Mavi balina oyunu haqqında dəhşətli faktlar — Valideynlər, övladlarınızda bu əlamətləri gördükdə...

Mavi balina oyunu haqqında dəhşətli faktlar
16:30
07.12.2017
20778
Maraqlı
A
Son günlər mətbuatda "Mavi Balina" oyununun qurbanına çevrilən uşaqlar haqqında xəbərlər yayılıb.

"Ölkə.Az" olaraq bu oyun haqqında məlumat vermək və valideynlərə xəbərdarlıq etməyi özümüzə borc bildik.

İntiharlara səbəb olan oyunun rəhbərliyi gizli şəkildə göndərilən linklərlə sosial şəbəkələr vasitəsilə uşaqlarla əlaqə yaradır. Ailələr bu məsələdə çox diqqətli olmalıdırlar.

Artıq "Mavi Balina" oyunu dünyada 130 intihara səbəb olub. Təəssüf ki, onlar arasında azərbaycanlılar da var. Bu səbədən valideynləri diqqətli olmağa çağırırıq.

Təkrar edirik, oyunun rəhbərliyi sosial şəbəkə vasitəsilə göndərilən linklərlə azyaşlı və yeniyetmələrlə əlaqə yaradır. Oyunu qadağan etmək üçün bir internet səhifəsi və ya linki yoxdur. Oyun istifadəçilər arasında xüsusi linklər paylaşılaraq oynanılır.

"Mavi Balina" oyunu nədir?

Oyunun rəsmi internet ünvanı və qanuni satışı yoxdur. Rusiyanın söhbət saytlarında oyuna girmək istəyənlərə link göndərilir.  Bu link vasitəsilə oyunçunun kompüterinə virus göndərilir və bütün şəxsi məlumatları ələ keçirilir. Ələ keçirilən məlumatlar sonradan şantaj üçün istifadə edilir.

50 gün 50 tapşırıq

"Mavi Balina" oyunu 50 gün ərzində getdikcə qorxunc hala çevrilən 50 tapşırıqdan ibarətdir. Şikəst olmağa səbəb ola biləcək tapşırıqlardan tutmuş qorxu filmi izləməyə qədər tapşırıqlar oyunçulara verilir. Tapşırığı yerinə yetirə bilməyənə isə "Öl, yenə də dünyaya gələcəksən" fikri təlqin edilir.
Oyunun bəzi mərhələlərində məktəbli uşaqlara "əl biləyinə və ya ayağına iti cisimlə balina qazı" və ya "damarlara yaxın bölgələri kəs" tapşırıqları verilir.
Bəzən isə sübh saatlarında yuxudan oyandırılan oyunçu qorxulu video çarxları izləyir. Manipulyasiya edilən uşaqlar 49 tapşırıq nəticəsində psixoloji və fiziki ziyana məruz qalırlar. 50-ci gün isə final tapşırıq "balina olmaq" adlanır və oyunçuya intihar etməsi əmr edilir.

Oyunun təhlükəsi nədir?

Oyunu oynamaq istəyən şəxsə internet piratları tərəfindən virus tərkibli bir link göndərilir. Göndərilən link vasitəsilə şəxsi məlumatlar ələ keçirilir. Bu yolla oyunu oynayan şəxs ətrafındakı insanlarla bağlı təhdid, şantaj və kiber zorbalığa məruz qalırlar.
Oyunda iştirak edənlər isə gecə saatlarında edilməsi tələb edilən müxtəlif qorxulu tapşırıqları yerinə yetirirlər. Bununla da onların ruh sağlamlığı pozulur. 50 gün davam edən proses başa çatanda oyunçulara psixoloji təzyiq edilir, dəyərsiz insan olduqları fikrinə qapılmaq üçün vasitələrə əl atılır və son tapşırıq olaraq intihara sövq edilir.

