“Nikol Paşinyan münaqişənin köklü həllinə hazır deyil”

 “Ölkə.Az” xəbər verir ki, bu fikri “Atlas” Araşdırmalar mərkəzinin rəhbəri Elxan Şahinoğlu Ermənistan xarici işlər nazirinin Azərbaycan Prezidenti İlham Əliyevlə Ermənistan baş naziri Nikol Paşinyanın növbəti görüşünün Vaşiqntonda planlaşdırılması ilə bağlı fikrini şərh edərkən deyib.

Onun sözlərinə görə, sonuncu dəfə Azərbaycan və Ermənistan liderləri 2001-ci ildə ABŞ-ın Ki-Uest şəhərciyində görüşmüşdülər:

 “Masa üzərinə sazişin mətni qoyulsa da, imzalanmadı. Çünki Azərbaycanın təhlükəsizlik maraqlarına cavab vermirdi. Bu dəfəki görüşdən də iki səbəbə görə real nəticə gözləmək çətindir.

Birinci səbəb odur ki, Ermənistanın baş naziri Nikol Paşinyan münaqişənin köklü həllinə hazır deyil, o sadəcə bu mövzuları müzakirə etməyə hazırdır. Atəşkəsi necə qoruyaq, inam atmosferini necə yaradaq, gediş-gəlişi bərpa edək?!. Əgər münaqişənin həlli istiqamətində konkret addımlar atılmırsa, o zaman  bu mövzular Azərbaycanı maraqlandırmır, maraqlandırmamalıdır da… Çünki bu detallar münaqişənin uzanmasına xidmət edir ki, bu da Ermənistanın maraqlarına uyğundur.

Vaşinqton görüşünün nəticəsiz qalmasına dəlalət edəcək ikinci səbəb Ermənistan hakimiyyətinin əvəlkitək Moskvadan asılı olmasıdır”.
 O, əlavə edib ki, ABŞ-la  Rusiya rəqibidir, demək olar ki, bütün məsələlərdə fərqli mövqelərə malikdirlər:

“Digər tərəfdən  Amerikanın Rusiyaya qarşı sanksiyaları mövcuddur. Belə şəraitdə Moskva Vaşinqtonda Azərbaycan və Ermənistan liderlərinin görüşündə uğur qazanılmasını istəməz. Görüşün Vaşinqtonda görüşü həm də o deməkdir ki, Amerika da Cənubi Qafqazda söz sahibi olduğuna eyham vurur. Kreml isə bu cür eyhamları rədd edir və ABŞ-ın Cənubi Qafqazdakı varlığına qısqanc yanaşır. Ona görə də Kreml İrəvanın əli ilə Amerikanın Dağlıq Qarabağ münaqişəsinin həllindəki mümkün fəallığına mane olmağa çalışacaq”.

Mürtəza
Ölkə.Az