"Məcburi köçkünsən, bu məktəbdə oxuya bilməzsən" — DAHA BİR TƏHSİL QALMAQALI

12:50
07.02.2019
20155
Ölkə
A

Cəbrayıl rayonundan məcburi köçkün Səbahət Mehdiyeva "Ölkə.Az"-ın redaksiyasına 162 saylı orta məktəbin direktoru Sevinc Abbasova   barədə şikayət müraciəti edib. S.Mehdiyeva bildirir ki, qızı Atakişiyeva Sevinc 162 nömrəli məktəbin doqquzuncu sinif şagirdidir. Valideynin dediyinə görə, direktor mütəmadi olaraq onun övladını təhqir edir:

Səbahət Mehdiyeva

"Ötən il qızım evə gəlib bildirdi ki, direktor sinfə gələrək bizi hədələdi, dedi, sizə qiymət yazılmağına imkan verməyəcəyəm, sinifdə saxlayacağam. Qızım əlaçıdır, şərəf lövhəsində də fotosu var. Həmin sinifdəki iyirmi uşağın hamısını direktor gözümçıxdıya salmışdı. Qayınatam 2018-ci ilin mart ayında Təhsil Nazirliyinə zəng vurdu. Bundan sonra direktor bizimlə düşmən oldu. Həm də direktor elə bilirdi ki, qızımın sinif rəhbəri Könül müəllimə pul yığır. Halbuki heç vaxt elə şey olmayıb. Həmin vaxt bir valideyn uşaqlardan soruşub ki, bura necə məktəbdir. Uşaqlar da cavab verib ki, bütün məktəbdə pul yığılsa da, bizim sinifdə pul yığılmır. Həmin günün axşamı-qızım ikinci növbə oxuyur-Sevinc evə gələn kimi arxasınca iki  sinif yoldaşı da gəlib dedilər ki, qızınızı direktor məktəbdən çıxardır. Evdə heç kim olmadığı üçün özüm məktəbə getdim. Bundan əvvəl də beşinci sinifdə oxuyan oğlumun sənədləri üstümə tullamışdı. Demişdi ki, sən məcburi köçkünsən, apar uşağın məcburi köçkün məktəbində oxusun, burada oxumağa haqqı çatmır. Mən də uşaqlarımı aparıb Zəngilan məktəbinə qoydum". 

S.Mehdiyeva bildirir ki, Sevinc Abbasova barədə hüquq-mühafizə orqanlarına da müraciət edib:

"Mart ayında direktorun yanına gedib soruşdum ki, övladımı niyə məktəbdən çıxardırsınız? Dedi, siz başa düşən qadınsınız, hər uşaqdan otuz manat yığın verin, sinif bölünməsin. Mən də valideynlərə dedim, heç kim razılaşmadı. Özüm yataqxanada yaşayıram, bütün ailə qayınatamın aldığı təqaüdə baxır. 

Qızım Nicat adlı bir uşaqla oturur. Qızımı yanına çağırıb deyib ki, sən niyə oğlanla oturursan? Məgər oğlanın qızla oturması məktəb strukturuna ziddir ki? Deyir, Nicata kömək eləmisən, sevgilindi?. Həmin Nicat adlı uşağın da üstünə bir dəfə polis gətirmişdi. Gedib dedim ki, ayıb olsun sizə, bu nə sözdür qız uşağına deyirsiz? Bildirdi ki, hara şikayət etsəniz də, mənə heç nə edə bilməzsiniz, amma mən səni, uşaqlarını yatdığın yerdə götürdərəm. Mən də bunun dediklərini yazıb Baş Prokurorluğa müraciət etdim. Baş Prokurorluq şikayətimi Bakı Şəhər Baş Polis İdarəsinə yönləndirmişdi. Məryəm adlı bir xanım gəldi, dedi ki, bütün müharibələrin sonu sülhlə nəticələnir. Dedim, sizə görə keçirəm, amma bir də belə hərəkət etməsin. Özüm də dəfələrlə Bakı Şəhəri üzrə Təhsil İdarəsində də olmuşam, amma xeyri yoxdur. Məktəbə gəlirəm ki, müəllimlərdən övladımın necə oxumasıyla maraqlanım. Deyir, sən içəri girə bilməzsən. Məgər mən terrorçuyam?"