Valideynlər bu xüsusda diqqətli olmalıdırlar:

-Uşaqlar sosial şəbəkə və internet məkanında belə tələlərə düşürlər. Qarşısını almaq üçün valideynlər övladlarının internetdən istifadə etmə vərdişlərinə nəzarət etməlidirlər;

-Ailələr uşaqların oynadıqları oyunları mütləq bir yerdə təyin etməlidirlər;

-Oyunda və internetdə keçirilən vaxt məhdudlaşdırılmalı və oyunun uşağın yaşına uyğun olmasına diqqət edilməlidir;

-İnternetdə naməlum şəxslərlə yaxın münasibət qurulmaması, onların şübhəli şəxs ola bilmə ehtimalının yüksək olması və belə münasibətlərin təhlükəli nəticələrə səbəb ola biləcəyi mövzusunda uşaqlarla müntəzəm söhbət edilməlidir;

-Ailə bu mövzuda məsuliyyətini dərk etməli, ehtiyac yaransa mütəxəssisə müraciət etməli, övladını sosial fəaliyyətə yönləndirilməli, sosial şəbəkədə onların dost siyahısında olmalı və internetdəki addımlarından xəbərdar olmalıdırlar.

Təhlükəki qrupu necə müəyyən etmək olar?

Loqotip
Hər qrupun öz loqotipi var. Bir çox hallarda bu Tanrı simvolikasıdır. Çünki özünü hansısa çox vacib qrupun üzvü sayır. Bu səbəbdən özünü seçilmiş sayan uşaq loqotipi istənilən tapşırığı yerinə yetirmək və cəzasız qalmağın vasitəsi sayır.

Musiqi
Bu qrupa aludə olan uşaqlar ən çox "Psynergy Project", "Beatroots" kimi musiqilərə qulaq asır. Bu tip musiqilərdə ritm insan orqanizminin bioritminə uyğun deyil. Belə yeniyetmələr depresiv trans vəziyyətinə düşür və onları idarə etmək çox asan olur.

Həyatın mənasızlığı haqqında frazalar

Bu qrupa qoşulanlar dünyada tənhalıq, təəssüf hissi və acılar haqqında məşhur şəxslərin frazalarından tez-tez istifadə edirlər.
Uşaq qəflətən sözəbaxan övlada çevrilir.

Əgər övladınız birinci sinifdən dostluq etdiyi uşaqlarla əlaqəni kəsib tam fərqli uşaqlarla dostluq edirsə, həyəcan təbili çalın. Yeniyetmə real həyatdan ayrılır və deyilən hər şeylə razılaşır.

Gündəlik rejimi dəyişilir

Övladınız gündəlik rejimini dəyişirsə, qorxmaq lazımdır. Məsələn, şam yeməyini otağında yeyir, kompüter arxasında eyni vaxtlarda oturur, müəyyən qrafiklərində dəyişiklik edirsə, qrupa qoşulma təhlükəsi var.

Yuxusuzluqdan əziyyət çəkir

Əgər övladınız səhər dərsə getmək üçün yuxudan gec durursa və ya əzgindirsə, deməli yaxşı yatmayıb. Həyəcan təbili çalın. Çünki "Mavi balina" oyununda 04:00-05:00 saatları arasında verilən tapşırıqlar var. Bu isə yuxunun ən şirin vaxtıdır. Amma övladınız yatmaq əvəzinə, tapşırıqlar yerinə yetirir: foto çəkib sosial şəbəkəyə yükləyir və.s.
Bu vaxt xüsusən seçilib ki, sübhə yaxın yuxudan oyanan uşaqda əzginlik yaransın, gərgin olsun. İkincisi, bu vaxt yuxudan oyananda adrenalin yüksəlir və yuxudan oyanma həyəcan və gələcəyə dair qorxulara səbəb olur.

Təkrarlanan rəsmlər

Yeniyetmələrin davranışları eynidir. Onlar diqqət cəlb etmək və qiymətləndirilmək istəyirlər. Bu səbəbdən hansısa işə başı qarışan yeniyetmə bunu rəsmlərdə nümayiş etdirir. Amma təhlükəli qrupa qoşulanlar yeni ideologiya ilə bağlı rəsmlər çəkirlər. Əgər yeniyetmə müntəzəm olaraq kəpənək və balina çəkirsə, qorxmaq lazımdır. Çünki kəpənəyin ömrü bir gündür, balina isə intihar üçün özünü sahilə vurur. Deməli, övladınız intiharçı qrupa üzv olub. 50 rəqəmini tez-tez yazmaq da təhlükəlidir. Çünki oyunda 50 tapşırıq var.

