Murad Dadaşov: “Anar Məmmədxanovun ölümünü qəbul edə bilmirəm”

Ölkə.Az saytının qonağı əməkdar artist, tanınmış şoumen, aparıcı Murad Dadaşovdur.

- İlk öncə yeni filminiz olan “Bayram axşamı” filmindən başlayaq. 6 aya ərsəyə gələn filmə çox diqqətlə yanaşmanız və can yandırmağınız hiss olunur. Bu, həm də sizin ilk filminizdir.

- Şirkətimizin 16 yaşı tamam oldu və ən gözəl hədiyyəni özümüz özümüzə etdik. Mən əslində kinodan uzaq bir insanam. Səbəbi isə istehsal prosesinin ağır olmasıdır. Kinonu daha çox izləməyi sevirəm. Bu gün kinoya maraq artıb, yeni filmlərimiz işıq üzü görür. Bu çəkilən filmlər film bazarını inkişaf etdirir. Bizim filmlər xarici və türk filmləri ilə rəqabətə girir, bəzi hallarda hətta onları üstələyir. Bu film məni çox yordu. 6 ay vaxtımı aldı. Ən xırda detalına belə fikr vermişəm. Əvvəl planda olmasa da, amma sonra filmdə kiçik bir rol oynadım. Həmişə mənfi rol oynamaq istəmişəm. Hamı nədənsə məni komediya janrında görmək istəyir, amma mən bunu da sınamaq istəyirdim. Məncə alındı.

- Filmdən gözləntiləriniz nədir? Artıq son bir neçə ildir ki, kommersiya filmləri bazarda inkişaf edir. Sizin filmlə bərabər bir neçə iddialı film də təqdim olundu. Bu sizi qorxutmur ki?

- Bunun nəticəsini kassa göstərəcək. Təbii ki, ondan sonra deyə bilərik ki, film sevildi, ya yox. Mən filmlərə çox tənqidi yanaşıram. Yaradıcı heyət bu filmi mənə bəyəndirənə kimi çox əziyyət çəkib. Bir şeyi mənə bəyəndirmək çox çətindir. Bunu özüm üçün çəkmirəm ki, camaatımız üçün çəkirəm. Onlar da filmə bilet alır, niyə məsuliyyətsizlik edim? Biz komanda olaraq çalışırıq ki, hər işimiz keyfiyyətli olsun.

- Rəhbərlik etdiyiniz işçilərinizdən biri işinə məsuliyyətlə yanaşmazsa onu necə cəzalandırırsız, gözünüzü ağardırsınız?

- Çox tələbkar rəhbərəm. Bu yaxınlarda Walt Disney haqqında oxuyurdum. Dünyanın ən gözəl cizgi filmlərini yaradan bir şəxs ilk baxımdan xoş xasiyyət olsa da, həyatda çox qəddar biriymiş. Mən özümü onunla müqayisə etmirəm, çünki qəddar deyiləm. Məni hamı deyib-gülən adam kimi tanısa da, bir rəhbər olaraq mən işçilərimdən məsuliyyət və dəqiqlik tələb edirəm. Bir çoxları mənimlə əməkdaşlığa başlayarkən elə bilirlər ki, hər şey zarafatla olacaq. İlk növbədə mənim üçün işdir.

- Hal-hazırda xalqın böyük hissəsi türk istehsalı olan verilişlərə, əsasən seriallara baxır. Digər hissəsi isə rus məhsullarına. Sizcə telekanallarımızın bu vəziyyətinə səbəb nədir?

- Əminliklə deyirəm ki, Azərbaycan telekanalları böyük tamaşaçı itkisilə üzləşib. Bunun günahkarı təkcə telekanallar deyil. Bu gün keyfiyyətli bir iş ortaya çıxartmaq çox baha və çətindir. Azərbaycanda reklam büdcəsi aşağıdır. Telekanallar bizim kimi prodakşnlara müraciət edir və çox vaxt sponsurumuzu da özümüz tapırıq. Bu gün teleməkanda ən bahalı layihəni biz edirik – “Davam ya tamam”. Telekanallar böyük layihələr etməyə qorxur, həmin xərclərin altından çıxmayacağından ehtiyatlanır. Tamaşaçı da keyfiyyətli məhsul üçün başqa istiqamətə üz tutur.

