“Körpələrimiz həkim səhlənkarlığının qurbanı olub” — Sabirabadda ölən körpələrin valideynləri

“Körpələrimiz həkim səhlənkarlığının qurbanı olub”
11:24
15.05.2018
1545
Hadisə
A
Sabirabad Rayon Mərkəzi Xəstəxanasının doğum şöbəsində gecə radələrində 2 körpə doğuşdan sonra dünyasını dəyişib.

Belə ki, Saatlı rayonu Yeni Novruzlu kənd sakini, 1996-cı il təvəllüdlü Əhmədova Saniyə Daxıləli qızının gecə saatlarında doğulan oğlu səhər saatlarında keçinib.

Elə həmin saatlarda Sabirabad rayonunun Əsgərbəyi kənd sakini, 1995-ci il təvəllüdlü Yusifova Rəvanə Rahil qızının dünyaya gətirdiyi qız körpəsi də bir neçə saatdan sonra ölüb. 

Körpələrin hansı səbəbdən öldüyü ilə bağlı araşdırma apardıq. Körpələrin meyiti Məhkəmə Tibbi Ekspertiza Və Patoloji Anatomiya Birliyinin Sabirabad rayon şöbəsinə gətirilib.  

Sabirabadın Kürlə Arazın qovşağında yaşayan Saniyə Əhmədovanın qaynanası Məleykə Əhmədova “Ölkə.Az”a açıqlama verən zaman həkimləri günahlandırdı:

“Axşam saat 9-da gəlinin sancısı tutdu, gətirdik xəstəxanaya. Ofeliya və Suğra həkimi istədik, dedilər özümüz eləyəcəyik. Səhərə yaxın saat 5, 6 oldu, bir xəbər çıxmadı. İçəri də buraxmırdılar. Axır hay-küydən sonra girdim içəri. Dedim ki, doğmayıbsa öz həkimimizi gətirək. Məni Sevinc həkim qəbul etdi və dedi ki, doğuşu mən keçirmişəm, ürəyi zəif olduğuna görə vermişəm aparata qoysunlar. Ancaq aparatda uşaq ölüb. Kim tərəfindən olub demirlər.

Doğuşdan 3 gün əvvəldə gəlini müayinə edib dedilər ki, uşağın vəziyyəti normaldır. Nəvəmin ölümündə kim günahkardırsa cəzalandırılsın”. 

Zərərçəkənlərin sözlərinə görə, oğlu  2 ildir ailə qurub, dünyasını dəyişən oğlan uşağı ailənin ilk övladı olub. 

Digər dünyasını dəyişən körpənin atası Cavanşir Yusifov da hadisənin təfərrüatlarını “Ölkə.Az”a açıqladı:

“Arada yoldaşımı müayinələrə aparırdım. Hər şey normal idi. Axşam  isə sancısı tutdu, saat 9-da gətirdim xəstəxanaya, Rəna ilə Mehriban həkim birgə doğuşa girdilər. 2 saatdan sonra maraqlananda dedilər ki, gözləyin, sancı çəkir. Səhər saat 5-də səbrimiz çatmadı, içəri girdik. Həkim dedi ki, uşaq 2 gündür gəlinin qarnında ölüb. Sizin xəbəriniz yoxdur. Amma bilirəm ki, uşaq salamat doğulub sonra baxımzıslıqdan ölüb. Bizim səhiyyəmiz bərbad gündədir, aparat göstərir ki, uşaq salamatdır sonra isə deyirlər ölü olub. İmkanla əlaqədar müayinələrə rayona gətirirdim, axırı da belə... ”. 

Cavanşir Yusifov 1 ildir ailə qurub, ilk övladı olub. Özü isə Bakıda şirkətlərin birində ekspeditor işləyib. 

Faktla bağlı Sabirabad rayon prokuroru Pərvin Quliyevin “Ölkə.Az”a verdiyi açıqlamaya görə, körpə ölümləri ilə bağlı prokurorluğun müstəntiqləri hadisə yerindədilər, tibbi nöqteyi-nəzərdən ölümün səbəblərini araşdırmağa başlayıblar. Ekspertizaların yekun rəyindən sonra fakta hüquqi qiymət veriləcək.

ŞƏRH YAZ
1

Xəzərdə gəmidən dənizə düşən fəhlənin ölümü ilə bağlı cinayət işi başlanıb

Xəzərdə gəmidən dənizə düşən fəhlənin ölümü ilə bağlı cinayət işi başlanıb
21:10
Bu gün
374
Hadisə
A
Xəzərdə gəmidən dənizə düşən fəhlənin ölümü ilə bağlı cinayət işi başlanıb.

"Ölkə.Az" trend-ə istinadən bildirir ki, fevralın 15-də MPK-460” gəmisi “28 May” NQÇİ-nin 19 saylı dərin dəniz özülündən yük qəbul edərkən 4-cü dərəcəli takelajçısı Hüseynov Ağazaman Əlqardaş oğlu gəminin yırğalanması nəticəsində müvazinətini itirərək dənizə düşüb.

SOCAR-dan Trend-ə verilən məlumata görə, suya atılan xilasetmə dairələrini tuta bilməyən A.Hüseynov “Nefteqaz-62” gəmisindən suya endirilmiş qayıq vasitəsilə sudan çıxarılıb.

Gəmidə olan heyət tərəfindən A.Hüseynova ilkin tibbi yardım göstərilməsinə baxmayaraq, onun öldüyü məlum olub.

Faktla bağlı Pirallahı rayon Prokurorluğunda Cinayət Məcəlləsinin 162.2-ci (Əmək mühafizəsi qaydalarını pozma, ehtiyatsızlıqdan insan ölümünə səbəb olduqda) maddəsilə cinayət işi başlanıb.

Ölkə.Az

ŞƏRH YAZ
0

Abşeronda avtomobillərdən oğurluq edən şəxs tutulub — FOTO

Abşeronda avtomobillərdən oğurluq edən şəxs tutulub
20:14
Bu gün
518
Hadisə
A
Abşeron rayonu ərazisində avtomobilləri yaran şəxs tutulub.

"Ölkə.Az" report-a istinadən bildirir ki, Abşeron Rayon Polis İdarəsi əməkdaşlarının keçirdikləri əməliyyat-axtarış tədbirləri nəticəsində Qobu-Hökməli ərazilərində 10-a yaxın avtomobilin yan şüşəsini qıraraq oğurluq edən Ruhəddin Novruzov saxlanılıb.

O, ilkin ifadəsi zamanı müxtəlif vaxtlarda vətəndaşalara məxsus maşınları yardığını, ikisindən isə pul götürərək, oğurluq etdiyini boynuna alıb.

Faktla bağlı Abşeron Rayon Polis İdarəsində cinayət işi açılıb, araşdırmalar davam etdirilir.

Ölkə.Az

ŞƏRH YAZ
0
BAĞLA