“Mədəniyyət” kanalının efirində saxta “Böyük Ermənistan” xəritəsini yayımlayan şəxs cəzalandırıldı

“Mədəniyyət” kanalının efirində saxta “Böyük Ermənistan” xəritəsini yayımlayan şəxs cəzalandırıldı
17:54
17.08.2018
23741
Siyasət
A
“Mədəniyyət” kanalında yayımlanan “Keçmişdən Gələcəyə” televiziya verilişinin aparıcısı, AMEA-nın Arxeologiya və Etnoqrafiya İnstitutunun baş elmi işçisi və tarix elmlər doktoru Güllü Yoloğlu sözügedən verilişində saxta “Böyük Ermənistan” xəritəsinin kadr arxası efirə verilməsinin səbəblərini açıqlayıb.

Teleaparıcı Güllü Yoloğlu "Ölkə.Az"a açıqlamasında bildirib ki, verilişində saxta “Böyük Ermənistan” xəritəsinin kadr arxası efirə verilməsi bilavasitə rejissor səhvi olub. 

O, sözügedən veriliş rejissoru Davud Mikayıllının proqramdan uzaqlaşdırılaraq cəzalandırıldığını söyləyib:

"Bu barədə mətbuatda yazılmamışdan öncə biz məsələni araşdırdıq, rejjisorun izahatını aldıq və Davud Mikayıllıya lazımı cəza verildi. Əslində, Davud Mikayıllı başqa verilişin rejissoru idi. Verilişin rejissoru məzuniyyətdə olduğu üçün Davud Mikayıllı onu əvəz edib. Biz Davuda çıxışçılarla bərabər kifayət qədər material vermişdik. Natiq Alışov 100-ə qədər foto və video materialları vermişdi. Bunlar kifayət edirdi ki, “Keçmişdən Gələcəyə” verilişi yaxşı alınsın. Mənim efirdə danışığımda və ya çıxış edənlərin fikirlərində heç bir nöqsan olmayıb. Sadəcə olaraq həmin verilişə rejissorluq etmiş Davud Mikayıllı nəyə görəsə internetdən "Böyük Ermənistan" yazılmış foto-xəritəni taparaq efirə verib. Halbuki, ona bütün xəritə və digər foto materiallar əvvəlcədən verilmişdi. Çox vaxtı isə heç materialı biz də vermirdik. Sonra biz ondan izahat tələb edirik ki, axı nə üçün bunu etmisən? Rejissor quzu kimi dayanıb üzümüzə baxır, heçnə demir. Soruşursan ki, Davud nə üçün belə etmisən? Deyir ki, internetdən "Albaniya" yazıb bu fotonu tapmışam, üzərində yazılan "Böyük Ermənistan" sözünə diqqət etməmişəm və sairə. Həmin xəritə ümumiyyətlə o verilişdə lazım deyildi". 

Teleaparıcı sözügedən məsələdə heç bir məsuliyyət daşımadığını deyib:

"Mən rejissora nə xəritə, nə də digər material verilməsini tapşırmamışam. Ümumiyyətlə bizim o verilişdə xəritə göstərmək fikrimiz olmayıb. Rejissora əvvəlcədən kifayət qədər də material verilmişdi. Mənə elə gəlir ki, Davud Mikayıllı məqsədli şəkildə bunu etməyib. Sadəcə düşünüb ki, mən də bir iş görüm deyə, internetdən xəritə axtarıb üzərində yazılan sözləri oxumadan efirə verib. Yəni, mən bunun məqsədli şəkildə edildiyini düşünmürəm. Davud Mikayıllı elə adamdır ki, o heç zaman siyasətə qarışan deyil, siyasi partiyalardan xəbəri yoxdur. İnandırım ki, başını aşağı salıb sakitcə işləyən və ailəsinə çörəkpulu aparan adamdır. Ola bilər ki, Davud Mikayıllı qanmazlığından bunu edib. Bəlkə də fikirləşib ki, mən də rejissoram, mənim də nə isə işim olsun. Nəticədə də qaş düzəltdiyi yerdə vurub göz çıxarıb. İndi də onu danlayırsan, izahat istəyirsən, adamın üzünə quzu kimi baxıb lal dayanır. Adam da qalır ki, buna necə cəza versin. Axı nə edək ona? Adamın iki körpə uşağı var, biri isə bu yaxınlarda doğulub. Ümumiyyətlə, işdən çıxarılsa bu nə qədər düzgün olar? Digər tərəfdən isə onu işdən çıxartmaq mənim səlahiyyətimdə deyil. Rəhbərlik də belə qərar verib onu cəzalandırıb. Artıq o, verilişdən tam kənarlaşdırılıb".

