Nazir müavini: “Azərbaycanda 6700-ə yaxın yeni iş yeri yaradılacaq”
"Ölkə.Az" xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin iclasında “2016-cı il üçün dövlət büdcəsinin icrası haqqında” qanun layihəsi və dövlət büdcəsinin icrasına dair illik hesabatın müzakirəsi zamanı iqtisadiyyat nazirinin müavini Sevinc Həsənova bildirib.
Nazir müavini deyib ki, atılan bu cür addımlar nəticəsində Azərbaycanda 6700-ə yaxın yeni iş yeri yaradılacaq:
“Təqdim edilmiş layihələrin 45 faizi kənd təsərrüfatı, 55 faizi isə sənaye sahələrində olmaqla onların 40 faizi Bakı ətrafı qəsəbələri və Abşeron rayonunda, 60 faizi isə regionların payına düşür ki, bu da regional inkişafa öz təsirini göstərəcək”.
S.Həsənova vurğulayıb ki, Azərbaycanda sahibkarlıq sahəsində yoxlamaların sayı 1000 dəfə azaldılıb:
“Hesab edirəm ki, yoxlamaların azalması onların sərbəst fəaliyyətinə şərait yaradıb”.
Nazir müavini qeyd edib ki, büdcə konsolidasiya tədbirlərinin və sərt pulsiyasətinin həyata keçirildiyi bir şəraitdə iqtisadi fəallığəın və məşğulluğun təmin edilməsi məqsədi ilə ölkə iqtisadiyyatına yerli və xarici maliyyə resurslarının cəlb edilməsi və tədiyyə balansının tarazlığının təmin edilməsi üçün dövlətin təşviq mexaznimlərinin tətbiqinin əhəmiyyəti daha da artıb:
“Bununla əlaqədar ötən ildən tətbiq olunan investisiya təşviqi mexanizminin özəl investisiyanın artımına ciddi töhfə verib”.
Vasif Həsənli
Ölkə.Az
