Meyxanaçılar Vahid Qədim barədə:" Üç ildir ki..."

Həmkarları barəsində axtarış elan olunmuş tanınmış meyxanaçı Vahid Qədim barədə Ölkə.Az-a danışıblar.

Meyxana aləminin ağsaqqalı kimi qəbul olunan Ağamirzə bildirib ki, Vahid Qədim üç ildir Bakıda yoxdur:

"Vahidlə bağlı hələ heç nə məlum deyil. Son zamanlar onunla heç bir əlaqəm olmayıb. Vahid üç ildir Bakıda deyil. İnsan kimi yaxşı insan olub".

Digər tanınmış meyxanaçı Mehman Əhmədli isə hesab edib ki, Vahid Qədimə cinayət işinin açılması əbəs deyil

"Vahid üç ildir nəinki Bakıda, ümumiyyətlə, Azərbaycanda yoxdur". Pis çıxmasın, əgər bu maddə ilə iş qaldırılıbsa, bunun üstünə şər atmırlar ki. Yəqin nəsə var da. Ola bilər ki, bir az da camaat şişirdilir. Əgər axtarış verilibsə, elə-belə deyil ki. Bəlkə bir anlaşılmazlıq da var və gəlib sübut edəcək. Biz bunu çoxdan bilirdik. Sadəcə mətbuatda təzəlikcə yayılıb. Hamımız yox, bütün aləm bilirdi. Sadəcə mediaya yeni çatıb".

Bədihəçi Namiq Məna isə Vahid Qədim haqda bunları deyib:

"Vahid Qədimlə uzun müddətdir rastlaşmırıq. Bəlkə də üç ildən artıqdır. Mən də onunla bağlı müəyyən şeylər eşidirəm. Vahid istedadlı oğlandır, bizim dövrün yaxşı meyxana deyənlərindəndir, sənətkardır. Ancaq bu məsələ ilə bağlı heç nə deyə bilmərəm".

Xatırladırıq ki, Vahid Qədim barəsində (Səfərov Vahid Ağabala oğlu) Cinayət Məcəlləsinin 178-ci maddəsi ilə cinayət işi başlanılıb. Bakı Şəhər Baş Polis İdarəsinin saytında bu barədə qeyd olunub.

Qeyd edək ki, sözügedən maddə ilə 12 ilədək həbs cəzası nəzərdə tutulur.

Xatırladaq ki, məşhur meyxanaçı 1973-cü ildə Bakıda anadan olub. O, müasir Azərbaycan meyxanasının ən tanınmış simalarından hesab olunur.

İntiqam VALEHOĞLU
Ölkə.az