Sosial şəbəkədə qüssəli yazılar

Əgər övladınız intihara təşəbbüs edirsə, əvvəlcə sosial şəbəkələrdə qüssəli ismarıclar yazacaq. Onun fikrinə görə, "rəqəmsal qəbilə" onunla eyni düşüncədədir və onu anlayırlar.
Əgər övladınızın səhifəsində "Mənim vaxtıma az qalıb", "Söz verirəm ki, bunu edəcəm" tipli ismarıc görsəniz, ehtiyatlı olun. Onunla danışın və ya psixoloqa müraciət edin. Heç bir halda sərt danışmaq, səhv yolda olduğunu demək olmaz. Dolayı yolla internetdə belə qrupların olduğu, insanları səhv yönləndirdiyi barədə məlumat verin.

Bədənində cızıq və kəsiklər

İntihar qruplarında əvvəlcə oyunçulara bədənində cızıq və kəsiklər etmək tapşırığı verilir. Sonra isə hansısa canlı heyvanı öldürmək və fotosunu çəkmək tapşırılır. Yeniyetmələr ətrafdakı insanlara incik olduqları üçün bu addımları həvəslə atırlar. Bu səbəbdən ehtiyatlı olun, övladınızı müntəzəm şəkildə izləyin.

Onunla söhbət edin, dostluq edin, önəmli olduğunu hiss etdirin. Mübahisə edin və ona ürək sözlərini deməyə şərait yaradın. Cəza erməyin. Tez-tez: "sən mənim üçün çox önəmlisən, sənə çox ehtiyacım var, mən bilirəm sən küsmüsən. Səni başa düşürsən"-deyin.
Əsas odur ki, övladınıza içindəkiləri söyləməyə şərait yaradasınız. Bu zaman onun özünə qarşı yaranan aqressiyası çölə çıxacaq və azalacaq. Bundan başqa dünyada kimin üçünsə lazım olduğunu anlayacaq.

Əşyaları dağıdır

Özünə qəsd etməyi planlaşdıran yeniyetmə istəyir ki, ölümündən sonra ağlasınlar, onun haqqında danışsınlar. Bu səbəbdən əşyalarını dağıdaraq iz qoymağa çalışır. Əgər övladınızın əşyaları itirsə və ya o özü sevimli əşyalarını bir bağlamaya qoyub sizə gətirir və yaxınlara paylamağı xahiş edirsə, ehtiyatlı olun. Adətən bu yaşda uşaqlar eqoist olurlar və əşyalarını boş yerə kiməsə vermirlər.
Əşyaları ilə vidalaşmağa imkan verməyin. Yaxşı hadisələrdən danışın, müsbət sonluqlu həyat dərslərini izah edin. Tarixdə onun yaşıdı olan uğurlu insanların hekayəsini göstərin.

Açıq şəkildə ölümü haqqında danışır

Əgər yeniyetmə danışıq vaxtı "Mən ölsəm, nə edərsiniz?", "mənim yasımda nə danışardınız?" tipli suallar verirsə, təhlükə çox böyükdür. Adətən ölümə hazırlaşan yeniyetmələr bu suallardan tez-tez istifadə edirlər.

Bu səbəbdən övladınızla söhbət edin, ağlayacağınızı, acı çəkəcəyinizi bildirin. İzah edin ki, onun ölümü düşmənlərinin vecinə olmacayaq, sağ qaldıqları üçün güləcəklər. Bundan başqa mütləq psixoloqa müraciət edin.

Hikmət Həsənov
Ölkə.Az

ŞƏRH YAZ
2

Gəlirləri artırmaq üçün alternativ yollar arayın

Gəlirləri artırmaq üçün alternativ yollar arayın
01:17
22.04.2018
4596
Maraqlı
A
"Ölkə.Az" "Milli.Az"a istinadən günün ulduz falını təqdim edir:

Qoç - ilk baxışdan göründüyünün tam tərsinə olaraq irəliləyiş və uğur çətin deyil. Başlayacağınız işlərin bəzilərini tanıdığınız insanlar görə bilmirlər. Özünüzə əmin, qətiyyətli olun ki, ətrafınızdakı insanlar da sizdən ibrət alsınlar.

Köç və ya iş yerini dəyişmək üçün pis gün deyil.

Yeni tərəfdaşlarla əməkdaşlıq başlana bilər. Onlar uzun çək-çevir olmadan sizə kart-blanş verəcəklər və nəticədə mühüm qərarları təkbaşına qəbul edə biləcəksiniz.

Kommersiya layihəsi gəlir vəd edir.

