Milli Elmlər Akademiyasından qovulan alim məhkəməyə üz tutdu
“Ölkə.Az”ın məlumatına görə, Gözəlov Pərvin Fəxrəddin oğlunun şikayətində Milli Elmlər Akademiyasının Milli Azərbaycan Tarixi Müzeyi cavabdeh qismində tanınıb. P.Gözəlov məhkəməyə 05 yanvar 2017-ci il tarixli əmrin ləğv edilməsi, məcburi iş buraxma dövrü üzrə əmək haqqının ödənilməsi, işə bərpa olunması ilə bağlı iddia qaldırıb. Səbail Rayon Məhkəməsi alimin iddiasını təmin etməyib. Bakı Apellyasiya Məhkəməsində isə P.Gözəlovun məhkəməsinə hakim Xumar Mərdanova sədrlik edəcək.
Qeyd edək ki, tarix üzrə fəlsəfə doktoru Pərvin Gözəlov “Azərbaycan xanlıqlarının bayraqları dövlətçilik tarixinin öyrənilməsində mənbə kimi” mövzusunda tarix üzrə fəlsəfə doktoru dissertasiyasını müdafiə edib. O, bayraqşünaslıq üzrə ixtisaslaşmış ilk yeni nəsil Azərbaycan tarixçisidir. P.Gözəlov Beynəlxalq Heraldika Cəmiyyətində və bayraqşünaslıq tədqiqatçıları arasında tanınır və bu istiqamətdə aparılan tədqiqatların nəticələri məruzələrin mövzularında qeyd edilib.
