Millət vəkilləri daun sindromlu uşaqların Novruz şənliyində

 Bu barədə “Ölkə.Az”-a deputat İqbal Məmmədov məlumat verib.

Onun sözlərinə görə, tədbirdə Milli Məclisin Əmək və Sosial komitəsinin sədri Hadı Rəcəbli, deputatlardan Sədaqət Vəliyeva, İqbal Məmmədov və digərləri iştirak edirdi.

“Tədbirdə mərkəzin himayəsində olan uşaqlar tərəfindən şeirlər söyləndi, müxtəlif rəqslər və mahnılar ifa edildi. Bu uşaqlar dünyanın ən günahsız, ən məsum, ən təmiz varlıqlarıdır. Bu balaların hər kəsdən daha çox diqqətə və qayğıya ehtiyacı var. Biz millət vəkilləri də xalqımızın gözəl birlik, həmrəylik, yardımlaşma bayramı olan Novruz bayramında mərkəzdə məskunlaşan uşaqların bayramında iştirak etdik. Onlarla bir arada olub sevinclərinə şərik olduq. Axı onlar bizim sevincimiz və xoşbəxtliyimizdirlər” - deyə deputat İqbal Məmmədov bildirib.

İ.Məmmədov onu da əlavə edib ki, düzdür, bu istiqamətdə Heydər Əliyev Fondu olduqca təqdirəlayiq işlər həyata keçirib, keçirir və keçirməkdədir:

 “H.Əliyev Fondu buradakı uşaq və gəncləri daim diqqət mərkəzində saxlayır, onlara ailə qayğısı göstərir. Biz buna görə H.Əliyev Fonduna və onun rəhbərliyinə bu nəcib fəaliyyətinə görə təşəkkür edirik. Hesab edirəm ki, bu işlər və oradakı insanlara diqqət və qayğı təkcə H.Əliyev Fondunun fəaliyyəti ilə bitməməlidir. Hər bir vətəndaşımız bu körpə balalarımızdan öz sevgisini və mərhəmətini əsirgəməməlidir. Çətinliklər və əziyyətlərlə dolu olan dünyamızın bu təmiz ruhlara, gülüşlərə, məsumiyyətə ehtiyacı var. Əziz övladlarımıza xidmət üçün belə bir müəssisənin yaradılmasında, fəaliyyətində və belə gözəl tədbirlərin təşkilində əməyi keçən hər kəsə öz dərin minnətdarlığımı bildirirəm”.

Bakının Nizami rayonunda yerləşən “Qayğı” Uşaq Reabilitasiya Mərkəzi 1952-ci ildə inşa olunub. 2012-ci ildə bağçada yenidənqurma işlərinə başlanılıb. 2013-cü il mayın 3-də Heydər Əliyev Fondunun prezidenti Mehriban Əliyeva mərkəzin açılışında iştirak edib.

Mürtəza
Ölkə.Az