Buğa - stabilliyə əlahiddə ehtiyac duyulduğu zamandır. Yüz ölçün, bir biçin. Gəlirləri artırmaq üçün alternativ yollar arayın. Yalnız öz maraqlarınızı təmin edəndən sonra yaxın ətrafınızdakı insanların istəklərinin reallaşdırılması ilə məşğul olmalısınız. Bununla belə, təşəxxüslü və xudpəsənd olmayın.

Günün ikinci yarısında fikrinizi soruşmadan sizi ağır işə cəlb etməyə çalışacaqlar. Belə iş izafi aktivlik, dözüm, qüvvə və güc tələb edir. Rutin işlərlə məşğul olun. Xırda məsələlərə görə əhvalınızı korlamayın.

Apatiyaya qapılıb bədbinləşməyin.

Əkizlər - müstəqil çalışmaq, səs-küydən və vurnuxmadan uzaq durmaq istəyəcəksiniz. Yaşanan hadisələrə marağınız azalmasın. Kommunikativ olun, əlaqələri aktivləşdirin. Təmaslarda fəallıq göstərin. Ünsiyyət çevrəsini genişləndirmədən tərəfdaş və şəriklərin, həmkarlar və dostların nə düşündüklərini öyrənin.

Günün ikinci yarısında bütün diqqəti işə yönəldin. İntellektual və fiziki yük artacaq. Özünüzü itirməyin, təşvişə qapılmayın. Səhhətinizə fikir verin. Sağlam rasionu seçin.

Xərçəng - sürprizlər vəd etməyən, psixoloji baxımdan komfortlu gündür. Çətin qərarın qəbulunda tələsməyin. Hadisələrin rəvan axarı, köklü dəyişikliklərin yoxluğu əhvalınıza müsbət təsir edəcək. Narahatlıq üçün heç bir səbəb yoxdur.

Günün ikinci yarısında mövcud durumu mütləq şəkildə nəzərə almaqla işləri qaydaya salın.

Gündəlik qayğıları çözün: onlarla sizin əvəzinizə kimsə məşğul olan deyil. Fiziki sağlamlıqla bahəm, mənəvi müvazinətə fikir verin. Başladığınız işi avtomatik yerinə yetirməyin.

Yaxın gələcəklə bağlı yeni planlar qurun.

Şir - idealist olmayın. Konkret fəaliyyəti şüarlarla pərdələməyin. Sizi maraqlandıran proseslərin praktiki yönlərini araşdırın. Təminat, alış-veriş, maliyyələşdirmə ilə bağlı problemlər yaranarsa, onların səbəblərini araşdırmamış işə başlamayın.

Günün ikinci yaırsında işlərinizə bir sıra nüanslar təsir edə bilər. Onların arasında nağd pul, ərzaq, ticarət, məişət məsələləri, dəyərlərin qorunub saxlanması ilə bağlı məsələlər var.

Mürəkkəb, çoxmərhələli əməliyyata başlamayın. Hesablaşmalarda səhv etməyin.

Qız - tələsiklik və vurnuxma sevməyən zamandır. Yeni material axtarışları çətinləşəcək. Bitkin hesab etdiyiniz ideya mükəmməlikdən çox uzaqdır. Çatışmazlıqları aradan qaldırın. Real gəlir və praktiki mənfəət edən işlə məşğul olun.

Günün ikinci yarısında eyni vaxtda bir neçə sadə müşkülün çözümü ilə məşğul ola bilərsiniz. Praqmat təsir bağışlayan məsələlərin kökündə romantik hisslər dura bilər. Maraqlı, sərfəli macəra təsiri bağışlayan avantüraya aldanmayın.

Məkrli insanın toruna düşməyin.

Axşam saatlarında normal istirahət edin.

Tərəzi - günün ilk yarısı genişmiqyaslı layihəyə və ya yeni işə başlamaq üçün əlverişli zaman deyil. Birgə fəaliyyətdə şəriklə tərəfdaşı tələsdirin. Apatiya, süstlük zamanı deyil. Layihənizin praktiki yönlərini yoxlayın. Cari işlərdə volüntarizmə yol verməyin

 

Günün ikinci yarısında maliyyə təhlükəsizliyi, nüansların hesablanması ön plana çıxır. Bankdan zəng istisna deyil.

Axşam saatlarında komfortu təmin edin. Qida rasionunuza fikir verin.