Mənə elə gəlir ki, bunda hər kəsin günahı var. Televiziya ilə bağlı qərarlar qəbul edilməlidir. Bu vəziyyətdən çıxmaq üçün böyük bir araşdırma aparmaq lazımdır. Bəlkə dövlət səviyyəsində, bəlkə də media strukturlar səviyyəsində. Həmin tətqiqat nəticəsində isə bizim vahid televiziya yayım doktrinamız olacaq. Cənab prezidentimiz seriallarımızın inkişafı üçün böyük məbləğlər ayırdı. Artıq seriallarımız xalqı yavaş-yavaş başına toplamağa başlayır. Əminəm ki, bu nəticəni verilişlərdə də əldə etmək olar. Məncə, bütün televiziya rəhbərləri, media strukturları bir araya gəlməlidirlər. Oturub söhbət etməli, çıxış yollarını tapmalıyıq. İnanıram ki, bu labirintdən çıxacağıq.   

- Televiziyalarımızda çal-çağır tipli layihələr, palatka toyu formasında verilişlər hökm sürür. Sponsorlar da daha çox bu tip verilişlərə sərmayə qoyur.

- Nədənsə hamı düşünür ki, tamaşaçı bunu sevir, bu veriliş tutdu, buna pul yatıraq. O qədər bayağı verilişlər efir yayımı aldı ki, savadlı, mütaliyə edən, ziyalı insanlar efirlərdən “küsdü”. Onları qane edən verilişlər ya yayımlanmır, ya da çox az yayımlanır. İndi televiziyanın əsas izləyiciləri evdar qadınlardır. Mobil telefonlar, internet, kompüter televiziyanin ilkin mahiyyətini itirdi. O monitordur və orada nə istəsən göstərə bilərsən. Monitoru qoş “Youtube”da mahniya qulaq as, yaxud da oyun oyna və s. Biz dünyada məşhur olan “Davam ya tamam”ı Azərbaycana gətirdik. Hamı dedi ki, o qədər də populyar deyil. İnanın ki, bu şounun tamaşaçısı “bərk” tamaşaçıdır, qalıcıdır.

- Bir çox telelayihələrin və şouların aparıcısı, rəhbəri olmusunuz. “Davam ya tamam”a artıq ikinci dəfə “can” verdiniz. İlk dəfə uğursuzluğa düçar olması sizi qorxutmadı?

- Hətta eyni adla “Space Tv”də Mikayılın aparıcılığı ilə efirə çıxmışdı. Ad çox xoşuma gəlmişdi. Mikayıla özüm zəng edib verilişin adının halallığını aldım. Layihəni xaricilərlə işləyirik. Layihə 3 il ərzində bizim ofisdə müzakirə oldu. Maliyyə baxımından ona yaxın dura bilmirdik. “Endemol Shine” şirkəti ilə çalışmağa başladıq. Layihənin lisenziya haqqı çox yüksəkdir, tələbləri çoxdur. Düşünün ki, hər həftə otuz min manat oynanılır və bir nəfər də olsun şoudan əliboş getməyib. Hətta sizə bir sirr deyim, 2 nəfər ən böyük uduşu, otuz min manatı qazanıb. Çəkilişlər olub, amma hələ yayınlanmayıb.

- Həyatınızda dönüş nöqtəsi və yaxud da kuliminasiya nöqtəsi hansı olub?

