Nazim İbrahimov dünya azərbaycanlılarına səsləndi — Azərbaycan əleyhinə informasiyalar erməni lobbisindən qaynaqlanır

Nazim İbrahimov dünya azərbaycanlılarına səsləndi
10:33
13.09.2017
73
Siyasət
A
“Azərbaycana qarşı son vaxtlar yenidən başlayan qarayaxma kampaniyasını aparan şəbəkənin erməni lobbisindən qaynaqlanması ilə bağlı ciddi faktlar mövcuddur”.

"Ölkə.Az" xəbər verir ki, bunu Azərbaycanın Diasporla İş üzrə Dövlət Komitəsinin sədri Nazim İbrahimov Avropa Azərbaycanlıları Konqresinin Kiyevdə keçirilən toplantı çərçivəsində APA-ya açıqlamasında bildirib.
 
O qeyd edib ki, hüquqi, demokratik dövlət olan Azərbaycanın sürətli inkişafı, müstəqil daxili və xarici siyasəti bir sıra qüvvələri ciddi narahat etməyə başlayıb: “Avropada və bəzi başqa ölkələrdə Azərbaycana qarşı təşkilatlanmış aqressiv, vahid mərkəzdən idarə olunan şəbəkə formalaşıb. Onlar Azərbaycan əleyhinə informasiyalara təkanverici qüvvə kimi çıxış edir. Həmin təşkilatlar erməni lobbisindən bəhrələnir”.
 
Onun sözlərinə görə, həmin qüvvələr çalışır ki, bütün metodlardan istifadə etməklə bu nüfuza ləkə gətirsin: “Bu, Azərbaycana qarşı, dövlətə qarşı davadır. Prezident İlham Əliyevin möhkəmləndirdiyi Azərbaycanı zədələmək niyyətindədirlər. Ümummilli lider vaxtında Azərbaycanı parçalanmadan xilas edərək vahid dövlət yaratdı, bu gün də prezident İlham Əliyev bunu davam etdirir. Bu da həmin qüvvələri qıcıqlandırır. Boşluqlar axtarılır. Necə ki, regiondakı bəzi ölkələrdə boşluq oldu və bundan istifadə etdilər. Nəticədə həmin ölkələr nə qədər itkilər verdi, biz bunun şahidiyik”.
 
N. İbrahimov bildirib ki, Azərbaycan haqqında birtərəfli və qərəzli informasiyanın yayılmasını təmin etmək məqsədilə ermənipərəstliyi şübhə doğurmayan müəlliflər tərəfindən məqalələrin dərc olunmasının arxasında maddi maraqlar da dayanır: “Bu baxımdan Mütəşəkkil Cinayətkarlıq və Korrupsiya Hesabatı layihəsinin və “Guardian” qəzetinin Azərbaycana, dövlətimizin nüfuzlu qurumlarına atdığı böhtanlar şantajdan başqa bir şey deyil. Xüsusilə qeyd etmək lazımdır ki, bu qarayaxmanı aparan həmin mətbu orqanların maddi maraqlar naminə gələcəkdə öz ölkələri əleyhinə də eyni addım atacaqları artıq şübhə doğurmur”.
 
Komitə sədri vurğulayıb ki, bir sıra qlobal layihələrin Azərbaycan tərəfindən həyata keçirilməsi ölkə üçün böyük əhəmiyyət daşıdığı qədər, bəzilərini də narahat edir: “Amma bu layihələr dövlətçiliyimizi qoruyacaq böyük elementlərin əldə olunmasına səbəb olacaq”.
 
N. İbrahimov dünya azərbaycanlılarını yaşadıqları ölkələrdə bu məsələdə daha da fəal olmağa, dövlətçilik ətrafında sıx birləşməyə çağırıb.
 

ŞƏRH YAZ
0

Azərbaycan daha bir beynəlxalq foruma ev sahibliyi edəcək

Azərbaycan daha bir beynəlxalq foruma ev sahibliyi edəcək
13:51
Bu gün
787
Siyasət
A
“Dünyada tibb assosiasiyaları forumları keçirilir. Belə forumlar 1984-cü ildən bu günə qədər təşkil olunur. Forumda əsasən, səhiyyədə qanunvericilik, icbari tibbi sığortanın formalaşdırılması, diplomdan sonrakı təhsil, ailə təbabəti və ilkin tibbi yardım göstərilməsi ilə bağlı məsələlər müzakirə olunur”.

