İranda İŞİD terrorçuları “iş başında” həbs edilib

"Ölkə.Az" xəbər verir ki, bu barədə İran hüquq-mühafizə orqanlarından məlumat verilib. Verilən məlumata görə, əməliyyat İran təhlükəsizlik xidməti əməkdaşları tərəfindən keçirilib.

“Bir nəfər özünü şübhəli apardığı üçün saxlanılıb. Onun üzərindən “Kalaşnikov” tüfəngi, sursat və partlayıcılar tapılıb. Bundan sonra onunla əlbir olan şəxslər saxlanılıblar”, - deyə məlumatda bildirilib.

Vurğulanıb ki, saxlanılan şəxslər İŞİD terror təşkilatının üzvləridir. Onlar İranda terror aktı törətməyə hazırlaşarkən ifşa ediliblər. İŞİD üzvləri iyunun 20-da İran İslam İnqilabı Keşikçilərinin Suriyanın  Deyr-əz-Zor şəhərində keçirdiyi əməliyyata cavab olaraq terror aktı planlayırmışlar. 

Qeyd edək ki, iyunun 20-də İran İslam İnqilabı Keşikçiləri Korpusu tərəfindən (SEPAH) Deyr-əz-Zor şəhərində əməliyyat keçirilib. Əməliyyat çərçivəsində terrorçuların gizləndiyi ərazilər raketlə vurulub. Zərbələr nəticəsində 65 terrorçu məhv edilib.

SEPAH-dan verilən açıqlamaya görə, zərbələr ballistik raketlərlə vurulub. Zərbələr nəticəsində Deyr-əz-Zorun şərqində terrorçuların məskunlaşdığı ərazilər dağıdılıb.  SEPAH bu zərbələri Tehranda törədilən terror aktına cavab kimi keçirdiklərini bildirib.

Verilən açıqlamaya görə, digər əməliyyat Əl-Mayad şəhərində keçirilib. Burada keçirilən əməliyyat nəticəsində 27 terrorçu öldürülüb. Öldürülən terrorçular arasında 6 komandir var. Rəsmi Tehranın verdiyi məlumata görə, əməliyyatlar əvvəlcədən Suriya hökuməti ilə razılaşdırılıb.

Ziya Səccad
Ölkə.Az