NATO rus nazirin təyyarəsinə yaxınlaşmağının səbəbini açıqladı

“Ölkə.Az" xəbər verir ki, NATO "F-16" qırıcısının Rusiya müdafiə nazirinin təyyarəsini müşayət etməsini təsdiqləyib. Verilən açıqlamada bildirilib ki, həqiqətən də, iyunun 21-də Baltik dənizi üzərində Rusiyanın 3 təyyarəsi uçuş edərkən NATO-ya məxsus "F-16" qırıcısı onları izləyib.

NATO-dan edilən açıqlamaya görə, uçuş edən təyyarələrin dispeçerə cavab verməyib.

“NATO bu gün Baltik dənizi üzərində 3 Rusiyaya məxsus təyyarənin izləndiyini təsdiq edir. Uçuş zamanı pilotlar özlərini təqdim etməyiblər və dispeçerə cavab verməyiblər. Bu səbəbdən də, NATO-ya məxsus qırıcılar havaya qaldırılıb. Bu ərazidə təhlükəsizliyi təmin etmək üçün standart bir prosesdir. Burada heç bir qanunsuz hərəkət yoxdur”, - deyə açıqlamada bildirilib.

Açıqlamada vurğulanıb ki, hərbi təyyarədə kimin uçması barədə əvvəlcədən NATO-da məlumat olmayıb.

Qeyd edək ki, bu gün Baltik dənizi üzərində NATO-ya məxsus "F-16" qırıcısı nazirin təyyarəsinə yaxınlaşmağa çalışmışdı. NATO-ya məxsus F-16 tipli qırıcı generalın təyyarəsinə yaxınlaşsa da, "Su-27" qırıcısı onu ərazidən uzaqlaşdırıb. NATO qırıcıları nazirin təyyarəsini Baltik dənizinin neytral sularında müşayət etmək istəyiblər. Qırıcılardan biri təyyarəyə yaxınlaşmaq istəyəndə "Su-27" qırıcısı araya girib. Rus qırıcısı qanadlarını tərpədərək atəş açacağına işarə edib. Bundan sonra "F-16" fırlanaraq ərazidən uzaqlaşıb. 

Xatırladaq ki, iki ölkə arasında ABŞ-ın Suriya rejiminə aid bir hərbi təyyarəni vurmasından sonra gərginlik artmışdı. Dünən isə rus qırıcısı ABŞ-a aid bir təyyarəyə 1.5 metrə qədər yaxınlaşmışdı.

Ziya Səccad
Ölkə.Az