Mahmud Qurbanov: \"Dünya çempionatına vəsiqə qazanmaq məqsədimiz yox idi\"

Futbol üzrə milli komandamızın məşqçisi Mahmud Qurbanov yığmanın son seçmə mərhələdəki çıxışıyla bağlı "Ölkə.Az"-ın suallarını cavablandırıb.

- Mahmud müəllim, milli komandamız dünya çempionatının seçmə mərhələsini 10 xalla başa vurdu. İstərdim əvvəlcə nəticəni dəyərləndirəsiniz.

- On xal yığdıq. Bunun bizim üçün çox olduğunu demək olmaz. Seçmə mərhələdən əvvəl dünya çempionatının final mərhələsinə vəsiqə qazanmaq məqsədimiz yox idi. Əsas hədəf 2020-ci ildəki Avropa çempionatının final mərhələsində iştirak etməkdir. Ancaq ilk üç oyundan sonra yeddi xal topladıq və şansımız oldu. Ümid yarandı ki, nəsə edək və hamımız da istəkli idik. 

- Bildirdiniz ki, seçmə mərhələdən öncə dünya çempionatının final mərhələsində iştirak etmək məqsədi yox idi. Bəs "Niyə də yox?!" şüarı nə məna daşıyırdı? Çoxları bunu "niyə də dünya çempionatının iştirakçısı olmayaq?!" kimi qəbul etmişdi.

- Vallah, dünya çempionatına çıxmağı hamımız - futbolçular, məşqçilər, federasiya rəsmiləri arzulayırıq. Hər seçmə mərhələdən öncə hamıda belə ümid olur. 

- Mundialda iştirak etməyə gücümüz çatardımı?

- Məncə, reallığa söykənmək lazımdır. Danışmaq, müsahibə vermək çox asan şeydir. Amma hər şey doxsan dəqiqə ərzində meydançada həll olunur. Oyunlarda görünür ki, bizim istəklərimiz real idi, ya yox.  

- Almaniyanın nəinki qrupun, dünya futbolunun favoritlərindən olduğu məlumdur. Ancaq belə düşüncələr var ki, Norveçlə, Şimali İrlandiyayla başabaş oynaya bilərdik.

- Başabaş oynamağa çalışdıq. Bəzi oyunlarda alındı. Məsələn, Bakıda Şimalı İrlandiyanı udmalıydıq. Özümüz də xal almağı gözləyirdik.

- Son seçmə mərhələlərdə əvvəlkilərlə müqayisədə qol vura bilirik. Ancaq buraxdığımız qolların sayı da həddən artıq çoxdur və onların əksəriyyəti "uşaq səhvlərindən" vurulur. Məsələn, son oyunda Cavidin top itkisi, Almaniyayla Bakıdakı oyunda səhvlərimiz oldu...

- Bizdə əsas problem standart vəziyyətlərdir. Bunu etiraf etməliyik ki, "ikinci mərtəbə"də heç də yaxşı çıxış etmirik. Cavid, yaxud başqa biri itiribsə, bunun fərqi yoxdur. Elə epizodlar olur ki, biz rəqiblərimizə sürətdə uduzuruq. Əks hücumları lazımınca həyata keçirə bilmirik.

- Təmkin Xəlilzadə son zamanlar milli çempionatda yaxşı oyunuyla diqqət çəkir. Millidəki son oyununda da nisbətən seçilən futbolçulardan idi. Müdafiənin sol cinahının bizim üçün ənənəvi problemli mövqe olduğunu da bilirik. Ona seçmə mərhələnin əvvəlindən güvənmək olmazdımı?

- Bəli, daha öncədən də cəlb etmək olardı. Yerli çempionatın oyunlarına baxırıq. Ancaq bu o demək deyil ki, oyunçu indi yaxşı oynadısa, bu gün onu yığmaya cəlb edək. Oyunçunun stabilliyinə, rəqiblərə baxırıq. Məsələn, fikir veririk ki, filan oyunçu "Qarabağ"la oyunda özünü necə göstərdi. Azərbaycan çempionatında hansısa komandaya qol vuran oyunçu dərhal yığmada oynaya bilməz. Nəzərə alırıq ki, sabah Norveçlə oyunda ona həmin boşluq veriləcəkmi, oyunçu həmin imkandan istifadə etməyə qadirdirmi? Milliyə dəvət edilən futbolçu ölkə çempionatında stabil çıxış etməli, öz klubunda, öz mövqeyində seçilməlidir.

- Ancaq etiraf edək ki, milli komandada öz klubunda əsas heyətdə yer almayan oyunçular da çıxış edir.

- Məsələn kim?

- Məsələn, Əfran İsmayılov hazırda "Qarabağ"ın əsas heyət üzvü deyil və adətən meydana sonradan daxil olur. 

- Mənim fikrim budur ki, Əfran yığmada heç də pis oynamır.

- Pis, yaxud yaxşı oynamağı başqa məsələdir. Ancaq siz dediyiniz meyarlarla yanaşırıqsa, bu oyunçu millinin əsas heyətində necə oynayır?

-  Əfran "Qarabağ"da oynayır, oynamır onu biz bilmirik. Amma hər halda neçə illərdir yığmada çıxış edir, təcrübəli oyunçudur. Bəzən klubunda oynamayan oyunçunu da yığmaya dəvət edirik. Bu, məşqçinin inamından asılıdır. 

- Nə vaxtsa özünüzü baş məşqçi kimi sınamaq fikriniz varmı?

- Hamı istər ki baş məşqçi olsun. Mən də istəyirəm. Amma gərək təklif gəlsin. 

İntiqam VALEHOĞLU
Ölkə.Az