 

Vasif Həsənli
Ölkə.Az

ŞƏRH YAZ
1

BMT-nin parlament dinləmələrində Dağlıq Qarabağ münaqişəsini qaldırılıb

BMT-nin parlament dinləmələrində Dağlıq Qarabağ münaqişəsini qaldırılıb
21:23
23.02.2019
1687
Siyasət
A
Milli Məclisin deputatları Şahin İsmayılov və Kamran Bayramov Birləşmiş Millətlər Təşkilatının (BMT) və Parlamentlərarası İttifaqın (PAİ) birgə təşkilatçılığı ilə BMT-nin Nyu-York şəhərindəki baş qərargahında “Multilateralizmə qarşı yaranan problemlərə parlamentlərin cavabı” mövzusunda keçirilən illik parlament dinləmələrində iştirak ediblər.

“Ölkə.Az”ın “Report”a istinadən məlumatına görə, dünyanın 60 ölkəsindən 200-dən artıq parlament üzvünün, habelə BMT-nin yüksək vəzifəli şəxslərinin və ekspertlərinin iştirak etdiyi dinləmələrdə multilateralizm qarşısında duran problemlər, onların həlli yolları və bu istiqamətdə milli parlamentlərin rolu sahəsində geniş müzakirələr aparılıb.

Dinləmələr BMT Baş Assambleyasının 73-cü sessiyasının prezidenti Maria Fernanda Espinoza Qarsesin və PAİ-nin prezidenti Qabriela Kuevas Barronun giriş nitqləri ilə başlayıb, tədbirdə xüsusi qonaq qismində iştirak edən BMT-nin baş katibi Antonio Qutereş çıxış edib. Sonra dinləmələr panel müzakirələri ilə davam etdirilib. BMT-nin baş katibi müasir dönəmdə qloballaşan dünyada multilateralizm sisteminin artıq fərqli olduğunu, bu baxımdan BMT-nin və onun ixtisaslaşdırılmış qurumlarının fəaliyyətinin təkmilləşdirilməsinin və bu sahədə əsaslı islahatların həyata keçirilməsinin vacibliyini bildirib.

Tədbirin panel müzakirələri çərçivəsində bir sıra məsələlər, o cümlədən multilateralizmin qlobal və milli ölçülərdə əhəmiyyəti, onun təşviqində parlamentlərin rolu və maliyyələşdirilməsində mövcud olan boşluqlar, BMT-nin münaqişələrin qarşısının alınması, nizama salınması və sülhməramlı fəaliyyətinin səmərəliliyinin artırılması, bununla bağlı təşkilatın Baş Assambleyasının fəaliyyətinin canlandırılması, Təhlükəsizlik Şurasında islahatların həyata keçirilməsi üzrə geniş fikir mübadiləsi aparılıb, çoxsaylı çıxışlar edilib.

Panel müzakirələrində çıxış edən Milli Məclisin deputatları BMT-nin fəaliyyətinin gücləndirilməsi, dünyada nüfuzunun artırılması məqsədilə təşkilatın nizamnaməsində nəzərdə tutulmuş bütün məqsəd və prinsiplərə, xüsusilə də dövlətlərin ərazi bütövlüyü, suverenliyi, beynəlxalq səviyyədə tanınmış sərhədlərinin toxunulmazlığı prinsiplərinə bütün üzv-dövlətlər tərəfindən ciddi əməl olunmasının zəruriliyini vurğulayıb, təşkilatın Təhlükəsizlik Şurasının qətnamələrinin dərhal və qeyd-şərtsiz yerinə yetirilməsi üzrə üzv-dövlətlərin öhdəliklərinin icrasının əhəmiyyətini qeyd ediblər.

