Mixeil Saakaşvilinin Ukraynaya qayıdışının arxasında nələr gizlənib?
Azərbaycanlı mütəxəssislər də məsələyə birmənalı yanaşmır. Politoloq Araz Əlizadə “Ölkə.Az”a açıqlamasında bildirib ki, Saakaşvilinin Ukraynaya qayıtmasında Qərbin əli var.
“Baş verənlərin hamısı Qərbin oyunudur. Onlar eyham vururlar ki, əgər prezident Proşenko olmasa, onda Saakaşvili olacaq. O da, Rusiya ilə münasibətdə daha sərt mövqe tutacaq. Lakin Saakaşvili ilə Proşenko bir bezin qırağıdırlar. Çünki Saakaşvili artıq bir dəfə Putinlə sövdələşməyə gedib. Odur ki, toplananların yerini dəyişəndə cəm dəyişmir”, - deyə A. Əlizadə bildirib.
Qardaşından fərqli olaraq, politoloq Zərdüşt Əlizadə düşünür ki, Saakaşvili Ukraynada prezident ola bilməz. Siyasətçi “Ölkə.Az”a açıqlamasında bildirib ki, Saakaşvili Ukrayna xalqının istəyilə qayıdıb və burada kənar qüvvənin təsiri yoxdur:
“Gürcüstanın eks-prezidenti, Odessa vilayətinin sabiq qubernatoru Mixeil Saakaşvili Ukraynada prezident, deputat ola bilməz. Çünki qanunlara görə, o Ukraynada doğulmalıydı. Saakaşvili Gürcüstanda anadan olub. Əgər onu deyildiyi kimi hakimiyyətə dəvət etsələr, baş nazir ola bilər. Nə qədər Proşenko prezidentdir, Saakaşvili Ukrayna hakimiyyətinə gələ bilməz. Çünki Proşenko rüşvətxor, oğru oliqarxların rəhbəridir. Rüşvətin düşməni olan, korrupsiya ilə gərgin mübarizə aparan adamın Proşenko ilə birgə hakimiyyətdə olmaq şansı yoxdur. Ukrayna xalqı Saakaşvilini istəyirdi və onlar əsgərlərin xəttini yarıb keçdilər”.
Politoloq Oqtay Sadıqzadə də düşünür ki, Saakaşvilinin Ukraynaya qayıdışı daxili qüvvələrin istəyilə bağlıdır. Onun sözlərinə görə, Proşenko hakimiyyəti “laxlayarsa”, bu zaman Ukraynanın yeni rəhbəri Saakaşvili ola bilər:
“Bu Ukraynanın daxili məsələsidir. Saakaşvilinin qayıdışı Ukraynada hakimiyyət uğrunda mübarizənin kəskinləşməsindən xəbər verir. Oliqarxların Kiyevə qarşı mübarizəsi başlayıb. Böyük ehtimalla ola bilər ki, onların dəstəklədiyi Saakaşvilidir. Belə bir halda, ola bilər ki, Kiyevdə alt dövlətin elementlərini xatırladan müəyyən hərəkətlərin şahidi ola bilərik. Lakin bunun ən yüksək rəhbərlik forması almasına inanmıram. Eyni zamanda, Proşenko əleyhinə proseslər davam etsə, o zaman yeni siyasi sima axtarışında olacaqlar. Onda Saakaşvili onlara yaraya bilər. Çünki kifayət qədər təcrübəli siyasətçidir, həm Ukraynanın istədiyi kimi Rusiya əleyhinə mövqeyi var. Bu səbəbdən də, Ukraynada onun siyasti perespektivləri tam bitməyib”.
Ziya Səccad
Ölkə.Az