözlərinə görə, eyni problem onlarda da var və bu, işin gedişatına mənfi təsir edir:
“İnternetin zəifliyi hər yerdə olduğu kimi, bizdə də müəyyən problemlər yaradır. Məsələn, yazını sayta yerləşdirsək də, yalnız bir neçə dəqiqədən sonra saytda görünür. Yaxud yazının videoları açılmır. Bu da birbaşa internetlə əlaqəli problemdir və işin keyfiyyətinə, gedişinə mənfi təsir edir. Hansısa yazını sayta yerləşdirmək üçün iki dəqiqə vaxt lazım idisə, indi bu vəziyyətdə 5-10 dəqiqə vaxt gedir. Əlbəttə, bu da zaman itkisi deməkdir. Bununla yanaşı, vəziyyətlə əlaqəli mən də, digər işçilərimiz də stress keçiririk. Adicə mobil telefonla belə, internetə qoşulub istifadə etmək mümkün deyil. Ona görə düşünürəm ki, bu istiqamətdə  Nəqliyyat, Rabitə və Yüksək Texnologiyalar Nazirliyi ciddi tədbirlər görməlidir”.

AzVision.az saytının redaktoru Anar Rüstəmov bildirib ki, təkcə ofisdə deyil,  küçədə, bayırda hamı internetin zəifliyindən şikayətlənir:
“Son günlər ölkə üzrə ciddi internet problemi müşahidə edilir.  Əksəriyyət bundan şikayətçidir.  Səbəbini özümüz də bilmirik. İnternetin yoxluğu, yaxud zəif olması işimizə ciddi təsir edir. Elə vaxt olur ki, bir xəbəri sayta yerləşdirmək üçün ən yaxşı halda 10 dəqiqə gözləməli olmuşuq.  Foto, video yükləmək isə müşkül məsələdir. Demək olar ki, hər gün provayderə zəng edirik, ya telefona cavab vermirlər, ya da bizi günahkar çıxarmağa çalışırlar. Hər dəfə bir bəhanə gətirirlər. İş o yerə çatıb ki, ofisdə hər otaq üçün ayrıca internet xətti qoşdurmuşuq. Yenə də internet düzəlmir ki, düzəlmir”.

Məsələ ilə bağlı Nəqliyyat, Rabitə və Yüksək Texnologiyalar Nazirliyi ilə əlaqə saxladıq. Rəsmi qurum problemə bu cür aydınlıq gətirdi:
“Hər bir vətəndaş konkret provayderlə müqavilə bağlayır. Əgər onun internetində zəiflik müşahidə edilirsə, şirkətlə əlaqə saxlamalı və öz hüquqlarını tələb etməlidir. Provayderlər müqavilədə göstərdiyi şərtlər çərçivəsində keyfiyyətə xidmət göstərməlidir və buna borcludur. Nazirlik bununla bağlı dəfələrlə provayderlərə öz tövsiyələrini verib. Provayderlər müştərilər qarşısında cavabdehdirlər. Müştəri bazasının böyüklüyündən və kiçikliyindən asılı olmayaraq, bu, bütün provayderlərə aid məsələdir”.

Azərbaycan İnternet Forumunun prezidenti Osman Gündüz  isə Modern.az-a açıqlamasında bildirib ki, problemi həll etmək üçün köklü islahatlar keçirmək lazımdır:
“Artıq  səsləndirilən narazılıqlar, deyilən ictimai qınaqlar özünü doğrultmur. Bu baxımdan bütün gözlər nazirliyin üzərindədir. Nəqliyyat, Rabitə və Yüksək Texnologiyalar Nazirliyi öz növbəsində provayderləri, bu sahədə fəaliyyət göstərən ekspertləri, mütəxəssisləri yığmalı, medianı dəvət edib məsələləri müzakirə etməlidir. Hazırda vəziyyət kifayət qədər kritikdir. Hansısa qaydada ciddi nəzarət yaratmaq mümkündür. Lakin problemi tam həll etmək üçün telekommunikasiya bazarında ciddi tənzimləmə işləri aparılmalı, yeni qaydalar tətbiq edilməlidir.

