"Kollektiv Təhlükəsizlik Müqaviləsi Təşkilatına üzvlük məsələsi Azərbaycana qarşı təxribatdır" — Vahid Əhmədov

17:21
14.09.2018
5147
Siyasət
A
"Nikol Paşinyanın Azərbaycana qarşı söylədiyi təhdidedici fikirlərin arxasında Rusiya dövləti dayanır".

Bu fikirləri “Ölkə.Az”a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü, deputat, Azərbaycanın Baş nazirinin sabiq birinci müavini Vahid Əhmədov bildirib. 

Deputat deyib ki, tarixən olduğu kimi, indi də Ermənistanın arxasında Rusiya dayanır:

"Ermənistanın arxasında hər zaman Rusiya dayanıb. Bunu başa düşmək lazımdır. Əgər fikir versəniz, görərsiniz ki, son vaxtlar mətbuatda Azərbaycanın Kollektiv Təhlükəsizlik Müqaviləsi Təşkilatına üzv olması barədə yazılar dərc olunur, hətta, bəzi millət vəkilləri buna müsbət yanaşdığını bildirir və sairə. Ancaq mən düşünürəm ki, buna qətiyyən yol vermək olmaz. Bu, Azərbaycana qarşı təxribatdır. Əgər müstəqillimizi itirmək istəyiriksə, bu başqa məsələ, o zaman Kollektiv Təhlükəsizlik Müqaviləsi Təşkilatına üzv ola bilərik". 

V.Əhmədov qeyd edib ki, Əbülfəz Elçibəy başda olmaqla, AXC-Müsavat hakimiyyəti 1992-1993-cü illərdə rus qoşunlarını Azərbaycandan çıxaranda çox əziyyətlər çəkib:

"Bundan sonra yenidən gedib kiminsə qoltuğu altına girmək və kiməsə "böyük qardaş" deməyin vaxtı artıq keçib. Azərbaycan 27 ildir ki, müstəqil dövlətdir, kifayət qədər dövlətçilik təcrübəsi var. İndi dövlət başçımız Azərbaycanın xarici siyasətini çox normal aparır. Ona görə də Azərbaycana qarşı bu cür təxribat xarakterli addımlar olacaq. Çünki Rusiya Azərbaycanı əldən vermək istəmir, buna görə də təzyiq və təhdidlər artır. Azərbaycan artıq Avropa ilə müəyyən iqtisadi layihə sənədləri imzalayıb, təbii qazı Avropaya satır. Təbii ki, bütün bunlar Rusiyanın xoşuna gəlmir. Ona görə də Rusiya ya işğalçı Ermənistan, ya da digər vasitələrlə Azərbaycana qarşı təzyiqlər edir. Misal var ki, ayının min oyunu bir armuda görədir. İndi bizə qarşı bu qədər təhdidlər və təzyiqlər də Azərbaycanı əldə saxlamaq üçündür. Mən hər zaman demişəm ki, Rusiya dünyada kifayət qədər tanınan güclü və böyük dövlətdir. Azərbaycan da qonşu ölkə kimi Rusiya ilə bütün sahələrdə qarşılıqlı əməkdaşlıq əlaqələri qurub, bu gün dövlətlərarasında normal münasibətlər var. Bütün bunlar tam haqq verir ki, Azərbaycan Rusiya ilə bərabərhüquqlu qarşılıqlı münasibətlər yaratsın. Azərbaycanda kimsə də Rusiya ilə digər formada əlaqələrin olmasını arzu etmir. Azərbaycan Qoşulmama Hərəkatının üzvü olan dövlətdir. Ona görə də Azərbaycanın müstəqil dövlət kimi heç bir hərbi ittifaqda yer alması mümkün deyil. Tutalım ki, biz sabah Kollektiv Təhlükəsizlik Müqaviləsi Təşkilatına qoşulduq. Bəs bu tərəfdən NATO, Avropa bizə nə deyəcək? Bəzən deyirlər ki, Azərbaycanın Kollektiv Təhlükəsizlik Müqaviləsi Təşkilatına üzv olması Dağlıq Qarabağ məsələsinin həllinə kömək edə bilər. Bilirsiniz, bu inandırıcı deyil. Əgər Rusiya Dağlıq Qarabağ məsələsini həll etmək istəsə, bir neçə saatın içərisində bu mümkün olar. Məgər Dağlıq Qarabağ münaqişəsini mən yaratmışam? Rusiya yaradıb da! Bu gün də Rusiya bu münaqişədən Ermənistana və Azərbaycana qarşı təzyiq vasitəsi kimi istifadə edir. Azərbaycan Kollektiv Təhlükəsizlik Müqaviləsi Təşkilatına o zaman üzv ola bilər ki, Dağlıq Qarabağ məsələsi birdəfəlik həll edilsin. Yalnız bundan sonra Azərbaycanın bu təşkilata üzvlüyü məsələsinə baxmaq olar".

