“İraq Kürdistanının taleyi Türkiyənin əlindədir”

“Ölkə.Az” xəbər verir ki, yeni qərara əsasən İraq Kürdistanındakı millət vəkillərinin səlahiyyəti dondurulub. İclasda 175 millət vəkili iştirak edib. Parlamentin sədri Səlim Cuburi ilə şiə milli koalisiyası Şimali İraqda keçirilən müstəqillik referendumunda səs verən kürd millət vəkillərinin toxunulmazlığının ləğvini tələb edib. Cuburi referendumda iştirak edən parlamentarilərin siyahısını da tələb edib. Sonra isə Kürd Muxtariyyətinin millət vəkillərinin bütün səlahiyyətlərinin dondurulması barədə qərar qəbul edilib.

Azərbaycanlı siyasətçilər isə düşünürlər ki, bu addımla İraq Parlamenti kürdlərin müstəqillik sevdasından daşındıra bilməyəcəklər. Politoloq Araz Əlizadə “Ölkə.Az”a açıqlamasında bildirib ki, İraq hökuməti kürdləri sıxışdırmaqla, onların müstəqillik istəklərini unutdura bilməyəcək. Onun sözlərinə görə, kürdlərin dəridən-qabıqdan çıxmalarına baxmayaraq, Şimali İraq Kürd Muxtariyyəti dünyada tanınmayacaq.  

“Beynəlxalq aləm tərəfindən kürdlərin müstəqilliyi qəbul edilməyəcək. İraq hökumətinin kürdləri sıxışdırmaq və parlamentin kürd millət vəkillərinin səlahiyyətlərini dondurmaq kimi addımları da nəticəsiz qalacaq”, - deyə Araz Əlizadə bildirib

Politoloq Ceyhun Mahmudlu da “Ölkə.Az”a açıqlamasında kürdlərə təbiq edilən sanksiyaların nəticə verməyəcəyini bildirib. Onun sözlərinə görə, İraq hökuməti kürdlərə qarşı basqını tək tətbiq etsə, heç bir nəticə olmaz.

“Bu gün Şimali İraq Kürd Muxtariyyətı adlandırılan ərazidə öz müstəqilliklərini qurmağa cəhd etdilər. Bununla da əvvəlcədən gözlənildiyi kimi İraq hökuməti tərəfindən kürdlərə basqı oldu. İraq hökuməti kürdlərə qarşı sanksiyaları tək tətbiq etsə, heç bir nəticə olmaz. Lakin Türkiyə İraq hökumətinə dəstək olsa və kürdlərə qarşı sanksiyalar tətbiq edilsə, bu zaman Şimali İraq Kürd Muxtariyyəti üçün böyük problemlər yaranacaq”, - deyə C. Mahmudlu bildirib.

Siyasətçi deyir ki, kürdlər neftlə dünya bazarına çıxırlar: “Nefti Türkiyə vasitəsilə dünya bazarına çıxarırlar. Əgər Türkiyədə kürdlərə embarqo qoyulmuş olarsa, o zaman İraq parlamentinin və mərkəzi hökumətin Kürdüstana qarşı qəbul etmiş olduğu sanksiyaların effekti olacaq. Lakin Türkiyə bu məsələyə qarışmasa, o zaman bu sanksiyaların təsiri olmayacaq”.

Ziya Səccad
Ölkə.Az