Bu gün özəl provayderlər  dövlət provayderləri kimi yeraltı kabel kanal sistemindən istifadə edə bilmir. Ona görə də özəl provayderlər məcbur qalıb  internetin çəkisini azaldır. İlk növbədə özəllər üçün həmin kabellərdən bərabər əsaslarla istifadə şəraiti yaradılmalıdır. Digər tərəfdən,  bazarda elə mühit yaratmaq lazımdır ki, keyfiyyətə xidmət üçün rəqabət getsin. Bu baxımdan dövlət provayderlərinin özəlləşdirilməsi məsələsi gündəmə gətirilməlidir”.

O.Gündüz qeyd edib ki,  hiperoptik  internetə keçid etmək lazımdır:

“Biz hay-küy salıb hansısa qayqa-qanun yarada bilərik. Amma bu, qısaömürlü olacaq. Qeyd etdiklərimlə yanaşı, tariflər məsələsinə yenidən baxılmalıdır.  Nəhayət ADSL, yəni telefon xəttinin üstündə oturan internet məsələsinə nöqtə qoyulmalıdır. Bu internet artıq dünyada arxivdədir. Hiperoptik internetə keçid etmək lazımdır. Bunun üçün  də təbii ki, investisiyaya ehtiyac var. Yalnız bunlardan  sonra  problemi köklü olaraq həll etmək  mümkün ola bilər”.

ŞƏRH YAZ
0

Könül Kərimovaya qarşı dələduzluq edən qadın günahkar olduğunu etiraf etdi

Könül Kərimovaya qarşı dələduzluq edən qadın günahkar olduğunu etiraf etdi
13:20
Bu gün
96
Ölkə
A
Bu gün Bakı Ağır Cinayətlər Məhkəməsində dələduzluqda təqsirləndirilən Məlahət Məmmədovanın cinayət işi üzrə məhkəmə iclası davam etdirilib.

“Ölkə.Az”ın xəbərinə görə, hakim Fikrət Qəribovun sədrliyi ilə prosesdə dövlət ittihamçısı ittiham aktını elan edib.

Elan olunmuş ittiham üzrə M.Məmmədova özünü qismən təqsirli bildiyini deyib.

Daha sonra zərərçəkmiş qismində Əfqan Hacıyev ifadə verib. O, deyib ki, oğlunu Azərbaycan Koperasiya Universitetinə düzəltmək adı ilə M.Məmmədovaya 13 min manat pul verib: "İşi düzəltmədi. Mən də polisə müraciət elədim. Uzun müddət gedib-gəldim. Sonra dəymiş ziyanım ödənildi".
Ə.Hacıyev bildirib ki, M.Məmmədova özünü ona Təhsil Nazirliyinin işçisi kimi tanıdıb.

M.Məmmədova zərərçəkmişin düzgün danışmadığını deyib: "Əslində, mən ona bildirim ki, bu iş alınmayacaq. Sonra pulu geri qaytardım".
Ə.Hacıyev M.Məmmədovdan şikayəti və tələbinin olmadığını qeyd edib.

Digər zərərçəkmiş Sevinc Əliyeva dindirilən zaman söyləyib ki, Ələkbər Abbasovun vasitəsilə M.Məmmədovaya 10 min dollar və 40 min manat pul verib:
"Oğlum həbs edilmişdi. Bunlar da oğlumun cinayət işinə xitam veriləcəyi vədi verdilər. Lakin sonralar vədə əməl etmədilər".
O bildirib ki, oğlu Türkan Hacıəliyeva adlı qadının şikayəti əsasında həbs edilib:

"Mən Məlahəti tanımırdım. Bizi Ələkbər tanış etdi. Ələkbər də qardaşımla birgə hüquq-mühafizə orqanlarında çalışırdı. Ələkbər məni onun evinə apardı. Pulu Məlahətə Ələkbərin yanında verdim. Hətta Məlahətin qızı da evdə idi".

Zərərçəkmiş qeyd edib ki, həmin pullardan yalnız 12 min manatı geri qaytarılıb.

