İpoteka asanlaşdı: minlərlə aztəminatlı mənzil alacaq

İpoteka asanlaşdı: minlərlə aztəminatlı mənzil alacaq
23:15
15.07.2017
25
Ölkə
A
İyulun 14-də Azərbaycan prezidenti İlham Əliyev "Azərbaycan İpoteka Fondu" ASC-nin Nizamnaməsinə dəyişiklikləri təsdiq edib. İpoteka kreditinin verilmə qaydalarında da bəzi dəyişikliklər baş verib.

Ölkə.Az virtualaz.org-a istinadən bildirir ki, daşınmaz əmlak bazarı üzrə ekspert Rəşad Əliyevin dediyinə görə, Nizanmnaməyə edilən dəyişikliklər Fondun fəaliyyətinin təşkilati məsələlərini əhatə edir.

"Bundan başqa, Nizamnamə kapitalı hazırkı 307 milyon 238 min 671 manatdan 366 milyon manata qədər artırılıb. Dəyişikliklər Fondun gəlirlərinin bölüşdürülməsi məsələlərinə də aiddir. Əgər əvvəllər gəlirin 50%-i ipoteka kreditləşməsinə yönəldilməli idisə, indi bu maneə aradan qaldırılıb. Başqa sözlə, Fond özü bu səviyyəni konkret vəziyyətdən asılı olaraq müəyyən edəcək", - Rəşad Əliyev deyir.

Ekspert ona da diqqət yönəldir ki, ipoteka kreditlərinin verilməsi qaydalarında dəyişikliklər baş verib: "Əvvəllər bu kreditlər yalnız təmirli mənzillər üçün verilirdi və həmin mənzillərin 1 kvadrat metrinin qiyməti bu zonada orta bazar dəyərindən yüksək ola bilməzdi. İndi isə adi kreditlər üzrə bu məhdudiyyətlər aradan götürülüb. Lakin məhdudiyyətlər güzəştli kreditlərdə qalıb. Ən başlıcası isə odur ki, kreditlərin yalnız təmirli mənzillərə veriləcəyi ilə bağlı şərt yoxdur", - həmsöhbətimiz bildirir.

Onun sözlərinə görə, qaydalardan kreditin maksimal məbləğini müəyyənləşdirən bənd də çıxarılıb. Bu vaxta kimi həmin məbləğ müəyyən hesablamalarla məlum edilirdi ki, hesablamaların şərtləri bazardakı vəziyyətə görə dəyişə bilirdi. "Bu yaxınlara qədər həmin məbləğ 100 min manata bərabər idi. Belə çıxır ki, bu məhdudiyyət də aradan çıxıb və kreditin maksimal məbləğini Fond özü müəyyən edəcək. Lakin bu, o demək deyil ki, həmin məbləğ artırılacaq, halbuki buna tam haqqı var. Güzəştli kreditlər üzrə maksimal kreditləşdirmə həcmi daşınmaz əmlakın dəyərinin 90%-i həcmində saxlanılıb. Adi kreditlər üzrə isə yuxarı hədd 85% səviyyəsində müəyyənləşdirilib", - ekspert deyib.

Ümumilikdə, Rəşad Əliyevin fikrincə, prezident tərəfindən edilmiş dəyişikliklər Fonda daha çox imkanların yaradılması və qurumun effektiv fəaliyyəti üçün nəzərdə tutulmuşdur. "Effektiv fəaliyyət isə yalnız sosial proqramların həyata keçirilməsi deyil, həm də maliyyə dayanıqlığı və iqtisadi dividendlərdir", - Rəşad Əliyev qeyd edib.

ŞƏRH YAZ
0

İxrac nəzarətinə düşən mallar üzrə xüsusi icazənin verilməsi qaydaları dəyişib

İxrac nəzarətinə düşən mallar üzrə xüsusi icazənin verilməsi qaydaları dəyişib
00:35
Bu gün
922
Ölkə
A
Nazirlər Kabineti “İxrac nəzarətinə düşən mallar (işlər, xidmətlər, əqli fəaliyyətin nəticələri) üzrə xüsusi icazənin verilməsi Qaydaları”nda dəyişikliklər edib.

