AXTAR

Axtarışın nəticələri

Bütün nəticələr
16 Oktyabr 2017

Kürdlərin növbəti hədəfi Türkiyədir?

Ərzurumda əhali qarşısında çıxış zamanı Türkiyə prezidenti Rəcəb Tayyıb Ərdoğan Türkiyədə yaşayan kürdlərə müraciət edib.

30.09.2017 22:17 Bölmə: Analitika Oxunma sayı: 1777
A- A A+

“Ölkə.Az” xəbər verir ki, Ərdoğan kürdləri dostluğa və birliyə çağırıb. Kürdüstan dövlətinin yaradılması məsələsinə toxunan prezident onlara dəstək verən qüvvələrə aldanmamağa çağırıb: “Onlar heç vaxt sizin xidmətçiləriniz olmayacaqlar. Sizi istismar edənlərə aldanmayın”.

Qeyd edək ki, hazırda Orta Şərqdə, əsasən Türkiyə sərhədləri ətrafında yeni siyasi şərait yaranıb. Şimali İraqda kürd dövlətinin “elan” edilməsilə əlaqədar regionda siyasi şərait dəyişib. Söhbət tək Türkiyənin kürdlərə münasibətindən getmir. Bu məsələyə İraq, İran və Suriya qarışır. Eyni zamanda kənar güclər də var. ABŞ, Avropa və Rusiya kimi “əlləri” hər yerə çatan dövlətlər məsələyə müdaxilə edirlər. Əlbəttə Türkiyə məsələsində nə baş verəcəkcə, güc dövlətləri kənarda qalmayacaq. Yəni kürdlərin müstəqillik məsələsi birinci növbədə Türkiyəyə təsir edəcək.

Azərbaycanlı siyasətçilər düşünürlər ki, kürdlərin müstəqillik sevdası Türkiyəni narahat etməyə bilməz. Politoloq İlqar Altay “Ölkə.Az”a açıqlamasında bildirib ki, dövlət başçısı kimi Ərdoğan da bu məsələdən narahat olmalıdır. Onun sözlərinə görə, indi əsas məsələ Türkiyədə yaşayan milyonlarla kürdün hansı istiqamətə üz tutacağıdır.

“Bu səbəbdən də, Ərdoğan Türkiyədə yaşayan kürdləri dövlətlə birliyə çağırıb. Kürdləri Şimali İraq Kürd Muxtariyyətinin verdiyi şirin vədlərə uymamağa çağırıb”, - deyə İ.Altay bildirib.


Ərdoğanın kürdlərə çağırışı bir nəticə verəcəkmi? 

İ.Altay deyir ki, Türkiyə rəhbərinin çağırışının kürdlərə təsir edəcəyi hələlik sual altındadır. Lakin kürdlərin Türkiyəni parçalamaq iddiasını politoloq tamamən cəfəngiyyat sayır:

“Kürdlərin Türkiyəni parçalamaq haqqında dolaşan söz-söhbətləri cəfəngiyyat sayıram. Çünki kürdlər bunu bacara bilməzlər. Min ildən çox bir vaxtda mübarizə aparan kürdlər İraq dağılandan sonra “müstəqillik” elan ediblər. Onu da heç kim tanımayacaq. Bu Dağlıq Qarabağın qondarma müstəqilliyi kimi bir şeydir. Ona görə də, bu məsələnin Türkiyə ərazisinə keçməsi və orada cərəyan etməsi mümkün deyil. Təbii ki, müəyyən iğtişaş və qarışıqlıq yarana bilər. Kürdlər mübarizəyə də qalxa bilərlər. Bunun özü də Türkiyə dövləti üçün ziyanlıdır. Bir qrup insanın itaətsizliyi dövləti narahat edir. Lakin Türkiyənin içərisində parçalanma kimi qorxu yoxdur. Çünki bir millətə dünyanın müxtəlif yerlərində bir neçə dövlət qurmaq imkanı da verilmir. Yəni bir millətin bir dövləti olar. Kürdlər də onu Şimali İraq Kürd Muxtariyyətində qurdu. Onların indi digər dövlətlərdən ərazi iddiaları isə tam əfsanədir”.

Qeyd edək ki, sentyabrın 25-də Şimali İraq Kürd Muxtariyyətinin müstəqillik referendumu keçirilib. İraq hökuməti referendumun qanunsuz olduğunu bəyan edib. Türkiyə dövləti referendumu birmənalı olaraq pisləyib. Lakin referendum baş tutub. Səsvermənin nəticələrinə görə, 93 faiz müstəqilliyə “hə”, 7 faiz isə “yox” deyib. Nəticələrə əsasən kürdlər müstəqilliklərini qəbul ediblər.

Ziya Səccad
Ölkə.Az

Partner Xəbər