Dünən Masallıda cinayət törədən şəxs Nərimanovda güllələndi

“Ölkə.Az” xəbər verir ki, bu gün Bakının Nərimanov rayonunda odlu silahla öldürülən şəxs ötən gün Masallıda 1 nəfəri güllələyən 41 yaşlı Zaur Əliyevdir.

O, ötən gün hadisəni törədəndən sonra Bakıya qaçsa da, hüquq-mühafizə orqanları onun izinə düşüblər. DİN-in əməkdaşları cinayətkarı tutmaq istəsələr də, o, silahlı müqavimət göstərib. Nəticədə polis, cinayətkarı vuraraq zərərsizləşdirilib.

Faktla bağlı Bakı Şəhər Prokurorluğunda cinayət məcəlləsinin müvafiq maddəsi ilə cinayet işi başlanıb.

Xatırladaq ki, ötən gün Masallıda güllə yaraları alan 65 yaşlı Qızlavar kənd sakini Ağayev Ağəddin Rusiyada müəyyən şəxslərlə ədavətdə olub və bu səbəbdən Azərbaycana qaçıb. Lakin Zaur Əliyev onu təqib edərək Masallıda güllələyib.

***

"Ölkə.Az"a Nərimanov RPİ-dən verilən məlumata görə, atışma nəticəsində 1 nəfər güllə yarası alaraq ölüb.

Hadisə yerinə Bakı Şəhər Prokurorluğu, Nərimanov rayon hüquq-mühafizə orqanlarının və məhkəmə-tibbi ekspertiza şöbəsinin əməkdaşları cəlb olunub.

İlkin versiyaya görə, qətl zamanı odlu silahdan istifadə olunub. Hazırda ölənin şəxsiyyəti müəyyənləşdirilir.

Ölkə.Az