Lavrovun Bakıdan İrəvana mesajları və ermənilərin təşvişi

Lavrov Bakıdan Ermənistanın səsləndirdiyi absurd fikirləri də cavabsız qoymayaraq, onları pəjmürdə edib.  Kreml rəsmisi bəyan edib ki, Rusiyanın Azərbaycana silah və həbri texnika satması  beynəlxalq hüquq normaları, eyni zamanda Azərbaycan və Rusiya Federasiyası qanunları çərçivəsində həyata keçirilir. O əlavə edib ki, əksinə Rusiya və Azərbaycan arasındakı hərbi-texniki sahədə əməkdaşlığın inkişaf etdirməsi bölgədə sabitliyin qorunmasına xidmət etməsi, əslində ermənilərin burnunun üstünə vurulan yumruqdur. Əslində Rusiya bununla Ermənistan olan münasibətini bur formada nümayiş etdirir. 

Ermənistan tərəfi yaxşı anlayır ki, Azərbaycanın hərbi qüdrətinin artması onların ziyanınadır və bu da erməni cəmiyyətində gələcəyə olan inamsızlığı azaldır. Təsadüf deyil ki, hələ 2018-ci ilin martında Ermənistanın prezidenti Serj Sərkisyan Rusiyanın Azərbaycana silah satmasından narahatçılığını ifadə edən bəyanata çıxış edərək bu fikirləri səsləndirmişdi:

“Rusiyanın müxtəlif səbəblər əsasında Azərbaycana silah satması bizi narahat edir. Problem silahın keyfiyyətində deyil, sadəcə, sərhəddə duran erməni əsgəri başa düşür ki, onu Rusiya silahı ilə öldürməyə çalışırlar”. 

Ermənistan yaxşı anlayır ki, bu silah gec-tez erməni əsgərinə tərəf yönələcək. Bu da erməniləri ciddi narahat edir və çıxış yolu da tapa bilmirlər. Müttəfiqinə qarşı təhdidləri də nəticə vermir. Çünki bu gün Azərbaycana  təkcə Ermənistanın təmsil olunduğu Kollektiv Təhlükəsizlik Müqaviləsi Təşkilatı (KTMT) hərbi blokuna  daxil Rusiya deyil, eyni zamanda Belarus da silah satır. Qurumun digər üzvləri olan Qazaxstanın da Azərbaycanla çox sıx hərbi əməkdaşlığı mövcuddur.  KTMT-də təmsil olunan ölkələrin Ermənistandan çox  Azərbaycanla hərbi əməkdaşlıq etməsi onu  təklənmiş duruma və lazımsız bir ölkəyə çevirir. Bu da ancaq Azərbaycan Prezidenti İlham Əliyevin yürütdüyü müdrik və uzaqgörən siyasəti nəticəsində mümkün olur.

Azərbaycanla Rusiya arasındakı hərbi-texniki sahədə əməkdaşlıq, eyni zamanda Ermənistanın bu əməkdaşlığa  etirazı ilə bağlı mövqeyini açıqlayan rusiyalı hərbi ekspert, "Milli Müdafiə" jurnalının baş redaktoru İqor Korotçenko deyib ki, Ermənistan tərəfindən Rusiyanın Azərbaycana silah satmasına görə etirazlar hər zaman olur. Amma bunun praktik baxımdan heç bir təsiri yoxdur.

Onun sözlərinə görə, həm Rusiya, həm də Belarus Azərbaycana müasir silahlar satıb və satmaqda davam edəcək:

“Vəziyyət dəyişməyəcək. Üstəlik, prezidentlər Vladimir Putin və İlham Əliyev arasındakı son görüşlərdə təsdiqləndi ki, Azərbaycan Rusiyanın hərbi-texniki əməkdaşlıq sahəsində ən vacib tərəfdaşlarından biridir və Rusiya silahlarının davamlı tədarükünə arxalana bilər”.

Rusiyalı ekspert deyib ki, Ermənistan rəsmilərinin səsləndirdiyi bəyanatlar isə bunu heç bir şəkildə dəyişdirə bilməz:

“Rusiya hər dəfə bildirir ki, Azərbaycana müasir silah tədarükü hər hansı üçüncü ölkəyə qarşı deyil, Azərbaycanın suverenliyini və milli təhlükəsizliyini möhkəmləndirməyə yönəlib”.

Hərbi ekspertin fikrincə, Ermənistan hesab edir ki, onun hüquqları pozulur, amma istədiyini düşünə bilər:

“İrəvanın narazı olması faktı başadüşüləndir, çünki Azərbaycan Silahlı Qüvvələri daha müasir, güclü və keyfiyyətli olur. Rusiya silahları Azərbaycan Ordusunun imkanlarını xeyli artırır”.

Odur ki, Lavorvun  Bakı səfərinin yekunlarını belə dəyərləndirmək olar.

Birincisi, Lavrovun Bakıdan hərbi-texniki əməkdaşlıq barədə  səsləndirdiyi  bəyanatları  Qarabağ münaqişəsinin danışıqlar yolu ilə həlli istiqamətində Rusiyanın Ermənistana təzyiq vasitəsi kimi də dəyərləndirilməlidir.

İkincisi, Paşinyan hakimiyyətinə təzyiq mesajı, üçüncüsü, Rusiya başda olmaqla KTMT-yə üzv olan ölkələrin Ermənistana münasibəti küncə sıxışdırılması kimi qiymətləndirilməlidir. Paşinyan hakimiyyəti də bunu yaxşı anlayır.

İrəvan onu da yaxşı anlayır ki, hərbi əməliyyatlar başlayacağı təqdirdə, Moskva Ermənistana dəstək verməyəcək və bitərəf mövqedə dayanacaq. Bunun Ermənistan hansı qiymətə başa gələcəyini də yaxşı anlayırlar. Onlar yaxşı dərk edir ki, belə bir hadisə baş verərsə, bu, Ermənistanın bir dövlət olaraq süqutu deməkdir. 

Ölkə.Az