“Ölkə.Az” APA-ya istinadən xəbər verir ki, bu Qaydalar ixrac nəzarətinə düşən malların (işlərin, xidmətlərin, əqli fəaliyyətin nəticələrinin) nəzarət siyahısı üzrə ixracına, idxalına, təkrar ixracına, təkrar idxalına, tranzitinə xüsusi icazənin verilməsi qaydalarını müəyyən edir.

İxrac nəzarətinə düşən malların nomenklaturuna uyğun kodlar üzrə, habelə işlərin, xidmətlərin, əqli fəaliyyətin nəticələrinin qanunvericiliklə müəyyən edilmiş siyahısındakı malların (işlərin, xidmətlərin, əqli fəaliyyətin nəticələrinin) kateqoriyaları və bölmələri üzrə müvafiq dövlət orqanları tərəfindən verilən xüsusi icazə mülkiyyət və təşkilati-hüquqi formasından asılı olmayaraq, hüquqi şəxslər və hüquqi şəxs yaratmadan sahibkarlıq fəaliyyəti ilə məşğul olan fiziki şəxslər (sifarişçilər) tərəfindən bu Qaydalarda göstərilən əməliyyatların hər hansı birini həyata keçirməyə icazə verən rəsmi sənəddir. Dəyişiklik xüsusi icazə almaq üçün sifarişçilərin ixrac nəzarətinə düşən malların nomenklaturuna uyğun, habelə işlərin, xidmətlərin, əqli fəaliyyətin nəticələrinin qanunvericiliklə müəyyən edilmiş siyahısında göstərilən malların (işlərin, xidmətlərin, əqli fəaliyyətin nəticələrinin) kateqoriyaları və bölmələri üzrə xarici iqtisadi əməliyyatların növlərindən asılı olaraq, müvafiq dövlət orqanlarına təqdim etməli olduqları sənəd  və məlumatlarla bağlıdır. Bundan sonra xüsusi icazə almaq üçün ərizədə malın son istifadəsi və texniki təsnifatı haqqında məlumat  tələb olunmayacaq. Eyni zamanda ixrac edilən malın mənşə sertifikatının əsli deyil, surəti tələb olunacaq.

Ölkə.Az

ŞƏRH YAZ
0

Xəlil Rzanı təhqir edən gənc yazar üzr istədi

Xəlil Rzanı təhqir edən gənc yazar üzr istədi
23:54
16.01.2018
1434
Ölkə
A
Gənc yazar Kəramət Böyükçöl Xəlil Rza Ulutürkü təhqir etdiyinə görə üzr istəyib.

“Ölkə.Az” xəbər verir ki, gənc yazar bu barədə “Facebook” səhifəsində status paylaşıb.

“Bir neçə gün bundan əvvəl feysbuk səhifəmdə Xəlil Rza Ulutürk haqqında yazdığım fikirlər birmənalı qarşılanmadı. Sərt reaksiya göstərildi. Mən şəhid atası Xəlil Rza haqqında səsləndirdiyim fikirlərin kökündən yalnış olduğunu anladım və buna görə Xəlil Rzanın və onun qəhrəman oğlu şəhid Təbriz Xəlilbəylilinin ruhundan, onların ailəsindən, eyni zamanda Xəlilsevərlərdən üzr istəyirəm. Şəhidlər torpağa basdırılmış ehtiyat qüvvələrimizdir. Nə qədər torpaq altında yatan şəhidlərimiz var, vətənimiz bir o qədər böyük və qüdrətlidir”, - deyə Kəramət Böyükçöl qeyd edib.

Qeyd edək ki, bir müddət əvvəl gənc yazar Xəlil Rza Ulutürkün ünvanına xoş olmayan fikirlər yazıb. Bu fikirlər isə böyük səs-küyə və etirazlara səbəb olub.

Ölkə.Az

ŞƏRH YAZ
0
BAĞLA