“Neftin qiyməti kəskin düşsə, büdcəyə yenidən baxmaq zərurəti yarana bilər\"

“Ölkə.Az” xəbər verir ki, bunu sabiq maliyyə naziri Fikrət Yusifov neftin qiymətinin dünya  və Azərbaycan iqtisadiyyatına təsirlərini şərh edərkən deyib.

Onun sözlərinə görə, ABŞ ilə Çin arasında aylarla davam edən ticarət müharibəsi özünün yeni, daha gərgin olacaq növbəti mərhələsinə daxil olmağa hazırlaşır. “Dünya üzrə Ümumi Daxili Məhsulunun 40%-ə yaxınını istehsal edən bu iki nəhəng ölkə arasında gedən və getdikcə daha da dərinləşən müharibə beynəlxalq iqtisadiyyata ciddi zərbə vurmaqdadır. Bu ilin sentyabr ayından ABŞ-ın Çin məhsullarının idxalına tətbiq etməyə hazırlaşdığı yeni sanksiyalar isə dünya iqtisadiyyatına daha ciddi zərbə vura biləcək. Dünya bazarlarında neftin qiymətlərinin kritik 60 dollar səviyyəsindən aşağı düşərək, bu sətirləri yazarkən,bir barel üçün 56 dollar 30 sent ətrafında olması da dediklərimiziə əyani sübutdur”- sabiq nazir bildirib.

O əlavə edib ki, iki nəhəng arasında ticarət müharibəsinin yeni mərhələsinin bu ilin sentyabr ayından başlayacağına baxmayaraq, dünya iqtisadiyyatı inkişaf templərinin aşağı düşəcəyinin qaçılmaz olacağına indidən öz münasibətini bildirir: “Bu templər aşağı düşəcəksə, deməli iqtisadiyyatın nüvəsi olan neftə tələbat da azalacaq. Bu səbəbdən də neftin qiymətlərinin sentyabr ayına qədər davamlı azalması inandırıcı görünür. Əgər sentyabr ayına qədər OPEK neftin hasilatını azaltmaqla bağlı ekstrimal bir qərar qəbul etməyə qadir olmasa, o halda qiymətlərin 40 dollar və bundan da aşağı bir səviyyəyə düşməsi mümkündür. 

Bütün bu baş verənlər fonunda Çin yuanının dəyər itirməsi gözlənilən idi. Yuan son iki həftədə 5%-ə qədər ucuzlaşıb, bu ilin mart ayından isə Çinin milli valyutası ABŞ – Çin ticarət müharibəsi hesabına 7%-ə qədər dəyər itirib. Yuanın belə sürətlə ucuzlaşması Çin müəssisələrnin də aktivlərinin kəskin ucuzlaşmasına yol açır. İki dünya nəhəngi arasında baş verən ticarət müharibəsi digər ölkələrin də iqtisadiyyatına və maliyyə durumuna təsirsiz ötüşməyəcək. Əgər bu gün dünyada hər gün 100 milyon bareldən çox neft istehlak edilirsə, onun dəyərinin bir neçə dollar aşağı düşməsinin hansı itkilərə gətirdiyini hesablamaq bir o qədər də çətin olmaz”.

Neftin ucuzlaşmasının Azərbaycan iqtisadiyyatına təsirlərinə gəldikdə F.Yusifov deyib ki, Azərbaycanın 2019-cu il dövlət büdcəsində neftin bir bareli üçün 60 dollar müəyyən olunub: “Neftin qiymətlərinin kəskin azalacağı tədqirdə büdcəyə yenidən baxmaq zərurəti yarana bilər. Bir sözlə, neft ölkəsi kimi bizim üçün neftin qiymətlərinin aşağı düşməsi heç arzu olunan deyil. Bu qiymətlər 2014 -2015-ci illərdə kəskin azaldıqda milli valyutamız iki dəfədən çox dəyər itirdi. Bank sektorumuz və xarici valyutada kreditlər götürmüş iş adamlarımız isə bu zərbədən hələdə özlərinə gələ bilməyiblər”.

Mürtəza
Ölkə.Az