Mətn ölçüsü:
  • 100%

İnternetlə pul köçürmələri edərkən diqqətli olun

Bakı şəhərində yaşayan təqaüdçü, 70 yaşlı Cavid Babayev pensiya kartından mobil telefonuna kontur yükləmək istəyib. Lakin o, yaman çətinliyə düşüb.

Bu barədə C.Babayevin özü “Ölkə.Az”a şikayətində bildirib. Onun sözlərinə görə, axşam saatlarında pensiyasının kart hesabına köçməsi barədə məlumat alıb. Buna sevinən təqaüdçü mobil telefonuna kontur yükləmək istəyib. Onun bu cəhdi isə uğursuzluqla nəticələnib. Yəni ki, C.Babayevin pensiyasından 10 manat silinib, lakin onun mobil nömrəsinə həmin məbləğ yüklənməyib.

“Bu barədə “Azərikart”a şikayət etdim. Dedilər ki, maraqlanıb, bir cavab deyərik. Səhəri gün kontur yükləmək istədiyim mobil operatora müraciət etdim. Oradan bildirdilər ki, mənim nömrəmə pul yüklənməyib. Ümumiyyətlə, onlar həmin əməliyyatdan xəbərsizdirlər”, - deyə C.Babayev bildirib.

Şikayətçi deyir ki, “Azərikart”dan 5 gün gözləməyi tapşırıblar. Təqaüdçü isə bu müddətdə balansından silinən pulun itəcəyindən çox narahatdır. Həm də yaşlı kişi bu müddətdə nömrəsinə kontur yükləyə bilməyəcək.

Məsələ ilə əlaqədar “Azərikart”la əlaqə saxladıq. Şirkətin nümayəndəsi Lamiyə Həsənova bildirdi ki, problemlə bağlı müştəridən sorğu götürülüb.

“Sorğunun cavabını 5 iş günündən sonra deyəcəklər. Əgər balansdan silinən pul qeyd edilmiş telefon nömrəsinə keçməsə, müştərinin kart hesabına qayıdacaq. Bu müddət ərzində müştəri məcburi olaraq gözləməlidir”, - deyə L.Həsənova bildirib.

Problemin yaranmasına gəlincə, şirkət rəsmisi bunu belə izah edib: “Həmin anda şəbəkə nasazlığı olub. Bu ani bir prosesdir. İş prosesi zamanı qeyri-stabil nəsə olub, ona görə də, pul hesaba köçməyib. İndi tərəfimizdən araşdırılma aparılacaq və müəyyən ediləcək ki, həmin pul nə səbəbdən mobil nömrəyə keçməyib. Heç bir əməliyyat itə bilməz. Görülən bütün əməliyyatlar sistemdə qalır. Pul yükləmələri zamanı bəzən belə problemlər yaranır. Bu nə sizdən, nə bankdan, nə də “Azərikart” sistemindən asılıdır”.

Ekspertlər isə hesab edirlər ki, burada əsas problem “Azərikart”ın sistemindən qaynaqlanır. "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz “Ölkə.Az”a açıqlamasında bildirib ki, “Azərikart”dan müştəriyə sənəd verməlidirlər. Həmin sənəddə qeyd edilməlidir ki, məbləğ onun balansından çıxıb ya yox. Onun sözlərinə görə, belə problemlər əsasən ödəniş operatorlarında olur:

“Belə hallar çox baş verir. Mənə də, bununla bağlı müraciətlər daxil olur. Yaranmış problem müraciət ediləndən bir müddət sonra həll edilir”, - deyə ekspert bildirib.

O.Gündüz deyir ki, burada problem internetlə də bağlı yarana bilər: “Texniki problem yarananda keçirilən əməliyyat yarımçıq qalır. Bu zaman da, balansdan çıxan pul lazım olan hesaba köçmür. Əgər problemlə bağlı heç bir şirkət məsuliyyəti öz üzərinə götürməsə və itirilmiş məbləğ müştəriyə qaytarılmasa, bu zaman məhkəməyə müraciət edilə bilər”.

Məsələ ilə əlaqədar İT mütəxəssisi Niyaz Pirverdiyev “Ölkə.Az”a açıqlamasında bildirib ki, son günlər belə problemlər çoxalıb. Onun sözlərinə görə, insanlar internetlə pul köçürmələri edərkən çox diqqətli olmalıdırlar.

“Müştəri “Azərikart”a müraciət edərkən, onun balansından çıxarılan məbləğin hara getdiyi görünməlidir. Əgər burada məbləğin hara getdiyi məlum olmursa, problemin həlli bir az qəliz olur. Ola bilər ki, burada problem kompüterdə yaranmış nasazlıqla bağlı yaransın”, - deyə N. Pirverdiyev bildirib.

Ekspert deyir ki, bəzən də, kart sahibləri haker və internet dələduzlarının qurbanına çevrilirlər: “Müəyyən internet dələduzları var ki, daim aktiv işlədilən hesabları kontrolda saxlayırlar. Hakerlər həmin hesabların nüsxəsini belə çıxara bilirlər. Müştəri balansından pulu lazım olan hesaba köçürtmək istəyəndə, həmin dələduzlar yaratdıqları nüsxədən istifadə edirlər. Beləlik onlar balansdan silinən məbləği istədikləri hesaba köçürə bilirlər. Bu zaman müştərinin pulu balansından silinir və onun istədiyi hesaba yox, məhz hakerin yaratdığı saxta hesaba köçürülür. Sonradan həmin məbləğ yüklənən hesabdan çıxarılaraq, hakerin yönlətdiyi digər hesaba köçürülə bilər”.

N. Pirverdiyev bu səbəbdən də, güvən olmayan saytlarla pul köçürmələri etməyin çox təhlükəli olduğunu deyir.

Ziya Səccad
Ölkə.Az