Nikki Heyli: “Rusiya, İran və Əsəd rejimi cinayətlər törədir”

"Ölkə.Az" xəbər verir ki, ABŞ-ın BMT-dəki daimi nümayəndəsi Nikki Heyli iclasda Suriyada hərbi cinayətlər törədilməsi barədə ittihamlar irəli sürüb. ABŞ rəsmisi bildirib ki, Şərqi Hələbin terrorçulardan azad edilməsi zamanı Suriya hökuməti Rusiya və İranla birgə hərbi cinayətlər törədib. Onun sözlərinə görə, Rusiya və İran qırıcıları lüzum olmadığı halda dinc əhalinin məskunlaşdığı əraziləri bombalayıb.

“Rusiya və İran Suriyada Bəşər Əsəd rejimini dəstəkləyir. Onlar rejimə qarşı olanları terrorçu adı ilə öldürüblər. Terrorçuların olmadığı ərazilərdə əməliyyatlar keçirilib. Əsəd rejiminə müxalif yerlərdə insanlara qarşı təzyiqlər edilib”, - deyə Nikki Heyli bildirib.

ABŞ rəsmisi həmçinin bildirib ki, adı çəkilən ölkələrin hərbçiləri lazımsız yerə ictimai yerləri dağıdıblar:

“Rusiya və İranla birgə Bəşər Əsəd rejimi Şərqi Hələbdəki bütün xəstəxanaları məhv edib. Ümumilikdə 250 00 min insana zərər dəyib. Bu hərbi cinayətdir. Məlumdur ki, Suriya hökumət qüvvələri müntəzəm olaraq xəstəxanalar da daxil olmaqla, mülki infrastruktura zərbələr endirib”.

Ziya Səccad
Ölkə.Az