Nikki Heyli: “Şimali Koreyanın nüvə silahından imtina edəcəyinə inanan varmı?”
“Ölkə.Az” xəbər verir ki, bu barədə ABŞ-ın BMT-dəki daimi nümayəndəsi Nikki Heyli nüvə silahının tam qadağası üzrə Konvensiyanın hazırlanmasına dair konfransdan sonra keçirilən tədbirdə bildirib. Onun sözlərinə görə, ABŞ dünyada təhlükə tam sovuşmayana qədər nüvə silahından birdəfəlik imtina etməyəcək.
“Hazırda nüvə silahından imtina etmək mümkün deyil. Təbii ki, mən ailəmin nüvə silahından azad dünyada yaşamasını istəyirəm. Lakin biz realist olmalıyıq. Bu gün Şimali Koreyanın nüvə silahından imtina edəcəyinə inanan varmı? Təbii ki, heç kim buna inanmır”, - deyə N.Heyli bildirib.
Qeyd edək ki, BMT-də nüvə silahının tam qadağası üzrə Konvensiyanın hazırlanmasına dair konfrans keçirilir. ABŞ, Böyük Britaniya və Fransa konfransda iştirak etməkdən imtina ediblər.
Ziya Səccad
Ölkə.Az