Valideynin sözlərinə görə, Bakı Şəhəri üzrə Təhsil İdarəsindən gələn nümayəndə də direktorun təhqirinə haqq qazandırıb:

"Bakı Şəhəri üzrə Təhsil İdarəsindən Şirindil Əhmədov adlı şəxs sinfin bölünməməyi ilə bağlı 15 valideynin müraciəti əsasında məktəbə gəlmişdi. Direktor həmin 15 valideynin yanında məni təhqir etdi. Dedi, yaxşı eləmişəm, get, hara istəsən, şikayət elə. Bildirdim ki, siz müəllimsiniz, mənim qızımı niyə uşaqların içində təhqir edirsiniz? Şirindil Əhmədov da orada idi. Dedi ki, direktor məktəbi idarə etmək üçün belə davranmalıdır. Soruşdum ki, Şirindil müəllim, direktor mənim uşağımı təhqir etməlidirmi? Qayınatam bundan əvvəl  Şirindil Əhmədova zəng elədi. Bildirdi ki, yetmiş yaşım var, uzun illər hüquq-mühafizə orqanlarında işləmişəm, indi ağır xəstəyəm. İstəyiriniz ki, bu halımda gedim direktoru öldürüb həbsxanada ölüm? Şirindil müəllim də qayınatama dedi ki, Aydın müəllim, Sevinc Abbasova şiddətli töhmət alıb, amma ağlı özünə gəlməyib. Bu, Şirindil müəllimin qayınatama dediyi sözdür. Ağlı özünə gəlməyib, tədbir gör də. O məktəb bu dəqiqə də şərlə, böhtnla və rüşvətlə idarə olunur. Məktəbə uşaq qəbul etmək beş yüz manatdır. Hətta bu dediklərimi bəzi valideynlər də təsdiqləyə bilərlər. Valideynlər də bu adamdan qorxur. Kimsə şikayət etsə, dərhal uşaqlarını sıxışdırırlar. 

Sizcə rüşvətlə, şərlə, şantajla məktəb idarə etmək olarmı? Bütün aidiyyatı qurumların rəhbər şəxslərinə müraciət edərək bildirirəm ki, Sevinc Abbasova kimi adam direktor ola bilməz. Xahiş edirəm, bu şəxs barədə qanuni ölçü götürülsün.

Əməkdaşımız səsləndirilən ittihamlarla bağlı məktəbin direktoru Sevinc Abbasova ilə əlaqə saxlayıb. S.Abbasovanın barəsində səsləndirilən ittihamları dinlədikdən sonra verdiyi cavabı olduğu kimi təqdim edirik:

"Hörmətli "Ölkə.Az" saytının müxbiri, zəhmət olmasa Bakı Şəhəri üzrə Təhsil İdarəsində Bəşarət müəllimə müraciət edin. Onun bu məsələdən xəbəri var. O sizə lazımi məlumatı verəcək. Zəng etdiyiniz üçün təşəkkür edirəm". 

Bakı Şəhəri üzrə Təhsil İdarəsinin mətbuat katibi Bəşarət Məmmədov isə direktorun dediklərini təkzib edib:

"Direktor yəqin deyib ki, idarə məlumatlıdır, mən yox. Zəhmət olmasa,  press@baku.edu.gov.az emailinə yazın cavab verilsin".

Mövzu ilə bağlı Bakı Şəhəri üzrə Təhsil İdarəsinin daha geniş mövqeyini öyrənməyə çalışacağıq. 

Mövzunu diqqətdə saxlayacağıq.

İntiqam VALEHOĞLU
Ölkə.Az

ŞƏRH YAZ
2

"Qapını açanda gördüm polislərdir, əllərində kamera..." — Balıqçı Fuad narkotikin toruna düşdü

04:03
Bu gün
1083
Ölkə
A
Bakı Ağır Cinayətlər Məhkəməsində Siyəzən rayonu, Yenikənd kənd sakini, 45 yaşlı Fuad Quliyevin cinayət işi üzrə məhkəmə prosesi yekunlaşıb.

"Ölkə.Az" virtualaz.org-a istinadən bildirir ki, istintaq yolu ilə müəyyən edilib ki, Fuad Quliyev özünə məxsus həyətyanı sahədə qanunsuz olaraq külli miqdarda narkotik tərkibli bitkilər əkib becərib, onlara aqrotexniki qaydada qulluq göstərib, kultivasiya edib.

Bu il iyul ayının 28-də Siyəzən Rayon Polis Şöbəsinin əməkdaşları tərəfindən keçirilmiş əməliyyat tədbirləri nəticəsində F.Quliyevə məxsus yarımtikilidə dibçəklərdə əkilmiş, yaş vəziyyətdə ümumi çəkisi 6580,0 qram olan 62 ədəd çətənə kolu aşkarlanıb.

Törətdiyi cinayət əməlinə görə F.Quliyevə qarşı Cinayət Məcəlləsinin 237.2.3-cü (Qanunsuz olaraq tərkibində narkotik maddələr olan bitkiləri kultivasiya etmə) maddəsi ilə ittiham irəli sürülüb və barəsində Siyəzən Rayon Məhkəməsi tərəfindən 4 aylıq həbs qətimkan tədbiri seçilib.