- KVN-ə düşəndə. Oradakı uşaqlar mənim həyatımda izlər buraxıb. Anar Məmmədxanov, Timur və digərlərinin sayəsində püxtələşdim. KVN-dən televiziyaya gələndə dönüş nöqtəmi yaşadım. Mən düşünürdüm ki, KVN mənim həyatımda dönüş edib, amma televiziyaya gələndə gördüm yox. Bu belə deyil. Daha bir dönüş nöqtəm isə şirkət yaradanda oldu. Ən sonda isə daha bir dönüş nöqtəm 3 övladım olanda oldu. Artıq başa düşdüm ki, mən  auditoriya qarşısında məsuliyyət daşıyıram. Bir maraqlı əhvalat danışım sizə, bunu heç yerdə danşımamışam. “Maşın şou”nun tanıtım çarxını çəkmişdik. Bir az qrimlərdən istifadə edib, ulduzlardan qorxulu obrazlar yaratmışdıq. Sevinə-sevinə evə gəldim ailəlikcə açıb baxdıq. Yoldaşım ilk dəfə idi ki, mənim işimə rəy bildirib sevinclə bəyəndiyini bildirdi. Ailə üzvlərimiz də bəyəndi, amma gördüm ki, oğlum susub. Soruşdum, dedi ki, çox qorxdum. Mən qorxdumsa, digər uşaqlar da qorxacaq. Həmin sözlər qulağımda sırğa oldu və anladım ki, uşaqları da düşünmək lazımdır. Gedib qorxunc yerləri montajda çıxartdım. Başa düşdüm ki, hər yaş kateqoriyalarını nəzərə almalıyam.

- Sizi şoka salan xəbər hansı olub?

- Şokun mənfi və müsbət tərəfləri var. Mənfi tərəf yaxın dostlarımın dünyadan köçməsidir. Hələ də özümə gələ bilməmişəm. Anar Məmmədxanovun heyatdan getməsiylə barışa bilmirəm. Anarla bağlı həyatımda gözəl xatirələr var. Müsbət tərəf isə keçən il apreldə ordumuzun düşmən üzərində çaldığı zəfərlər oldu. Anar bunu eşitsəydi çox sevinərdi.

- Uzun müddətdir ki, aktyorluqdan kənardasınız. KVN-dən sonra sanki qeybə çəkildiniz. Sizi küsdürən nə oldu?

- Aktyorluqdan vaz keçməmişəm. Sadəcə daha böyük işlər görürəm. Şirkətimiz çoxşaxəlidir. Hamı məni yaxşı aparıcı kimi tanıyır. Amma mən yaxşı aparıcı deyiləm. Prodüserliyi aparıcılıqdan yaxşı bacarıram. Aparıcı kimi yox, prodüser kimi özümü bəyənirəm. Özümə qarşı tənqidi yanaşıram. Hərdən tez-tez danışıram, nitqimdə problemlərim olur və bu məni əsəbləşdirir. Özüm öz verilişimə baxmıram. O vaxt KVN-dən ayrılıb televiziyaya qədəm qoydum və uğurla addımladım. Daha sonra indiki KVN yarananda da məni dəvət etdilər getmədim. Amma bir tamaşaçı kimi gedib izləyirəm. Cabirlə çox yaxın dostuq. O, mənim qardaşımdır. Tahiri, Bəhramı, Cabiri, Azəri, Emili görəndə köhnə xatirələr, ürəyimdə xoş hislər oyanır. Etiraf etməliyəm ki, onlar bu gün formadadır, mən isə yox. Mən kadrarxası işçiyəm. Hər bir gözəl yuxunun sonu olduğu kimi bunun da sonu olmalı idi. KVN mənim üçün ən gözəl zirvələrdə bitdi. Bundan artıq neynəməliydik ki?!

- Bugünkü gündə KVN komandasına (red: Planet Parni iz Baku) televiziyalarımızda senzura qoyulub. Tahir İmanov da müsahibəsində bildirmişdi ki, bizi müxtəlif məmurlar sıxırlar, təzyiq göstərirlər. Bunun səbəbi nədir sizcə?