Vasif Həsənli
Ölkə.Az

ŞƏRH YAZ
0

Azərbaycanla münasibətlərin pisləşməsindən Gürcüstan özü uduzacaq — Mzevinar Xuçişvili

Azərbaycanla münasibətlərin pisləşməsindən Gürcüstan özü uduzacaq
11:12
Bu gün
261
Siyasət
A
“Bu gün biz gürcü tərəfindən strateji partnyor, müttəfiq və dost ölkə Azərbaycan tərəfinin “işğalçı” olduğu barədə tamamilə məsuliyyətsiz bəyanatlar eşidirik. Bu tip terminlərdən istifadə etmək siyasi məsuliyyətsizlik və cinayətdir. Biz emosiyasız hərəkət etməliyik”.

“Ölkə.Az” xəbər verir ki, bunu Media.Az-a müstəqil gürcü jurnalisti Mzevinar Xuçişvili bildirib. Onun sözlərinə əsasən, Sovet İttifaqının dağılmasından sonra müstəqil Gürcüstan və onun qonşuları-postsovet ölkələri ilə sərhədin müəyyənləşdirilməsi barədə uzun və çətin prosesin başladığını unutmaq olmaz. Məhz sovet dövründə təyin edilən sərhəd bu gün ciddi problemə çevrilib.

“Bu gün yaranan böhran Gürcüstan prezidenti Salome Zurabişvilinin məsuliyyətsiz bəyanatının nəticəsidir. Sərhədlərin delimitasiyası üzərində işləməli olan amma bunu etməyən hökumət komissiyasının üzvləri də alovun üzərinə yağ tökdülər”, - deyə Xuçişvili qeyd edib.

Onun sözlərinə əsasən, bu mövzunu süni şəkildə siyasiləşdirmək lazım deyil:

“Dərhal danışıqlar masasına oturmaq lazımdır. Tbilisi və Bakı arasındakı yaxşı münasibətlər Gürcüstan üçün çox vacibdir. Münasibətlərin pisləşməsindən Gürcüstan özü uduzacaq. Ümid edirəm ki, danışıqlar iki dövlət arasındakı xoş dostluq münasibətlərini yoxlamaq üçün əla üsul olacaq və bundan sonra bir-birimizin vacibliyini və dəyərini daha yaxşı anlayacağıq. Bizim xilasımız vahid Qafqazdır!”.

Qeyd edək ki, son günlər Azərbaycan və Gürcüstan arasındakı delimitasiya edilməmiş sərhəd xəttində yerləşən qədim Keşikçidağ monastrı iki ölkə arasında insident və diplomatik mübahisələrə səbəb olub.

Bu il sərhədlərin delimitasiyası məsələsi Gürcüstan prezidenti tərəfindən fevral ayında Azərbaycana səfəri zamanı qaldırılıb. 2019-cu ilin may ayında Bakıda Azərbaycan Xarici İşlər nazirinin müavini Xələf Xələfovla Gürcüstan XİN rəhbərinin müavini Laşa Darsaliya arasında danışıqlar aparılıb. Tərəflər iki dövlətin sərhəd xəttinin delimitasiyası barədə fikir mübadiləsi aparıblar. Tezliklə prosesin başa çatması barədə razılıq əldə edilib.

