İqbal Ağazadə: "Ərdoğan Türkiyə üçün yeni şablon yaradır "

Türkiyə parlamentinin konstitusiya dəyişikliyinə "hə" deməsi ilə məsələ ətrafında ciddi müzakirələr başlayıb.

Bir müddət əvvəl Türkiyənin federasiyaya çevrilə biləcəyi ilə yayılan xəbərlər indi daha çox müzakirə mövzusuna çevrilib.

Türkiyə daxilində baş verən proseslərlə bağlı Ümid Partiyasının sədri İqbal Ağazadə Ölkə.Az-a danışıb:

"Türkiyəni federal dövlətə çevirmə planları xeyli zamandır ki, var. Ərdoğan prezidentliyə namizəd olanda məsələ belə idi ki, Türkiyə ya federallaşmaya sakit şəkildə gedəcək, ya da ciddi qarşıdurmalar, ölkə boyu terror və separatizm olacaq. Ərdoğan və AKP-nin səhvi ondadır ki, Türkiyənin şablonunu pozdular. Türkiyənin Atatürkdən qalma cumhuriyyətçilik şablonu var idi. Atatürkçülük şablonu pozuldu. Ərdoğan yeni şablon cızmağa çalışır. Ancaq o yeni şablonun formasını və ipini müəyyən edə bilmirlər.

2002-ci ildə AKP hakimiyyətə gələndə Avropa İttifaqına üzv olmaq üçün hər bir şeyə gedirdilər. Bir müddət sonra Türkiyə ərəb qiyafətinə büründü, bir qədər sonra Osmanlı qiyafətinə büründü, bu gün isə Rusiya, İran, Türkiyə birliyindən söhbət gedir.

Federallaşma məsələsinə o qədər də pessimist yanaşmaq istəməzdim. İnanmıram ki, federallaşma prosesi sürətlə gedəcək. Ancaq belə də davam etsə, Türkiyənin parçalanması qaçılmaz ola bilər. Çünki proseslər Türkiyənin nəzarətindən kənarda və bəzən hətta Türkiyənin əleyhinə olaraq inkişaf edir.

Türkiyə müttəfiq məsələsində düzgün seçim edə bilmir. Bir zaman müttəfiq olduğu ilə sonra düşmən olur, müəyyən vaxt keçdikdən sonra yeni müttəfiqliyə başlamaq istəyir. İraq, Rusiya və Suriya ilə bu cür oldu. İsraillə zaman-zaman dəyişən siyasətləri olub, ancaq nəticə heç də Türkiyənin xeyrinə olmayıb. Hesab edirəm ki, bu tipli məsələlərdə Ərdoğan hökuməti yanlış axtarışdadır. Əgər əvvəlki şablonu Ərdoğan hökuməti olduğu kimi davam etdirmiş olsaydı, Türkiyə üçün böyük fayda əldə edə bilərdi. Ancaq daimi olan şablon dağıdıldı, bu isə Türkiyə üçün ziyanlı olacaq".

Səxavət Məmməd
Ölkə.Az