Mətn ölçüsü:
  • 100%

\"Mara Salvatruça\"

"Mara Salvatruça" qruplaşması "MS-13" adı ilə də məşhurdur.

 Bu mafiya klanı dünyanın ən qəddar və təhlükəli qruplaşması sayılır.

"Ölkə.Az" bu gün oxucularına "Əl-Qaidə"dən də qəddar sayılan "Mara Salvatruça" haqqında məlumat verəcək.

Qruplaşma digər cinayət sindikatları kimi böyük gəlirlər əldə edə bilmir. Bununla yanaşı "Mara Salvatruça"nın qəddarlığının şöhrəti Amerika qitəsində geniş yayılıb. Çünki qruplaşma liderlərinin məqsədi yollarına çıxan hər kəsi qorxutmaqdır.

Hazırda "MS-13" ABŞ-ın 42 ştatında və bir neçə Latın Amerikası ölkəsində fəaliyyət göstərir. Müxtəlif məlumatlara görə, qruplaşmanın 70-100 min arası üzvü var. Onların əsas gəlir mənbəyi Meksikadan gətirilən narkotik maddə ticarətidir.

Qruplaşma qəddarlığı ilə məşhurdur. Onların ən sevimli silahı isə maçetedir. Qətlə yetirilənlərin bəzən başını və orqanlarını kəsərək itlərə yedizdirirlər. Bir çox qurbanın üzərində 13 bıçaq zərbəsi aşkar edilir. Bu isə "Mara Salvatruça" qruplaşmasına mane olmağa risk edənlərə bir mesajdır. 13 bıçaq zərbəsi qruplaşmanın işarəsidir.

13 rəqəmi "Los Emes" və ya  "The Ms" qruplaşmasına işarədir. "M" latın əlifbasında 13-cü rəqəmdir.  "Mara"-banda deməkdir. "Mara Salvatrucha" sözünü "Salvadorlu avara qarışqaların bandası" kimi tərcümə etmək olar.

Narkotik maddə ticarətindən başqa qruplaşma insan alveri, sutenyorluq və reket fəaliyyəti ilə də məşğul olur. "MS-13" qruplaşması üzvlərinin ən səs-küylü cinayəti 2002-ci ildə Boston ətrafında fiziki qüsurlu iki yeniyetmə qızın zorlanma hadisəsi oldu. Onlardan biri iflic olduğu üçün təkərli araba ilə hərəkət edirdi. Digər qız isə lal-kar idi. Qızlardan birinin atasının bir neçə gün əvvəl mafiyaya qarşı savaşa qoşulması qruplaşmanın qəzəbinə səbəb olmuşdu.
2010-cu ildə "Mara Salvatruça"nın üzvü Rene Mexia bir qadını və onun iki yaşlı qızını qətlə yetirdiyi üçün ölüm hökmünə məhkum edildi.

"MS-13" sıralarındakı xəbərçilərə qarşı daha sərt addımlar atırlar. Qruplaşmanın qanunlarından birində deyilir: "Əgər sən xəbərçisənsə, öləcəksən". Bu qayda heç bir istisna olmadan tətbiq edilir. Kriminal keçmişi ilə vidalaşaraq məlumatları FTB-yə ötürən Brenda Baz sevgilisi tərəfindən öldürüldü. Nəzərə almaq lazımdır ki, qadın elə sevgilisindən hamilə idi. Amma onun hamiləliyi də qruplaşmanın qanunundan üstün ola bilmədi.

Banda hər işdə qəddarlıq nümayiş etdirir. Hətta qruplaşmaya üzv olmaq istəyən namizəd 13 saniyə ərzində "Mara Salvatruça" üzvləri tərəfindən döyülür. Bundan sonra o, ilk tapşırığı yerinə yetirməlidir. Yeni üzv dava etməli, qarət həyata keçirməli və ya kimisə qətlə yetirməlidir. "Mara Salvatruça"ya çox erkən yaşlarda üzv olurlar. Bəzən bandanın sıralarına 8 yaşlı uşaqlar da cəlb edilir.

"MS-13"ün vahid lideri və dəqiq strukturu yoxdur. Bu, bir "brend" altında toplaşan müxtəlif qruplaşmalardır. Qruplaşma üzvlərinin devizini ispan dilindən tərcümə edəndə "Öldür.Zorla.İdarə et" mənası çıxır.

"Mara Salvatruça" üzvləri qruplaşmaya aid olduqlarını gizlətməyə çalışmırlar. Onları sindikatın simvolu formasında tatulardan tanımaq asandır. Qruplaşma üzvləri əsasən ağ-göy zolaqlı köynək geyinirlər.

Bu qruplaşmanın təməlini Salvador qaçqınları qoyublar. Onlar vətəndaş müharibəsi gedən vətənlərini tərk etmək məcburiyyətində qalmışdılar. Salvadorda vətəndaş müharibəsi 1979-1992-ci illər arasında baş verib. Ölkənin bir çox sakinləri, əsasən də sol görüşlü partizan dəstələrinə qoşulanlar vətəni tərk etmək məcburiyyətində qaldılar. Çünki kommunistlər əleyhinə yaranan "ölüm eskadronları" onları təqib edirdilər.

Qaçqınlar leqal və yaxşı maaşlı işlə təmin oluna bilmədilər. Kriminal dünyada isə o dövrdə digər etnik qruplaşmalar liderlik edirdilər. Amma bu qruplaşmaların heç biri "Mara Salvatruça" banisləri kimi əsl müharibə görməmişdilər. "MS-13" banisləri vətənlərində o qədər qan və ölüm görmüşdülər ki, insanları soyuqqanlılıqla və qəddarcasına öldürürdülər.

ABŞ hökuməti banda üzvlərini Salvadora geri göndərəndə "MS-13" bu işdən faydalandı. Geri göndərilən mafiozlar yeni tərəfdaşlar axtarmağa başladılar, bu isə şəbəkəni genişləndirməyə imkan verdi.

Bu ilin iyul ayında ABŞ prezidenti Donald Tramp çıxışlarının birində administrasiyasının məqsədlərindən birini açıqladı: " "MS-13" qruplaşmasını məhv etmək".  Prezident çıxışında polisi cinayətkarlara qarşı mülayim davranmamağa çağırıb. "Onlar "Əl-Qaidə"dən də pisdilər"-deyə Tramp əlavə etmişdi.
Ənənəvi hərflərdən başqa "Mara Salvatruça" qruplaşmasının üzvləri 3 nöqtə formasında tatu döydürürlər. Bunlardan hər biri mafiozun həyatının harada başa çatacağına işarədir: Xəstəxana, həbsxana və qəbirsanlıq...

Hikmət Həsənov
Ölkə.Az