İnsanların ixtiyarına senzura deyilən bir anlayış buraxıldı. Halbuki, senzura ölçən aparat yoxdur. Bu dəqiqə telekanllarımızda elə verilişlər var ki, KVN-in elə-belə məşqi belə o verilişdən güclüdür. Düşünürəm ki, Tahirgilin tamaşalarına bəzi adamlar diqqətlə baxmır. Əgər diqqətlə baxılsaydı, senzura qoyulmazdı. O tamaşalara dövlət nümayəndələri, məmurlar və xalq gəlir. Senzura qoyulacaq nəsə olsaydı, əmin olun ki, sadaladığım şəxslər gəlməzdi. Onların tamaşalarında çox gülürəm, çox düşünürəm. İnanıram ki, yaxın zamanlarda hər şey yoluna düşəcək.

- Murad Dadaşov üzdə olan simadır. Ətrafınızda da yetəri qədər gözəl xanım var. Bunlar həyat yoldaşınızı qısqandırmır?

- Sevilirəm də neyniyim. (gülür) Səmimi etiraf edim ki, gözəl xanımlardan həmişə zövq alıram. Bilirsiz niyə az-az efirə çıxıram? Çünki özümü yaraşıqlı hesab etmirəm. Açıq etiraf edim ki, mən daxilən tənbəl adamam. İdmanla məşğul olmağı sevmirəm. Aparıcı yaraşıqlı, formada olmalıdır. Çalışıram ki, efirdə gözəl insanları göstərsinlər. Vallah-billah yaxşı, gözəl və bacarıqlı insan tapsaydım efirdən özüm çıxardım. Sadəcə “Maşın şou”nu məndən yaxşı heç kim apara bilməz. “Davam ya tamam”ı da məndən yaxşı bilən yoxdur. Mən bir vaxtlar çox məşhur olan “Mərc şou”nu bərpa edəcəm. Orada isə yeni aparıcılar olacaq.

- Artıq çəkidən əziyyət çəkirsiniz. Pəhrizlər bir işə yaramır? Hətta şirniyyat mağazanız da var və şirniyyat pəhrizin düşmənidir. Səhv etmirəmsə, mağazanızı da bir dəfə yarmışdılar.

- Çəki mənim yaralı yerimdir. İlıq su içirəm. Şirniyyatdan uzağam. Pəhrizlərə rəğmən arıqlaya bilmirəm. Alınmır ki, alınmır. Çox yeyən biri deyiləm. Səhərlər yemək yemirəm, axşamlar yediyim üçün nəticə göz önündədir. Şirniyyat mağazamızdan oğurluq edəndə içində heç nə yox idi. Ona görə oğurluq etməyə dəyməzdi. Oğru desəydi, vallah-billah özümüz qapını açardıq. Şüşənin və qapının ağzının dəyişdirilməsi ondan baha başa gəldi. Maket tortlardan birini və bir də telefon oğurlamışdılar.

- Monika Belucci fanatı idiniz deyəsən.

- Fanatı idim yox, hələ də fanatıyam. Hər zaman (gülür)

- Birbaşa əlaqəniz var idi?

- Vallah o vaxtlar onun üzündən evdə də qırğın düşdü. Smslər açılıb-töküldü. Mənə zəng vururdu, dedim ki, artıq bizdə olmaz, alınmaz. Gözlədim ərə getdi, sonra mətbuat üçün başqa açıqlama verdi ki, adımız bir çəkilməsin. (gülür)

- Görüşmək qismət olmayıb heç?

- Qismət olub təbii ki. Bakıda böyük bir butikin açılışına gəlmişdi. Ondan sonra isə birgə konsertdə olmuşuq. Uzaqdan dayanıb ona baxırdım. Sadəcə mən onu görürdüm, o, məni yox. (gülür) 

Niyam Şirinov
Fotolar: Nurlan Gülməmmədov