AXTAR

Axtarışın nəticələri

Bütün nəticələr
21 Avqust 2017

"Kim doğmasını daha baha satar?" — Leyla Nəzirzadədən esse

11.08.2017 22:41 Bölmə: Mədəniyyət Oxunma sayı: 2998
A- A A+

Biz kimin üçün yaşayırıq? Nəyin naminə? Su kimi axan ömrümüzə boylananda bir acı gerçəklə üzləşməli oluruq – Biz özümüzdən başqa hamı üçün yaşamağa cəhd etdik, nəticədə nə onlara, nə də özümüzə yararlı ola bilmədik... Ucuz almaq, baha satmaq üçün hər dona girərkən ömür bazarında əmtəəyə dönüb, təkrar-təkrar satıldıq. 

Ən dəhşətlisi də budur ki, piştaxta arxasında duran “satıcı”lar əsasən dəyər verdiklərimiz, dostlarımız, doğmalarımız oldu. Elə bir zaman yetişdi ki, sağ ikən zehni və fiziki gücümüzü, bəzən mülkümüzü, bəzən cəmiyyətdə yerimizi, bəzən səbrimizi, dözümümüzü, bəzən vicdanımızı, öldükdən sonra da orqanlarımızı, qanımızı, ruhumuzu satdılar, satdılar... Harınlamış məmur balalarının məzlum xalqın qanı bahasına sürdükləri bahalı avtomobillərlə basıb öldürdükləri körpə uşaqlı anaların, yaşlı ataların, küçə süpürən ağbirçək analaların; erməni gülləsinə tuş gələn zəhraların, nər kimi oğulların; zorlanan körpə qızların, dul qadınların və daha neçə-neçə bu kimi qurbanların qanı doğmaları tərəfindən auksiona çıxarıldı. Daha baha satmaq uğrunda yarış başlandı. Kimi pula, kimi evə, kimi vəzifəyə susadı. Satıldı! Dəyərlər, mənəviyyatlar satıldı! Analar bətnlərində qatillərini, atalar boyunlarında dəllallarını gəzdirdi... Körpələrin qiyməti isə, çəkiləri kimi daha az oldu... Siz hələ də insanlıqdanmı dəm vurursunuz? İnsan axtarıram, varmı???

Hərə bir məqamda şeytana uyur, 
Atan atanadır, satan satana.
 Yalançı dünyadan həqiqət umur, 
Bilmirsən İblisdir, yoxsa Satana?! 
Vicdan dəbdən düşüb, sevgiyə uyma, 
Dostun atdığı ox kürəyə batır,
 Sədaqət deyilən yalana uyma, 
Şərəf ləyaqəti dollara satır.
 Günahsız canlardan torpaq da doyub, 
Mərd qanı namərdin əliylə axır... 
Ruhunda dolaşan Tanrını qoyub, 
Hərə uydurulmuş bir bütə tapır...

Leyla Nəzirzadə
Ölkə.Az

Partner Xəbər