Əqrəb - maliyyə məsələlərində yaranan mübahisələri həll edin. Mövqelərinizdən geri çəkilməyin. İnadkar, amma səbrli və qətiyyətli olun. Sizin fəaliyyətinizə sədlər yaradan, problemlərinizi artıran insandan maksimal dərəcədə uzaq durun.

Dəyər verdiyiniz insanın maraqlarını günün ikinci yarısında qulaqardına vurmayın. Böyük məbləğin dövr etdiyi əməliyyatda sayıq davranın. Ailə üzvləri ilə səmimi olun.

Təkid və təsirlərdə ifrata varmayın. Belə metodların sayının artırılması yaxşı heç nə vəd etmir.

Oxatan - fəaliyyət sahənizdə planlı işlərə üstünlük verin. Seçim çətin olsa da, yanlış qərar verməyin. Məsuliyyətdən yayınmayın.

Etibara, keyfiyyətə, stabilliyə, uzunmüddətli effektə, yüksək səviyyəli sonuclara can atın. Rutin prosesləri qaydaya salın.

Günün ikinci yarısında irəliləyiş üçün dürüst funksionaldan istifadə edin. Səhhətinizə fikir verin. Sizi uzun müddətdən bəri narahat edən məsələlərdə spontan qərarlar verməyin.

İlk baxışdan cazibədar təsir bağışlayan təkliflərə aldanmayın.

Axşam saatlarına yaxın yalan və fırıldaq riski artır.

Oğlaq - qüvvə və imkanlarınızı dəqiq hesablayın. Yeniləşən şəraitdə, dəyişən situasiyada maddi imkanlarınızı formalaşdıran nüanslara diqqət verin. Gəlir, maaş, yeni maliyyə mənbələri, gündəlik qayğılar və ödənişlər aktuallaşır.

Günün ikinci yarısında gəlirləri artırmağa çalışanda ehtiyatlı olun. Maddi durumunuzu yaxşılaşdırmaq üçün həddən artıq riskli yolları seçməyin.

Dostlara bel bağlamaq olar. Hadisələrə təsir imkanlarına malik nüfuzlu şəxsə yalnız müstəsna halda müraciət edin.

Axşam saatlarında normal istirahət etməyə çalışın.
 

Dolça - şəxsi münasibətlərin həlli üçün günün ilk yarısı əlverişli zaman deyil. Dialoq uzana bilər. Ailə üzvləri ilə etirafları ertələyin. Daşınmaz əmlak, miras,ailə büdcəsi, ev təsərrüfatı ilə bağlı məsələləri təkrarən müzakirə etmək olar.

Günün ikinci yarısında fəaliyyət sahəsində ekstensiv metodlardan yararlanmayın. Qarşınıza qoyduğunuz məqsədə çatmaq üçün mümkün qədər effektiv variantı seçin.

Diqqətli olun, xırdalıq və təfərrüatlara fikir verin. Detalları nəzərdən qaçırmayın.

Pəhriz saxlamağa başlamaq olar.

Balıqlar - zəruri ehtiyac olmadan risk etiməyin, tələsik addımlar atmayın. Yaxın ətrafınızdakı insanların sizdən kəskin şəkildə narazı qalmalarına imkan verməyin. Sizi intriqalara cəlb etməyə, təxribatlara çəkməyə çalışırlar. Yaxşı tanımadığınız insanların boş vədlərinə uymayın. Bədxahlarla düşmənlərin sayını artırmayın. İşgüzar ünsiyyət baxımından çox çətin gündür. Şəxsi münasibətlərdəki çətinliklərin sayını artırmayın.

Yaxınlarınız sizi sevir, dəyər verirlər.

Rasionunuza fikir verin. Tamahkarlıq etməyin. Fiziki işi azaldın.

ŞƏRH YAZ
0

Sonradan yerinə yetirilməsi çətin öhdəliklər götürməyin

Sonradan yerinə yetirilməsi çətin öhdəliklər götürməyin
01:05
21.04.2018
7592
Maraqlı
A
"Ölkə.Az" "Milli.Az"a istinadən günün qoroskopunu təqdim edir:

Qoç - günün ilk yarısında enerji səviyyəniz yüksək olacaq. Situasiya sizə meydan oxusa da, maneələri dəf etməyə qüvvə və gücünüz var. Vaxt itirməyin, islahatlara və dəyişikliklərə başlayın. Prinsipial baxımdan mühüm anlaşma, müzakirə və ya sövdələşmələri təxirə salmayın.