Ölkə.Az

ŞƏRH YAZ
0

“Gürcüstan elə tədbir görməlidir ki, gələcəkdə bu tip xoşagəlməz hallar yaşanmasın” — Millət vəkili

“Gürcüstan elə tədbir görməlidir ki, gələcəkdə bu tip xoşagəlməz hallar yaşanmasın”
11:00
Bu gün
312
Siyasət
A
Keşikçidağ məbədində gürcülərlə Azərbaycan sərhədçiləri arasında baş vermiş insident böyük narahatlıq doğurmaqdadır.

“Ölkə.Az” xəbər verir ki, bunu millət vəkili, Azərbaycan-Gürcüstan parlamentlərarası əlaqələr üzrə işçi qrupunun rəhbəri Əflatun Amaşov deyib.
“Əminəm ki, Gürcüstan rəhbərliyi məsələni çox ciddi araşdıracaq, günahkarlar qanun qarşısında cavab verəcəklər. Elə tədbir görülməlidir ki, gələcəkdə bu tip xoşagəlməz hallar yaşanmasın”,- Ə.Amaşov bildirib.

Millət vəkili əlavə edib ki, ümumiyyətlə, millətindən, vətəndaşlığından asılı olmayaraq Gürcüstanla Azərbaycan arasında nifaq salmağa cəhd edən hər bir kəs qanun qarşısında məsuliyyət daşımalıdır:

“Həssas çoğrafi mövqedə yerləşən Azərbaycan və Gürcüstan strateji tərafdaş ölkələrdir. Xalqlarımızı qədim tarixə malik möhkəm dostluq və mehriban qonşuluq ənənələri birləşdirir. Regionumuz nəhəng beynəlxalq layihələrin reallaşdığı məkandır. Bu məkanda başlıca söz sahibi Azərbaycan və Gürcüstandır. Hər iki ölkə regionun mühüm sabitlik təminatçıları olaraq çıxış edirlər. Bu mövqeyimizi gözü götürməyənlər də az deyil.

Bəzi gürcü din nümayəndələri, gürcü olmayan, sonradan gürcüləşmiş şəxslər, reytinqləri kifayət qədər aşağı olan partiyalar Keşikçidağ məsələsini şişirdərək onu sanki Gürcüstan hakimiyyətinin görməli olduğu ən mühüm vəzifə kimi dəyərləndirirlər, mövcud xüsusda ittihamlar yağdırırlar. İstəkləri Azərbaycan və Gürcüstan cəmiyyətində gərginlik yaratmaqdır”.

Məsələnin kökünü dərində gördüyünü qeyd edən Ə.Amaşov bidlirib ki, Şərqi Qərb ilə birləşdirən, konkret olaraq Çinlə Avropanın yeni, əslində isə qədim olan ticarət yolunun Azərbaycan və Gürcüstan üzərindən keçməsi, habelə regionumuzun Avropanın enerji təminatında ciddi rol oynaması müəyyən güc mərkəzlərinin mənafelərinə uyğun deyil: 

“Gərginliyin yaranmasında məhz onlar maraqlıdırlar. Burada erməni faktorunu da unutmaq olmaz. Ermənilərə Azərbaycan-Gürcüstan dostluğu, nəinki Azərbaycanın, eləcə də Gürcüstanın güclü olması sərf etmir. Ermənilər bu gün də Gürcüstana qarşı torpaq iddiasındadırlar. Yada salım ki, 2008-ci ildə baş vermiş müharibədə abxazların və osetinlərin tərkibində Gürcüstana qarşı çoxlu sayda erməni də döyüşüb. Bu, danılmaz faktdır.

Mən əminəm ki, Azərbaycan və gürcü xalqları həmişə olduğu kimi, yenə də müdriklik nümayiş etdirəcək, qonşuluq, strateji tərəfdaşlıq münasibətlərinin sarsılmasına yönələn təxribata imkan verməyəcəklər. Eyni zamanda hər iki ölkənin media nümayəndələrinə hadisələrə soyuq başla yanaşmağı, xalqlarımızı birləşdirən məsələlərinin işıqlandırılmasına daha çox üstünlük vermələrini tövsiyyə edərdim”.

Mürtəza
Ölkə.Az

ŞƏRH YAZ
0
BAĞLA