Moskva aeroportlarından Bakıya uçan təyyarə reysləri gecikəcəkmi?

“Ölkə.Az” xəbər verir ki, Domodedovo və Şeremetova aeroportlarında təxminən 30-dan çox uşuş ləğv edilib, 20-dən çox reys gecikib. Gecikən və təxirə salınan uçuşlar arasında Bakı reysinin olub olmadığını dəqiqləşdirmək üçün Heydər Əliyev Beynəlxalq Hava Limanı ilə əlaqə saxladıq.

Heydər Əliyev Beynəlxalq Hava Limanının informasiya şöbəsindən Ölkə.Az-a bildiriblər ki, Moskvadan Bakıya gələcək reyslərinin təxirə salınması barədə Moskvadan heç bir məlumat verilməyib.

“Moskvadan Bakıya gələcək reyslərinin təxirə salınması barədə heç bir xəbər verilməyib. Bu səbəbdən də, uçuşlar baş tutacaq. Bu gecə Domodedovo aeroportundan Bakıya gələcək təyyarə saat 03:25-də, Şeremetova Hava Limanından isə 04:10-da çatmalıdır”, - deyə məlumat verilib.

Qeyd edək ki, mayın 29-da Rusiya paytaxtı Mosvka şəhərində güclü qasırğa baş verib. Küləyin gücü saniyədə 22 metr olub. Təbii hadisə nəticəsində 11 nəfər ölüb, 50 insan yaralanıb. Qasırğa şəhərin infrastruktruna da ziyan vurub. 400-dən çox ağac aşıb, yol kənarındakı tikililərin damı uçub. Təbii hadisə aeroportların işini iflic edib. Moskva hava limanlarında 30-dan çox uçuş ləğv edilib.

Ziya Saccad
Ölkə.az