“Məqsəd iki ölkə arasında münaqişə yaratmaq idi”
Bunu “Ölkə.Az”a açıqlamasında millət vəkili Fəzail İbrahimli deyib.
Onun sözlərinə görə, biz ilk olaraq baş verən təxribatın mahiyyətini dərk etməliyik.
“Biz bu hadisədə Azərbaycan əsgərinə qarşı edilən hərəkət zamanı onun atəş açmaması və müqavimət göstərməməyə görə ittiham etməməliyik. Biz buna hər hansı sərhədpozucusuna qarşı qanunla tələb olunan addımın atılmaması kimi baxmamalıyıq. Məsələnin mahiyyətinə və bu təxribatın arxasında duran məqsədlərə baxmalıyıq. Məqsəd Gürcüstanla Azərbaycan arasında dövlət səviyyəsində münaqişə yaratmaqdır. Belə hallar dünyada olub. Misal üçün, Birinci dünya müharibəsinin başlanmasına Avstriya-Macarıstan taxt-tacının vəliəhdi hersoq Frans Ferdinandın 28 iyun 1914-cü ildə serb terrorçusu Qavri Prinsip tərəfindən Sarayevoda qətlə yetirilməsi bəhanə oldu. Hansı ki, müharibə gözlənilirdi. Bir tərəfdən Rusiya-Fransa-İngiltərə “Üçlər”, digər tərəfdə isə Almaniya-Avstriya-Macarstan (Antanta) bloku yaratmışdılar. Yaxud götürək İkinci Dünya müharibəsini… Hitlerin dünyanı işğal etmək planı var idi. Müharibəyə başlamaq üçünsə bəhanə lazım idi. Bunun üçün bir polyak dili bilən Alman zabitindən istifadə edildi. Həmin Alman zabiti polyak hərbi geyimində sərhəddi pozaraq Almaniya yaşayış məntəqəsinə hücum etdi. Bununla da İkinci Dünya müharibəsi başlandı. Bunu ona görə deyirəm ki, bizim üçün səbəb məlumdu. Bizə qarşı bir erməni düşmənçiliyi var. Azərbaycanda sabitliyi pozmaq üçün təxribat planı var. Məqsəd Azərbaycanın qonşu dövlətləri ilə problem və münaqişə yaratmaqdır”- millət vəkili bildirib.
F.İbrahimli əlavə edib ki, ermənilər “Keşikçidağ” məbədindən bir bəhanə kimi isifadə etməklə Azərbaycanla Gürcüstan arasında dövlət səviyyəsində münaqişə yaratmaq istəyirlər.
“Ancaq əsgərimizin, Azərbaycan tərəfinin səbrli mövqeyi nəticəsində dövlətlərarası münasibətləri xələl gətirilməsi istiqamətində həyata keçirilən təxribat baş tutmadı və bunun qarşı alındı.
Bir çoxları Azərbaycan əsgərini qınayır ki, niyə müqavimət göstərib, qarşı tərəfə layiqli cavab vermədi. Lakin əsgər də əmrə tabe olan şəxsdir. Əmr verilmədən özbaşına nə atəş aça bilərdi, nə də digər addım… Bunu acizlik kimi dəyərləndirmək düz yanaşma deyil. Əksinə, Azərbaycan əsgəri burada intizama tabe olduğunu nümayiş etdirdi. Çünki qarşı tərəf münaqişəyə hazır vəziyyətdə gəlmişdi. Onlar üçün əsas məqsəd törətdikləri təxribatın münaqişəyə çevrilməsi idi”, - deputat bildirib.
Azərbaycanla Gürcüstan arasında çox yüksək səviyyədə münasibətlərin təkcə gürcü cəmiyyəti deyil, bütün dünyanın bildiyini qeyd edən F.İbrahimli bildirib ki, Azərbaycan Gürcüstanın ən ağır günlərində qonşuluq haqqını yerinə yetirərək, onlara dayaq olub:
“Gürcüstan Rusiya tərəfindən boğulanda on dəstək verən, dayaq olan, yardım edən Azərbaycan olub. Məhz Azərbaycanın dəstəyi nəticəsində Gürcüstan yaşadı.Ona görə də Gürcüstan dövləti və xalqı minnətdar olmalıdır. Biz qonşuluqda da düz olmuşuq”.
Deputat qeyd edib ki, ona görə də iki ölkə arasında bu münasibətləri pozmaq istəyən qüvvələr var:
“Bunu Gürcüstanda yaşayan ermənilər və digər qüvvələrdir. Bu cür təxribatlarla iki ölkə arasındakı münasibətləri korlamaqdır. Ancaq Azərbaycan hökuməti baş verən proseslərin fərqində olduğundan təmkinlə davranır və məsələni danışıqlar yolu ilə həll etməyə çalışır. O baxımdan da burada udan və ya uduzan tərəf yoxdur”.
F.İbrahimli sonda onu da əlavə edib ki, Azərbaycan daxilində də bu proseslərdən öz məqsədləri üçün istifadə etməyə çalışan qüvvələr var: “Onlar hər xirda hadisədən öm məqsədləri üçün faydalanmağa çalışır. Son olaraq onu deyim ki, biz bu hadisəni erməni təxribatının baş tutmaması kimi dəyərləndirməliyik”.
Mürtəza
Ölkə.Az
