Rafael Cəbrayılov: \"Cəzanı sərtləşdirmək çıxış yolu deyil.\"

Bunu “Ölkə.Az”a açıqlamasında millət vəkili Rafael Cəbrayılov deyib.

Onun sözlərinə görə, tətbiq edilən inzibati tənbeh tədbiri və cəza törədilmiş inzibati xəta və cinayətin ictimai təhlükəlilik dərəcəsinə uyğun olmalıdır.

“İnzibati tənbeh və cəzanın ifrat dərəcədə sərtləşdirilməsi nəinki heç bir səmərə verməz, habelə, əks təsir göstərər. Bu hal alimentlə bağlı məhkəmə qərarlarının icrasına da aiddir. Alimenti ödəməyə maddi imkanı olmayan, işləməyən şəxsin barəsində daha sərt hüquqi tədbirlər görülsə də müsbət nəticə əldə olunmayacaq. İfrat dərəcədə hüquqi təzyiq bu şəxsi yeni cinayət törətməyə (məsələn, oğurluq) sövq edə bilər. Sözsüz ki, o bu borcunu nə vaxtsa ödəyə biləcək. Amma uşaq üçün zəruri olan həmin alimenti ondan dərhal almaq mümkün olmayacaq. Uşağın gündəlik məişət problemləri, təhsili, tərbiyəsi, inkişafı isə gözləmir. Aliment uşağa vaxtında verilməlidir. Bunun üçün Dövlət Aliment Fondu yaradılmalı və həmin məbləğ vaxtında uşağa ödənilməli, sonra isə Aliment Fondu tərəfindən bu məbləğ reqres iddia qaydasında cavabdehdən alınaraq fonda bərpa edilməlidir. Söhbət bir və ya bir neçə uşağın hüquqlarının qorunmasından getmir. Nəzərə alsaq ki, son vaxtlar boşanmalar və buna uyğun olaraq da valideynlərinin biri ilə (adətən anası ilə) yaşayan uşaqların sayı çox artıb, onda məsələnin ciddiliyini daha aydın təsəvvür edə bilərik”,- millət vəkili qeyd edib.

Millət vəkili əlavə edib ki, on minlərlə uşağın sağlam böyüməsi, normal qidalanması, tərbiyə və təhsil alması, layiqli vətəndaş olması üçün aliment vaxtında ödənilməlidir: 

“Onu da nəzərə almalıyıq ki, valideynlərindən biri ilə yaşayan uşaqlar “mənəvi natamamlıq sindromu”nu yaşamağa məhkumdurlar. Bu baxımdan da dövlət bu uşaqlara dəstək olmalıdır. Onu da qeyd etmək istərdim ki, boşanmaların sayı sürətlə artmaqda davam edir. 2018-ci ildə boşanmaların sayı rekord həddə çataraq 14857 olmuşdur. Bu ilin ilk 3 ayı ərzində 3972 boşanma qeydə alınmışdır ki, bu da aliment alan uşaqların sayı barədə təsəvvür yaradır. Bu uşaqların sayının çoxluğu alimentlə bağlı məsələnin nizama salınmasının vacibliyini daha da qabardır. Bir daha vurğulamaq istərdim ki, qanunsuzluğa qarşı mübarizə sahəsində də işlək mexanizmlər olmalıdır ki, cəzaları sərtləşdirmədən müsbət nəticələrə nail olmaq mümkün olsun. Sayı on minlərlə olan bu uşaqların hüquqlarının səmərəli şəkildə qorunmasi dolayısı ilə cəmiyyətimizin və xalqımızın mənafelərinin qorunması olar. Çünki, onlar xalqın sabahı və genefondunun daşıyıcılarıdır”.

Mürtəza
Ölkə.Az