“İran-ABŞ müharibəsi regionda humanitar fəlakətə səbəb ola bilər”

Bunu “Ölkə.Az”a açqılamasında sabiq maliyyə naziri Fikrət Yusifov deyib.

Sabiq nazir hesab edir ki, ABŞ - İsrail cütlüyü İrana qarşı hərbi əməliyyata başlamaq qərarını artıq veriblər:

 “Əgər bu qərar verilibsə, o halda İranın hər hansı bir formada yumşalması hərbi müdaxilənin qarşısını ala bilməyəcək. İran hərbi münaqişədən nə qədər qaçmağa çalışsa da, onu bu münaqişəyə zorla çəkəcək yollar tapılacaq. Bundan öncə ABŞ bir çox ölkələrə, o cümlədən İraqa, Əfqanıstana da müxtəlif bəhanələrlə hərbi müdaxilə etmişdi”.

F.Yusifov əlavə edib ki, əgər hərbi münaqişə baş verərsə, bu regionda ölçüsü olmayan humanitar fəlakət yaradacaq: 

“Unutmayaq ki, güclü iqtisadiyyatı və kifayət qədər böyük maliyyə resursları olan ölkəmiz 30 ilə yaxındır ki, bir milyona qədər qaçqınımızın problemlərini hələ tam çözüb qurtara bilməyib. İranda 80 milyon insan yaşayır ki, bunun da yarısına qədəri azərbaycan türkləri - yəni bizim qardaşlarımızdır”.

Mürtəza
Ölkə.Az