MDB və Avropada ən ucuz dizel yanacağı Azərbaycandadır

“Ölkə.Az” xəbər verir ki, Azərbaycan dizel yanacağının qiymətinin ucuzluğuna görə beynəlxalq agentliyin reytinq cədvəlində ilk onluqda yer alıb. 167 dövlətin yer aldığı cədvəldə Azərbaycan bu kriteriyaya görə, 9-cu yerdədir.

Dizel yanacağının Azərbaycanda 1 litri 35 sentə satılır. Bu isə Avropa və MDB dövlətləri arasında ucuzluğa görə birinci yeri tutmağa imkan verir.
Dünya üzrə isə bu yanacaq növünün ortalama qiyməti 1 dollar 4 sentdir. Ən ucuz dizel Venesuelada satılır. İslandiyada isə dizelin 1 litri 2.02 dollara satılır. Bu isə, dünya üzrə ən bahalı göstəricidir.

Azərbaycanda satılan benzinin qiyməti isə 167 ölkə arasında 24-cü yerə layiq görülüb. Dünya üzrə bu yanacaq növünün ortalama qiyməti 1.15 dollardır. Venesuelada isə benzinin litri cəmi 1 sentdir. Siyahıya da elə Venesuela liderlik edir. Yenə də ən bahalı benzin İslandiyada satılır. 1 litr üçün 2.10 dollar.

Hikmət Həsənov
Ölkə.Az