“Kasko Butik” Azərbaycanın sığorta bazarında inqilab yaradacaq

Bunu “Ölkə.Az”a müsahibəsində tanınmış sığorta mütəxəssisi, “Zaman Broker” şirkətinin baş kommersiya direktoru Xəyal Məmmədxanlı bildirib. 

X.Məmmədxanlı deyib ki, indi Azərbaycanda 1,3 milyona yaxın avtomobil var ki, bunun da 1,1 milyonu minik avtomobilləridir: 
“Statistika da göstərir ki, cəmi kasko sığortalı avtomobillərin sayı 30 min ədədi keçmir. Yəni, bazarın böyük bir qismi boşdur. “Zaman Broker”lə qərara gəldik ki, hamının ehtiyacına uyğun və əl çatan olacaq yeni kasko məhsulu yaradaq. Ötən gün təqdim etdiyimiz yeni məhsulun da çox maraqlı fəlsəfəsi var”. 

O qeyd edib ki, indiyədək baş verən sığorta hadisələrinin 97 faizində zərərlərin həcmi 5 min manatı ötmür:

“Misal üçün, gün ərzində 100-lərlə qəza ilə rastlaşa bilərik. Bunların böyük hissəsi buferin, kapotun əzilməsi, faranın sınması, güzgünün qırılması və digər kiçik hadisələr olur. Amma çox nadir hallarda böyük qəzalar - avtomobilin aşması, oğurlanması, tamamilə yararsız vəziyyət düşməsi kimi hadisələrlə rastlaşırıq. Şəxsən mən 14 yaşında maşın sürürəm. Baxmayaraq ki, hər il 1000, 1300, 1900 manat kasko sığortaya pul ödəyirəm. Həyatımda bir  dəfə sığorta ödənişi alımışam. O da avtomobilin alın şüşəsinə daş dəyib və onu dəyişiblər. Bu da cəmi 500 manat zərər olub. Bəzi kiçik zərər olub, amma o da franşizanı keçmədiyi üçün ödəniş edilməyib. Mənim kimi sürücülər isə bu ölkədə yüzlərlədir. Məsələn, bizim şirkətdə hamı maşın sürür və hamı mənimlə eyni fikirdədir. Bunu nəzərə alaraq 3000 min insan arasında sosial sorğu keçirdik və məlum oldu ki, insanların böyük hissəsi böyük qəzalarla üzləşməyiblər. Ona görə də məhsulu “Kasko Butik”adlandırdıq. Çünki məhsulların hamısı geyim ölçülərinə uyğun hazırlamışıq. Yəni, əyninizə biçilmiş müəyyən məhsulu saytdan alıb çıxırsız”.

X.Məmmədxanlı “Kasko Butik”in platformasının tamamilə onlayn olduğunu söyləyib:

“Burada hər şey elektrondur. Müştəri 2222.az saytına daxil olan kimi orada təminatın həcmindən aslı olaraq S, M, L və XL paketlərini görür, ona uyğun paketi seçə bilir. 222 manatlıq S paketinə 2222 manat, 333 manatlıq M paketi üzrə 3333 manat sığorta təminatı verilir. Daha böyük təminat istəyənlər 444 manatlıq L paketini seçərək 4444 manat və yaxud 555 manat ödəyərək 5555 manat təminat qazana bilərlər. Müştərilər aldıqları məhsulu əvvəlcə paketlərə uyğun olaraq müqayisə edirlər. Bezdirici suallar yoxdur. Sadəcə avtomobilin marka, model, istehsal ili və şassi nömrəsini daxil etdikdə sistemdən avtomobil haqqında məlumatlar çıxır. Daha sonra şəxsiyyət vəsiqəsi ilə bağlı məlumatlar daxil edilir. Daha sonra müştəri kasko sığortanın qüvvəyə minmə tarixini seçir. Daha sonra burada qaydaları oxuyub təsdiq edir və əlaqə vasitələrini qeyd edir”.

X.Məmmədxanlı qeyd edib ki, sığorta haqqını ödəmək həm də müştərilərə 111  manatlıq hissələr şəklində təklif edilir: 
“Yəni, müştəri 555 manatlıq paketi əldə etmək istəyirsə onu 5 hissəyə bölür və ödəyir. Ödəniş üçün 3 imkan yaradılıb: “PAŞA Bank”ın onlayn ödəniş sistemi,  “ExpressPay” və ofisdən kənara çıxa bilməyənlər üçün post terminal. Bu zaman digər sığorta məhsulları da müştəriyə təklif edilir. Sığorta haqqı ödəniləndən sonra müştəriyə bildirilir ki, 24 saat ərzində avtomobilə baxış keçiriləcək. Təbii ki, müştərilərin hamısını gətirmək əziyyət ola bilər deyə, iki formada həll yaratmışıq. Şəhərin hər nöqtəsində avtoservislər və yanacaqdoldurma məntəqələri ilə şəbəkə qurmuşuq. Bizim orada əməkdaşlarımız olacaq. Bundan əlavə müştəri istəsə, birbaşa “Zaman Broker”ə gələ bilər”. 

X.Məmmədxanlı bu ilin dekabr ayından etibarən Azərbaycanda ilk dəfə uzaqdan zərərin tənzimlənməsi sistemininin də tətbiq ediləcəyini söyləyib:

“Bunun üçün müştəri “Kasko Butik”in mobil tətbiqini telefonuna yükləyəcək. Müştərinin telefonunun kamerası ilə avtomobilin bütün görüntüsü onlayn qeydə alınacaq. Onun şəkilləri çəkiləcək, müştəri danışdıqca səsi qeyd ediləcək. Yəni, sadəcə maşını kənardan göstərməklə müştəri işini bitirmiş olur və artıq ofisə gəlməyə ehtiyac qalmır. Eyni zamanda bu sistem qəzalara da tətbiq ediləcək. Artıq Azərbaycanda da dron sisteminə yaxınlaşırıq. Belə ki, qəza baş verəndən sonra ölüm halı, xəsarət yoxdursa, müştəri telefonu vasitəsilə əlaqə yaradıb, avtomobilin hansı hissələrinə zərər dəydiyini açıqlayacaq və hadisə qeydə alınacaq. Artıq avtomobil yolun ortasında qalıb tıxaca səbəb olmasına imkan verməyəcəyik”.

Vasif Həsənli
Ölkə.Az