İran prezidenti Trampla görüşməyəcək
İran parlamentinin milli təhlükəsizlik komitəsinin üzvü Hüseyn Nakvi Hüseyni yeni açıqlama verib.
“Ölkə.Az” xəbər verir ki, açıqlamaya əsasən, İran prezidenti Həsən Ruhani ABŞ lideri Donald Trampla görüşməyəcək.
“ABŞ İranla münasibətləri korladı. Nüvə müqaviləsindən çıxdı, Tehrana sanksiya tətbiq etdi. Düşünürəm ki, Tramp Kim Çen İnlə görüşdüyü kimi, Ruhani ilə görüşə bilməz. Bu görüş mümkün deyil”, - deyə parlamentari bildirib.
İran rəsmisi qeyd edib ki, təmsil etdiyi dövlət müqaviləyə əməl edib. Bununla yanaşı Hüseyni Şimali Koreyaya da xəbərdarlıq edib ki, ABŞ-a inanmasın: “ABŞ öz vədlərinə əməl etmir. Nüvə müqaviləsindən çıxması buna sübutdur. Uzun müddət davam edən danışıqlar nəticəsində beynəlxalq saziş əldə edilsə də, ABŞ müqaviləni tərk etdi. Deməli, ABŞ istənilən vaxt sözündən dönə bilər”.
Hikmət Həsənov
Ölkə.Az