"Ölkə.Az"ın Report-a istinadə xəbərinə görə, bunu Milli Məclisin Səhiyyə komitəsinin bu gün keçirilən iclasında komitə üzvü Rəşad Mahmudov deyib.

O xatırladıb ki, sonuncu belə forum ötən il İsraildə keçirilib.

R.Mahmudov bildirib ki, Azərbaycandakı müvafiq assosiasiyalar birləşərək həmin foruma müraciət ediblər. Bundan sonra 50 ölkənin səsverməsi ilə növbəti səhiyyə forumunun Azərbaycanda keçirilməsi üçün qərar qəbul edilib: “Beynəlxalq forumun bu il keçirilməsi nəzərdə tutulur. Forumun təşkilatçıları ölkəmizə gəlib lazımi görüşləri keçirdikdən sonra yekun qərarı verəcəklər. Bu forumun ölkəmizdə keçirilməsi səhiyyəmizin inkişafına öz töhfəsini verəcək”.

ŞƏRH YAZ
0

“Azərbaycana investisiya qoymaq istəyən xarici şirkətlər risklə qarşılaşmır” — Vahid Əhmədovdan Davos AÇIQLAMASI

“Azərbaycana investisiya qoymaq istəyən xarici şirkətlər risklə qarşılaşmır”
12:25
Bu gün
1770
Siyasət
A
Milli Məclisin deputatı Vahid Əhmədov prezident İlham Əliyevin bu gün Davosda işə başlayan 48-ci “Dünya İqtisadi Forumu”nda iştirakından danışıb.

V.Əhmədov “Ölkə.Az”-a açıqlamasında deyib ki, Azərbaycan aparıcı xarici investorlar üçün böyük maraq doğuran ölkələrdən biridir:

“Bunun da əsas səbəbi Azərbaycanın sabit və təhlükəsiz ölkə olmasıdır. Azərbaycana investisiya qoymaq istəyən xarici dövlətlər və şirkətlər risklə qarşılaşmır.  Cənab Prezident hər il Davos iqtisadi forumuna dəvət edilir və bu iştirak çox maraqla qarşılanır. Bu gün Azərbaycan sürətli iqtisadi islahatlar başladan ölkələrdən biridir. Bilirsiniz ki, 2016-cı ilin sonunda dövlət başçımız tərəfindən Azərbaycanın iqtisadi “yol xəritəsi” imzalanıb. 11 sahə üzrə olan bu sənədin icrasına 2017-ci ildən start verilib. Bununla əlaqədar hazırda da struktur və iqtisadi islahatlar davam etdirilir. Bütün bunları və Azərbaycanda gedən iqtisadi islahatları dünyaya çatdırmaq üçün Davod forumunun böyük əhəmiyyəti var”.

V.Əhmədov qeyd edib ki, son illər Azərbaycanın qeyri-neft sektoru və nəqliyyat sistemində də çox ciddi addımlar atılır: 

“Hazırda Milli Məclisdə də Ələt qəsəbəsində azad iqtisadi zonanın yaradılması ilə əlaqədar məsələyə baxılır. Azərbaycanda belə bir iqtisadi zonanın yaradılması Azərbaycanı Asiya ilə Avropanı birləşdirən beynəlxalq nəqliyyat qovşağına çevirir. Azərbaycanda digər bu cür böyük layihələr də həyata keçirilir. Artıq Azərbaycan öz neft və qazını Avropaya ixrac edir. Bütün bu layihələrin hər biri dünyada Azərbaycana olan marağı daha da artırır. Bütün bunlara görə də mən hesab edirəm ki, Azərbaycan Prezidentinin Davosda bu dəfəki çıxışı da dünyada maraqla qarşılanacaq və dinləniləcək. Ona görə də müyyən hökumət və dövlət başçıları, beynəlxalq və xarici şirkətlər Davosda Azərbaycan prezidenti ilə görüşərək, danışıqlar aparacaq və bir sıra razılıqlar əldə olunacaq. Yəqin ki, Azərbaycana əlavə investisiya vəsaitlərinin qoyulması planları da olacaq. Bütün bunlar isə Azərbaycanın gələcəyi üçün vacibdir”.

Vasif Həsənli
Ölkə.Az

ŞƏRH YAZ
0
BAĞLA