Deputatlar həmçinin tədbir iştirakçılarının diqqətini Ermənistan-Azərbaycan Dağlıq Qarabağ münaqişəsinə, Ermənistan tərəfindən torpaqlarımızın işğalına, bir milyon soydaşımızın qaçqın və məcburi köçkün vəziyyətinə düşməsi faktına cəlb edərək, işğal olunmuş Azərbaycan ərazilərindən işğalçı qüvvələrin tam, dərhal və qeyd-şərtsiz çıxarılmasını tələb edən BMT Təhlükəsizlik Şurasının 4 qətnaməsinin 26 ildən artıqdır ki, Ermənistan tərəfındən icra olunmadığını xüsusi vurğulayıblar. Bununla əlaqədar Milli Məclisin deputatları BMT strukturunda həyata keçiriləcək islahatlar çərçivəsində Təhlükəsizlik Şurasının qətnamələrinin icrası mexanizminin təkmilləşdirilməsi, həmin sənədlərin icrasından imtina edən və ya yayınan üzv-dövlətlərə qarşı sərt cəza tədbirlərinin, o cümlədən ciddi sanksiyaların tətbiq edilməsi təklifi ilə çıxış ediblər.

Dinləmələrdə həmçinin BMT-də və üzv-dövlətlərdə gender bərabərliyi, kütləvi informasiya və kommunikasiya vasitələrinin müasir multilateralizm sisteminə təsiri və digər mövzular ətrafında da müzakirələr aparılıb.

Tədbirdə Azərbaycan Respublikasının BMT yanında daimi nümayəndəliyinin əməkdaşları da iştirak edib.

Ölkə.Az

ŞƏRH YAZ
0

Brüsseldə Ümumavropa Qarabağ mitinqi keçiriləcək — VİDEO

Brüsseldə Ümumavropa Qarabağ mitinqi keçiriləcək
16:06
23.02.2019
2493
Siyasət
A
Diasporla İş üzrə Dövlət Komitəsi dünya azərbaycanlılarına müraciət edib.

"Ölkə.Az" bildirir ki, müraciətdə deyilir:

“Əziz həmvətənlər, dəyərli soydaşlar!

Azərbaycan xalqı hər zaman ümummilli məsələlərdə birlik və bərabərlik nümayiş etdirib. Xaricdə yaşayan soydaşlarımız Azərbaycanın haqq səsinin dünyaya çatdırılmasında daim fəallıq göstərərək Azərbaycanı narahat edən problemlərə biganə qalmayıblar. 

Hər birimizə məlum olduğu kimi, Xocalı soyqırımının 27-ci ildönümü ərəfəsindəyik. Bununla əlaqədar olaraq, dünyanın müxtəlif ölkələrində fəaliyyət göstərən Azərbaycan diaspor təşkilatlarının təşəbbüsü ilə 23 fevralda, yerli vaxtla saat 14:00-da Avropanın siyasi mərkəzi olan Brüsseldə Ümumavropa Qarabağ mitinqi keçiriləcək.

Mitinq zamanı yüzlərlə soydaşımız “Azərbaycan sülh istəyir!”, “Qarabağa geri qayıtmaq istəyirik!” “Xocalıya ədalət!”, “Dilqəm və Şahbaza azadlıq!” şüarları ilə Avropa Parlamentinə və digər nüfuzlu beynəlxalq təşkilatlara çağırış edəcəklər.

Əziz soydaşlarımız, Sizləri mitinqdə fəal olmağa, haqq səsimizin beynəlxalq aləmə çatdırılmasında aktiv iştirak etməyə çağırırıq. 

Dəyərli həmvətənlərimiz, bu, həm Xocalı soyqırımı qurbanlarının, həm də şəhidlərimizin müqəddəs ruhları qarşısında mənəvi borcumuzdur”.

Ölkə.Az

ŞƏRH YAZ
1
BAĞLA