Günün ikinci yarısında imici yeniləyin. Pəhriz saxlamağa başlayın. Səhhətinizin qeydinə qalın. Kredit götürmək və ya tam əksinə, borc vermək üçün əsla əlverişli zaman deyil.

Ehtiyatlı olun, sayıq davranın.

Axşam saatlarında gəzintiyə çıxın.
Buğa - günün ilk yarısından etibarən aktiv olun. Fiziki işləri qulaqardına vurmayın. İradəli, qətiyyətli olun. Seçdiyiniz kursa, istiqamətə sadiq qalın. Çalışdığınız insanı aldatmayın. Yeni birgə layihə hazırlayırsınızsa, təfərrüatları və şərtləri əvvəlcədən razılaşdırın.

Günün ikinci yarısında şəriklərlə dil tapmaq çətin deyil. İdeal aramayın. Risk və eksperimentlər yalnız maddi durumuzu əhəmiyyətli dərəcədə yaxşılaşdıra biləcək variantın reallaşdırılması ilə bağlı olarsa, faydalıdır.

Ümumi işlərdə süstlük etməyin.

Axşam saatlarında normal istirahət edin.

Əkizlər - mühüm işə başlamayın, ciddi layihələr barədə düşünməyin. Başladığınız işləri bitirin. Aldığınız təklifləri dəyərləndirin. Düşünülməmiş, tələsik addımlar atmayın. Sonradan yerinə yetirilməsi çətin öhdəliklər götürməyin, vədlər verməyin.

Alış-veriş üçün əlverişli gün deyil. Əyləncə və nəzərdə tutulmamış səfərlərə çox pul xərcləməyin. Yaxınlarınız üçün yaxşı hədiyyələr seçin.

Xərçəng - impulsiv olmayın, emosiyaların təsiri altında hərəkət etməyin. Planların kəskin dəyişkənliyi yaxşı heç nə vəd etmir. Kiməsə və ya nəyəsə spontan aludəçilikdən qurtulun. Hisslərin əsirinə çevrilərək yanlış qərar verməyin. Atacağınız addımların fərqinə varın.

Günün ikinci yarısında əvvəlcə edib, sonra fikirləşməyin. Təlaşa düşməyin, əndişələnməyin. Dəyər verdiyiniz insanlarla səmimi davranın. Bununla belə, bədxahlar və rəqiblərin hazırladıqları məkrli planın qurbanına çevrilməyin.

Təşəbbüskar olun. İdeyalarınız pis qarşılanmayacaq.

İş yerində rəhbərliklə və həmkarlarla münasibətləri korlamayın.

Şir - günün ilk yarısında konkret və qətiyyətli addım atmaq niyyətiniz varsa, məramınızın gerçəkləşdirilməsini təxirə salmayın. Unikal, sərfəli məqamdır. Dəqiq fəaliyyət planınız yoxdursa, şərtləri dəyərləndirin, situasiyanı qiymətləndirin. Detallar sizə dürüst yolu seçməyə kömək edəcək.

İrəliləyişə nail olmaq, sıçrayış üçün baza hazırlamaq olar.

Günün ikinci yarısında təəssüratlara qapılaraq iradəsiz insan təsir bağışlamayın. Özünüzdən bədgümanlığınız kənardan çox gözəl görünür. Niyyətə çatmaq üçün ilk əvvəl gizli təlaşlara və qorxulara qalib gəlmək gərəkdir.

Qız - fəaliyyətinizin bəzi aspektlərini uğurla dəyişə bilərsiniz. Lokal islahatlardan çəkinməyin. Köklü, ciddi dəyişikliklər üçün yaxşı məcra formalaşır.

Nəzərdə tutduğunuz proqramı reallaşdırmaq üçün risk etmək, yeni maliyyə əməliyyatına başlamaq lazımdır.

Günün ikinci yarısında dəqiq və normal plan varsa, avantürizm özünü doğruldacaq. Birgə layihəyə başlamaq üçün pis zaman deyil. Fəqət yaxşı tanıdığınızı düşündüyünüz insan barədə xoşagəlməz gerçəkliklə tanışlığa hazır olun.

 

Axşam saatlarını ailə üzvləri ilə keçirin.
 

Tərəzi - dostlarla görüş, anlaşma, müqavilə və sazişlər üçün yaxşı zamandır. Yeni müqavilənin şərtləri ilə yanaşı, ən xırda detallarına bələd olmadan yekun qərarınızı açıqlamayın. Rəqabət güclənəcək.