M.Məmmədova zərərçəkmişin ifadəsinə münasibət bildirmək istəməyib. O, özünü yaxşı hiss etmədiyini, zərərçəkmiş S.Əliyevaya 12 min manat pul geri qaytardığını təsdiqləyib.

Məhkəmənin baxış iclası iyulun 31-nə təyin edilib.

Qeyd edək ki, M.Məmmədova dələduzluqda təqsirli bilinir. O, bir neçə şəxsin etibarından sui-istifadə edərək, ümumilikdə 300 minə yaxın pulu dələduzluq yolu ilə ələ keçirib.

Cinayət işi üzər Azərbaycanın əməkdar artisti, müğənni Könül Kərimova da var.

İttiham aktına əsasən, M.Məmmədova müğənninin oğlu Rəşad Rəhimovu Rusiya universitetlərindən birinə qəbul etdirib, daha sonra Azərbaycan Dövlət İqtisad Universitetinə köçürtdürəcəyi vədi verib.

O, bu işə görə, K.Kərimovadan ümumilikdə 32 min manat pul alıb. Lakin sonradan verdiyi vədə əməl etməyib.

M.Məmmədova Cinayət Məcəlləsinin 178.3.2-ci (dələduzluq, külli miqdarda) maddəsi ilə ittiham edilir

Məhkəmənin hazırlıq iclasında məlum olub ki, M.Məmmədova əvvəllər məhkumluq həyatı yaşayıb.

O bildirb ki, 2012-ci ildə dələduzluqda ittiham olunub və Bakı Ağır Cinayətlər Məhkəməsinin hökmü ilə şərti cəza alıb.

ŞƏRH YAZ
0

Mehriban Əliyeva MDB ölkələrinin DİN rəhbərlərilə görüşdü — YENİLƏNİB

Mehriban Əliyeva MDB ölkələrinin DİN rəhbərlərilə görüşdü
13:15
Bu gün
154
Ölkə
A

 İyulun 20-də Azərbaycan Respublikasının Birinci vitse-prezidenti Mehriban Əliyeva Müstəqil Dövlətlər Birliyinin (MDB) iştirakçısı olan ölkələrin Daxili İşlər Nazirləri Şurasının Bakıda keçirilən iclasının iştirakçılarını qəbul edib.

"Ölkə.Az" AZƏRTAC-a istinadən xəbər verir ki, MDB iştirakçısı olan ölkələrin Daxili İşlər Nazirləri Şurasının növbəti iclasının Azərbaycanda keçirilməsindən məmnunluğunu bildirən Birinci vitse-prezident Mehriban Əliyeva Şuranın artıq 5-ci toplantısının ölkəmizdə baş tutduğunu qeyd edib.

Azərbaycanın MDB-nin fəal üzvlərindən biri olduğunu deyən Mehriban Əliyeva əsas vəzifənin müxtəlif sahələrdə - ictimai-siyasi, iqtisadi, humanitar və təhlükəsizliyin təmin edilməsi sahələrində hərtərəfli əməkdaşlığı, kooperasiyanı inkişaf etdirmək olduğunu vurğuladı. Bildirdi ki, MDB Daxili İşlər Nazirləri Şurası vətəndaşların normal, dinc həyatını təmin etmək üçün çox mühüm vəzifəni həyata keçirir. “Sabitlik, ictimai asayiş, qanunun aliliyi hər bir dövlətin inkişafının əsas şərtlərindən biridir”, - deyən Birinci vitse-prezident ölkəmizdə Şuranın işinə böyük əhəmiyyət verildiyini vurğuladı, Azərbaycanın regionun təhlükəsizliyinin təmin olunmasına töhfə verdiyini diqqətə çatdırdı. Ölkəmizdə cinayətkarlığın səviyyəsinin aşağı olduğunu, baş vermiş cinayətlərin çoxunun açıldığını, ağır və xüsusilə ağır cinayətlərin sayının 30 faiz azaldığını müsbət hal kimi xarakterizə edən Mehriban Əliyeva Şuranın fəaliyyətinin gələcəkdə bu meyillərin möhkəmlənməsinə öz töhfəsini verəcəyinə əminliyini ifadə edib.

