Nazirin qardaşı ilə bağlı məhkəmədə mübahisə düşdü

"Ölkə.Az"ın APA-ya istinadən xəbərinə görə, hakim Şəkər Məmmədovanın sədrlik etdiyi iclasda şahid qismində zərərçəkmiş Əlikram Camalovun oğlu Əkbər Camalov ifadə verib. O deyib ki, təqsirləndirilən borcundan yalnız 3500 manat verib: "Bizə dedi ki, iş üçün maddi kömək eləyək. Biz pulu verəndən sonra onunla müqavilə bağladıq. Müqaviləyə əsasən, o, bizə 1200 manat qaytarmalı idi".

Sonra şahid Arzu Mərdanov ifadə verib. O deyib ki, təqsirləndirilən şəxslə qonşu mağazalarda işləyir: "Samir Nəbiyev Əlikram Camalovdan borca hissə-hissə pul götürmüşdü. Sonra ticarət zəiflədi. Samir də dükanı bağlamaq məcburiyyətində qaldı". 

Zərərçəkmiş şəxsin vəkili şahidə S. Nəbiyevin mağazasında təxminən neçə manatlıq mal olduğunu soruşub. Bu, təqsirləndirilən şəxsin vəkili Ceyhun Yusifovun etirazına səbəb olub. C. Yusifov deyib ki, şahid S. Nəbiyevin mağazasında hansı miqdarda material olduğunu bilməz. Bundan sonra vəkillər arasında mübahisə yaranıb. 

Hakim vəkillərə xəbərdarlıq edib. 

Proses avqustun 30-da davam etdiriləcək. 

Qeyd edək ki, prokuror S. Nəbiyevin 9 il müddətinə azadlıqdan məhrum edilməsini istəyib. Ancaq iş üzrə məhkəmə istintaqı yenilənib. İttihama görə, 2015-ci ildə S. Nəbiyev Əlikram Camalova birgə biznes qurmaq təklif edərək, ondan icarəyə götürüb işlətdiyi Nəsimi rayonu, Ceyhun Hacıbəyli küçəsində yerləşən “Brend Elektrik” elektrik avadanlıqları satışı mağazasına investisiya qoymasını istəyib. Əvəzində isə qazancın yarısını Ə. Camalova verəcəyini vəd edib. Ə. Camalov razılaşıb və Nərimanov rayonu, Ağa Nemətulla küçəsində yerləşən ofisdə S.Nəbiyevə 2015-ci il noyabrın 3-də 18 min manat, 2016-cı il fevralın 1-də isə 3993 manat verib. S. Nəbiyev isə vəsaiti mənimsəyib. Bundan sonra Ə. Camalov polisə müraciət edib. Təqsirləndirilən S.Nəbiyevə Cinayət Məcəlləsinin 178.3.2 maddəsi ilə cinayət işi açılıb və onun barəsində polisin nəzarətinə vermə qətimkan tədbiri seçilib.
 
Zərərçəkmiş Əlikram Camalov kəndli fermer təsərrüfatının təsisçisi və müdafiə sənayesi naziri Yavər Camalovun qardaşıdır.