Mətn ölçüsü:
  • 100%

"Mədəniyyət Nazirliyindən Ağakişi Kazımovun səhhəti ilə maraqlanan olmayıb"

Bir müddətdir ki, Xalq artisti Ağakişi Kazımov insult keçirərək xəstəxanaya yerləşdirilib.

"Ölkə.Az"-ın əməkdaşı xəstəxanada olan sənətkarın vəziyyəti ilə maraqlanıb. A.Kazımovun həyat yoldaşı Əməkdar aktrisa Mehriban Abdullayeva  bildirib ki, hazırda Xalq artistinin vəziyyəti stabildir:

“Bu gün həkimlərin məsləhəti ilə xəstəxanadan çıxırıq. Gəldiyimiz gündəki vəziyyətinə nəzər salsaq, hazırda səhhətində bir balaca irəliləyiş var. Ancaq buna baxmayaraq, o, mütləq daim həkim nəzarəti altında olmalıdır. Bu, uzun müddət müalicə tələb edən xəstəlikdir”.

M. Abdullayeva Xalq artistinin səhhətində noyabr ayından problemlər yarandığını deyib.

“Noyabrın 28-dən vəziyyəti dəyişməyə başladı. 13 dekabra qədər gündən-günə pisləşməyə başladı. Dərhal təcili yardım çağırdım,onu Mərkəzi Kliniki xəstəxanaya yerləşdirdik. Düz yarım ay burada müalicə aldı. Dekabrın 30-u xəstəxanadan çıxdıq. Ancaq evdə 2 gün qala bildik. Yenidən vəziyyəti ağırlaşmağa başladı. Yanvarın 1-i  vəziyyəti yenidən ağırlaşdı, dərhal təcili yardım çağırıb və onu Əjdər Məlikov adına 6 saylı Birləşmiş şəhər xəstəxanasının reanimasiya şöbəsinə yerləşdirdik”.

Əməkdaşımızla söhbətində  Mehriban xanım sənət dostlarının Kazımovu tək buraxmadığını da söyləyib.

“Sağ olsunlar, bizi tək buraxmırlar. Eşidən-bilən imkan tapan kimi onu yoluxmağa gəlirdi. Gələ bilməyənlər zəng vurub, xəbər göndərirdilər. Dərs dediyi tələbələri, Gənc Tamaşaçılar Teatrının aktyorları hamısı gəlirdi. Ağakişi müəllim onları yanında görəndə, ürəyi açılırdı. 

Hacı İsmayılovu görəndə uşaq kimi sevindi, neçə vaxt idi onu görmək istəyirdi.

Buradan hamısına "çox sağ ol", deyirəm”,- deyə aktrisa bütün ziyarətçilərə təşəkkürünü də bildirib.

M. Abdullayeva müalicə xərclərinin bir hissəsinin Teatr Xadimlər İttifaqı (TXİ) tərəfindən ödənildiyini də deyib.

“Müalicə üçün TXİ tərəfindən müəyyən məbləğ ödənildi. Mən indiyə qədər maddi olaraq heç kəsə müraciət edib, kömək istəməmişəm. Bilirsiniz necədir, əsas maddi tərəf deyil, hazırda Ağakişi müəllim üçün mənəvi dayaq daha önəmlidir. Mən bu neçə gündə görürəm ki, yanına gəlib-gedən olanda daha da fərəhlənir ki, onların yadından çıxmayıb. Bilirsiniz, bu onu necə sevindirir”.

Əməkdaşımızın “Mədəniyyət Nazirliyindən Xalq artistinin səhhəti ilə heç maraqlanan oldumu?” sualına Mehriban xanım: 

“ Yox! Nazirlikdən bu günə qədər mənə zəng edən olmayıb. Mən dəqiq deyə bilmərəm, bəlkə xəbərləri yoxdur. Ancaq hələ ki, nə maraqlanan, nə də məndən nə isə soruşan olub”, - deyə aktrisa cavab verib.

Söhbət maddi vəziyyətdən düşdükdə, aktrisa bildirib ki, Mərkəzi Kliniki xəstəxanada Ağakişi müəllimin müalicəsinə gözləmədiyi halda böyük məbləğ ödəyib.

“Onu deyim ki, Mərkəzi Klinik Xəstəxanada bizdən böyük məbləğ tələb etdilər. Ancaq bildirim ki, orada yatdığı müddət ərzində Ağakişi müəllimin səhhətində heç bir irəliləyiş olmayıb. Demək olar ki, o xəstəxanada olunan müalicənin, dava- dərmanın ona heç bir xeyri dəymədi. İnanın, o müddət heç onun yadında qalmayıb. Lakin mən məcbur qalaraq, o məbləğı ora ödəməli oldum. Bura - Binəqədi xəstəxanasına yerləşdirildikdən sonra səhhətində irəliləyiş müşahidə etməyə başladım. Bir müddətdən sonra danışmağa, hərəkət etməyə başladı”.

Söhbət əsnasında A.Kazmovun övladları və qohumlarından kimlərin onun yanına gəldiyi ilə də maraqlandıq.

“Bakıda Ağakişi müəllimin yalnız oğlu yaşayır. O da hər zaman yanında olub. Bundan başqa rayondan qardaşı, bacısı, onların uşaqları hamısı maraqlanıb, yanına da gəliblər. Kim eşidib, hamısı yanımızda olub. Bilirsiniz, mən axı, heç kəsə xəbər etməmişəm. Gəlib-gedənlər sosail şəbəkədə foto paylaşıb, yazıblar. Ondan sonra xəbər yayılıb”,- deyə aktrisa bildirib.

Qeyd edək ki, bir müddət əvvəl Xalq artisti Ağakişi Kazımov insult keçirərək xəstəxanaya yerləşdirilib.

Vüsalə Balayeva
Ölkə.Az