Günün ikinci yarısı qarışıq, mürəkkəb zamandır. Birgə fəaliyyət göstərdiyiniz, əməkdaşlıq etdiyiniz insanın maraqlarını nəzərə alın. Ümumi maraqları şəxsi ambisiyalardan üstün tutun. Güzəştə meylli olsanız, bir sıra problemləri rüşeym halında olarkən çözə bilərsiniz.

Axşam saatlarında gəzintiyə çıxın.

Əqrəb - passivlik yolverilməzdir. Daha ciddi uğurlara nail olmaq istəyirsinizsə, qarşınıza qoyduğunuz məqsədə doğru fasilələrə yol vermədən, qətiyyətlə irəliləyin. Çalışdığınız sahədə peşəkar olmalısınız. Problemləri həll etmək və tapşırılan işi vaxtında başa vurmaq üçün yeni metodlardan yararlanın.

Günün ikinci yarısında yaxın perspektivlə bağlı planlara yeniliklər edin. Sistem bazasını yeniləyin. Dəyər verdiyiniz insana konkret yardımlar edin. Axşam saatlarında normal istirahət edin. Əks təqdirdə yorğunluqdan qurtula bilməyəcəksiniz. Bu isə səhhətinizdə problemlər yarada bilər.

Axşam saatlarını evdən kənarda keçirin.

Oxatan - bilik və bacarıqlarınızı nümayiş etdirməyə çalışanda situasiyanı nəzərə alın. Yaşanacaq hadisələr əhvalınızı müəyyənləşdirəcək. Vaxt qıtlığı hiss olunsa da, peşəkar öhdəliklərinizi unutmayın.

Spontan addımlar effekt versə də, ağlınızda ümumi fəaliyyət planı olmalıdır.

Günün ikinci yarısında yaradıcı ideyaların sayı artacaq. Ailə üzvlərini sevindirin. Şəxsi münasibətlərdəki hadisələri kontrolda saxlayın. Virtual romanı real formata çevirməyə tələsməyin.

Axşam saatlarında normal istirahət etməyə çalışın.

Oğlaq - fəaliyyət göstərdiyiniz arealda köklü dəyişikliklər zamanıdır. Münasibətlərdə emosional aktivləşmə istisna deyil. Standart iş qrafikində yenilənmələrə zərurət duyulur. Kiçik, qısamüddətli, amma intensiv proses yaxın gələcəkdə maraqlarınızı təmin edəcək genişmiqyaslı planın ilk mərhələsi ola bilər.

Günün ikinci yarısında öz maraqlarınızla yanaşı, yaxınlarınızın mənafelərini də düşünün. Riskləri minimuma endirməyə çalışın. Texniki və psixoloji təhlükəsizliyin təminatına can atın.

Avantüralara qatılmayın.

Dolça - günün ilk yarısından etibarən fəal olun. Yaşamınızda yeni mərhələ başlanır. Yaranmış çətinliklərdən birinin çözümü ilə bağlı ekstraordinar variantın seçilməsinə ehtiyac var.

Tərəfdaş və ya dostlardan biri ilə görüş son vaxtlar sizi narahat edən problemin həllində irəliləyişə səbəb ola bilər.

Günün ikinci yarısında formalaşan spontan ideyanı həyata keçirməyə çalışın. Passiv olmayın. Eyni zamanda tanışların və ya yaxın ətrafınızdakı insanlardan birinin avantürasında iştirak etməyin.

Axşam saatlarında normal istirahət etməyə çalışın.

Balıqlar - hadisələrin inkişaf məcrası ilə barışın. Bununla yanaşı, özünüzü məhdudlaşdırmayın, qətiyyətli olun. Planlarınız və niyyətləriniz barədə danışmaqdan çəkinməyin. Əsla gözləmədiyiniz halda nə isə əldə edə bilərsiniz. Yeni tanışlıqlar faydalıdır.

Günün ikinci yarısında problemlərin həllində mütərəqqi variantlardan istifadə edin. Şəxsi münasibətlərdə səmimi olun, gerçəkləri pərdələməyin. Əks təqdirdə qarşı tərəfin xətrinə dəyə bilərsiniz. Durumu vidalaşma həddinə çatdırmayın.

ŞƏRH YAZ
0
BAĞLA