MDB iştirakçısı olan ölkələrin Daxili İşlər Nazirləri Şurasının operativ informasiya mübadiləsi, risklərin minimuma endirilməsi, mütəşəkkil cinayətkarlıqla, narkotrafik, terrorizm, ekstremizmlə birgə mübarizə üçün çox gözəl platforma olduğunu deyən Birinci vitse-prezident Mehriban Əliyeva qloballaşmanın doğurduğu yeni təhdidlər və çağırışlarla səmərəli mübarizə aparmaq üçün əməkdaşlığın zəruriliyini vurğulayıb.

Birinci vitse-prezident İnterpolun baş katibi Yurgen Ştoku salamlayaraq onu bu mühüm vəzifəyə təyin olunması münasibətilə təbrik edib. Ümidvar olduğunu bildirib ki, İnterpol gələcəkdə də bu regionda təhlükəsizliyin təmin olunmasını dəstəkləyəcək.

Azərbaycanın Birinci vitse-prezidenti deyib: “Sizin diqqətinizi Azərbaycanın Dağlıq Qarabağ bölgəsində bir sıra xarici şirkətlərin qanunsuz iqtisadi fəaliyyəti faktlarına yönəltmək istərdim. Hazırda Azərbaycanın işğal olunmuş ərazilərində qanunsuz iqtisadi fəaliyyət həyata keçirən 177 xarici hüquqi şəxs aşkar edilib. Bununla yanaşı, 710 xarici vətəndaş işğal olunmuş ərazilərə gəlib. Dağlıq Qarabağ Azərbaycanın ayrılmaz hissəsidir, ölkəmizin ərazi bütövlüyünü bütün dünya tanıyıb. Buna görə də bu cür pozuntular, bu cür hərəkətlər Azərbaycan qanunvericiliyinin kobud şəkildə pozulması deməkdir. Bununla yanaşı, son illərdə bu ərazilərdən narkotiklərin becərilməsi və sonradan trafiki üçün istifadə olunması faktları mövcuddur. Bu da sözsüz ki, böyük narahatlıq doğurur. İstər xarici şirkətlər tərəfindən, istərsə də ayrı-ayrı şəxslər tərəfindən bu cür hərəkətlər Azərbaycan qanunvericiliyinin kobud şəkildə pozulmasıdır və bizim dövlətimiz həmin hərəkətlərin dayandırılması və qarşısının alınması üçün bütün qanuni tədbirləri görür və gələcəkdə də görəcək. Əlbəttə, bu cəhətdən biz İnterpolun dəstəyinə çox bel bağlayırıq. Mən bir daha təcrübənizi bölüşdüyünüzə, bizim birgə işimizə görə təşəkkür etmək istəyirəm və əminəm ki, gələcəkdə uğurlu əməkdaşlığımızı davam etdirəcəyik”.

Birinci vitse-prezident Mehriban Əliyeva bir daha Azərbaycanın MDB iştirakçısı olan ölkələrin Daxili İşlər Nazirləri Şurasının işini yüksək qiymətləndirdiyini dedi və Şuranın işinə uğurlar arzulayıb.

Rusiyanın daxili işlər naziri, MDB iştirakçısı olan ölkələrin Daxili İşlər Nazirləri Şurasının sədri Vladimir Koltsov Şuranın budəfəki iclasında bir çox vacib məsələlərin müzakirə olunacağını və mühüm qərarların qəbul ediləcəyini bildirdi. Vladimir Koltsov birgə səylərin əhəmiyyətini vurğulayaraq qəbul edilən qərarların vətəndaşların təhlükəsizliyinin təmin olunmasına yönəldiyini diqqətə çatdırıb.

***

Azərbaycan Respublikasının Birinci vitse-prezidenti Mehriban Əliyeva iyulun 20-də Müstəqil Dövlətlər Birliyinin (MDB) iştirakçısı olan ölkələrin Daxili İşlər Nazirləri Şurası iclasının iştirakçıları ilə görüşüb.

"Ölkə.Az"ın xəbərinə görə, bu barədə məlumatı AZƏRTAC yayıb.

ŞƏRH YAZ
0
BAĞLA