Əsasən balıqçılıqla məşğul olduğunu deyən Fuad Quliyev otuz yaşından bəri narkotikə qurşanıb. Bu ilin aprelində dənizin kənarı ilə evə qayıdarkən sönmüş ocağın yaxınlığında kibrit qutusuna rast gəlib. Qutunun içərisindəki çətənə toxumlarını o saat tanıyıb. Toxumları evə gətirib, onları əkib-becərib. Sönmüş ocağın kənarından tapdığı çətənə toxumları böyüyüb ərsəyə çatdıqdan sonrasa elə Fuadın öz ocağını da söndürüb: "Kibrit qutusunu açanda içərisində çətənə toxumu olduğunu gördüm. Marixuana çəkirəm deyə çətənə toxumu olduğunu bildim. Balıq mövsümü başa çatırdı. İşlərimi yekunlaşdırdıqdan sonra çətənə toxumlarını əkməyi qərara aldım. Toxumları dibçəklərdə əkdim. İki-üç gündən bir suvardım, alaq otlarını təmizlədim, qulluq göstərdim".

F.Quliyev deyir ki, çətənə kollarını becərməkdə məqsədi gələcəkdə onları yığıb qurutmaq və asta-asta istifadə etmək olub: "Heç vaxt narkotik vasitələrin alqı-satqısı ilə məşğul olmamışam. Bu il iyulun 28-də həyət qapısı döyüldü. Qapını açanda gördüm ki, bir neçə polis əməkdaşları əllərində videokamera ilə dayanıblar. Mənə narkotik bitkilər əkməkdə şübhəli olduğumu dedilər və videoçəkiliş vasitəsilə həyətyanı əraziyə baxış keçirəcəklərini bildirdilər. Etiraz etmədim. Çətənə kolları əkdiyimi etiraf etdim və polisləri dibçəklərin yanına apardım".

Şahid qismində dindirilən Sevda Quliyeva ifadəsində həyat yoldaşının həyətdə çətənə kolları əkməsindən xəbərsiz olduğunu deyib: "Günorta saatlarında darvaza döyüldü, Fuad açdı. Polislərdən birinin əlində videokamera var idi, çəkiliş apardılar. Onların nəyə görə həyətimizə gəldiklərini və çəkiliş apardıqlarını başa düşmədim. Polislər həyətə baxış keçirdikdən sonra Fuadı da özləri ilə Siyəzən Rayon Polis Şöbəsinə apardılar. Fuadın həyətdəki yarımçıq tikilidə narkotik bitkilər becərməsindən məlumatım olmayıb. Onun narkotik istifadəçisi olduğunu da bilməmişəm. Ümumiyyətlə, heç vaxt mənim yanımda belə söhbət etməyib".

Məhkəmənin hökmü ilə Fuad Quliyev cəzasını ümumi rejimli cəzaçəkmə müəssisəsində çəkməklə 3 il müddətinə azadlıqdan məhrum edilib.

ŞƏRH YAZ
0

Türkiyəli iş adamı Azərbaycan yol polisindən görün nə yazdı — FOTO

Türkiyəli iş adamı Azərbaycan yol polisindən görün nə yazdı
23:35
15.12.2019
4926
Ölkə
A
Azərbaycanda yaşayan Türkiyəli iş adamı Yusuf Ziya Dəmir yol polisinə təşəkkür edib.

"Ölkə.Az" “avtosfer.az”a istinadən xəbər verir ki, bu barədə o, öz “Facebook” hesabında yazıb. Yusuf bəy deyir ki, Bakıdan İsmayıllı-Gəncə-Qazax istiqamətində səyahət edərkən çətin anlar yaşayıb.

“İsmayıllıda bir az qar var idi, havanın temperaturu -1 dərəcəydi, axşam 23.00-a yaxın idi. Maşınımın təkəri boşalmışdı. Ehtiyat təkəri dəyişmək istəyirdim.

Bu zaman qan təzyiqimin yüksəldiyini hiss etdim və bir az düşməyini gözlədim. Həmin baxt ərazidə xidmət aparan bir yol polisi mənə yaxınlaşıb problemin nə olduğunu soruşdu.

Təkəri dəyişdirməli olduğumu, amma təzyiqim olduğu üçün dəyişə bilməyəcəyimi dedim. Yol polisi təkəri dəyişdirməyimə kömək etdi.

Hətta məni xəstəxanaya aparmaq istədi, amma özüm gedəcəyimi söylədim və həmin polis qardaşımın telefon nömrəsi, adı və soyadı qeyd eddim. Təşəkkür edərək yolumda davam etdim”.

28 ildir Azərbaycanda yaşadığını bildirən Ziya bəy hər gün hər şeyin yaxşılaşdığını, insanların rifahının yüksəldiyini, psixoloji və sosioloji baxımdan daim müsbət inkişafların müşahidə edildiyini gördüyünü bildirib.

“Yol polislərinin vətəndaşa qarşı davranışı çox müsbətdir. Azərbaycanı hər gün irəli aparan siyasəti həyata keçirmək əzmində olan Prezidentimiz İlham Əliyevə, Daxili İşlər naziri Vilayət Eyvazov və DYP rəisi Ramiz Zeynalova xüsusilə təşəkkür edirəm”.

ŞƏRH YAZ
0
BAĞLA