Obraz, fəxri ad, vəzifə - əfsanəvi sənətkarların intriqa səbəbləri — ARAŞDIRMA

Obraz, fəxri ad, vəzifə - əfsanəvi sənətkarların intriqa səbəbləri
12:00
12.09.2017
100
Mədəniyyət
A
Sənət aləmində rəqabət, intriqa, söz-söhbət qaçılmazdır. Bu, əlli il öncə də olub, indi də var və yəqin ki, yenə də olacaq.

Bəs bu intriqaların əsl səbəbləri nədir?

"Ölkə.Az" əfsanəvi sənətkarların bir qisminin necə deyərlər, yola getməmək səbəblərini araşdırıb. 

Xalq artisti Polad Bülbüloğlu əfsanəvi opera ifaçısı Müslüm Maqomayevlə heç vaxt yola getməyib. Ancaq deyilənlərə görə Maqomayev heç də bu ədavətə tərəfdar deyilmiş. Elə Bülbüloğlunun Maqomayevin Rusiyadakı səfirliyimizin ərazisində qoyulmuş abidəsinin açılış mərasimində iştirak etməməsi, üstəlik əməkdaşlara "ora getsəniz, sabah işə gəlməyin" xəbərdarlığı vəziyyəti tam izah edir. Görünən budur ki, cənab səfir necə deyərlər, Maqomayevin ölüsünə də kin bəsləyir.

Polad Bülbüloğlunun ədavəti olan başqa bir sənətkar Məlik Dadaşov olub. Azərbaycan kinosunun əfsanəsi ilə Bülbüloğlunun münasibətləri 80-ci illərin sonlarında korlanıbmış. Deyilənlərə inansaq, Dadaşov Polad müəllimin atası Bülbüllə bağlı hansısa xoşagəlməz ifadə səsləndirib və ondan sonra münasibətlər korlanıb. Hətta iş o yerə çatıb ki, Məlik Dadaşovun vəfatından sonra P.Bülbüloğlu bu ədavəti onun oğlu, xalq artisti Rafael Dadaşovla aparırmış. 

Məncə, indi təqdim edəcəyim bir fakt hər şeyi deyir. Rafael Dadaşov 1987-ci ildə - 41 yaşında əməkdar artist fəxri adına layiq görülüb. 1988-ci ildə isə Bülbüloğlu mədəniyyət naziri təyin edilib və 2005-ci ildə tutduğu vəzifədən azad edilib. Məhz bu dövr ərzində Rafael Dadaşov xalq artisti fəxri adını ala bilməyib. Yalnız Polad Bülbüloğlu Rusiyaya səfir göndəriləndən sonra - 2006-ci ildə Rafael Dadaşova layiq olduğu xalq artisti fəxri adı verilib.

Hətta deyilənlərə inansaq, Rafael Dadaşov Polad Bülbüloğlundan atasıyla olan ədavəti onunla davam etdirməməyi xahiş edib. Ancaq təbii ki, bu xahişlər göründüyü kimi nəticə verməyib.

Yeri gəlmişkən, Polad Bülbüloğlunun atası Murtuza Məşədi Rza oğlu Məmmədov (Bülbül) Rəşid Behbudovla yola getməyib. Belə ki, yaşca Rəşid Behbudovdan böyük olan Bülbül gənc həmkarının qəfil parlamasını və ard-arda böyük uğurlar qazanmasını qəbul edə bilmirmiş. 

Azərbaycanın iki görkəmli teatr və kino xadimi - Ədil İsgəndərov və Ələsgər Ələkbərov arasında da uzun illər intriqa olub. Belə ki, İsgəndərov 1959-cu ildə Moskvada keçirilən dekadaya aparılacaq heyətə Ələkbərovun adını daxil etməyib. Bu isə o demək idi ki, Ə.Ələkbərov SSRİ xalq artisti olmaq üçün hələ bir müddət də gözləyəcəkdi. İsgəndərovun qərarıyla dekadaya İsmayıl Dağıstanlı aparılır və həmin il də SSRİ xalq artisti fəxri adına layiq görülür. Ələkbərov bunun səbəbini İsgəndərovdan soruşanda cavab belə olur ki, sən daha böyük sənətkarsan, gec-tez bu adı alacaqsan, Dağıstanlıya kömək etmək lazım idi, etdim. Bundan sonra iki böyük sənətkar arasında gərginlik yaranmağa başlayır. Hətta tərəflər (xüsusən də Ələkbərov) bir-birinə nalayiq sözlər işlətməkdən də çəkinmirmişlər. 

Növbəti dəfə Moskva qastroluna "Otello" tamaşası aparılmalıymış. İsgəndərov Ələkbərovdan xəbərsiz Otello obrazını ona verir. İsmayıl Dağıstanlı, Ağasadıq Gəraybəyli, Ağadadaş Qurbanov elanlar lövhəsində Ələsgər Ələkbərovun adını görən kimi İsgəndərovun kabinetinə gedib baş verənləri danışırlar. Sən demə, bir neçə dəqiqə əvvəl Ələkbərov teatrın qarşısında İsgəndərovu söyürmüş. İsgəndərov ona xəbər gətirən aktyorlara deyir ki, Ələkbərov yaxşı adam olmaya bilər, ancaq çox böyük aktyordur və Otellonu ondan başqa kimsə oynaya bilməz. Bu arada bir maraqlı faktı qeyd etmək yerinə düşər. Moskvadakı tamaşaya SSRİ xalq artisti Sergey Bondarçuk da baxır və Ələkbərovun oyununa reaksiyası belə olur: "Başa düşmürəm, belə böyük aktyorun qarşısında niyə məni Otello roluna çəkiblər? O, sadəcə möhtəşəmdir". 

Məhz "Otello" tamaşasından sonra Ələsgər Ələkbərov da SSRİ xalq artisti fəxri adına layiq görülür. Ancaq bu iki sənətkar ömürlərinin sonuna qədər demək olar ki, küsülü qalırlar. 

Ədil İsgəndərovun küsülü olduğu başqa bir sənətkar Yusif Vəliyevdir. Əslində, İsgəndərovla Vəliyevin arası kinostudiyanın bir işçisinə görə dəymişdi. Vəliyev kinostudiyanın işçilərindən biriylə dalaşır və onu döyür. Bunu eşidən İsgəndərov bərk əsəbləşir və Vəliyevi kinostudiyanın həyətinə buraxmamaqla bağlı göstəriş verir. Ancaq  "Axırıncı aşırım" filminin çəkilişləri tamamlandıqdan sonra səsləndirmə prosesində deyir ki, mənim səsimi Yusif Vəliyev yazsın, gözəl səsdir. 

Teymurləng obrazına da Ədil İsgəndərov çəkilməliymiş. Ancaq rejissor Həsən Seyidbəylinin təklifin İsgəndərovun cavabı belə olur: "Yusif Vəliyev kimi böyük sənətkar ola-ola, mənim həmin obraza çəkilməyim doğru deyil. O bu rolu məndən yaxşı oynayar".

İki əfsanəvi aktrisa-Hökumə Qurbanova və Leyla Bədirbəylinin münasibətləri isə Dezdomona obrazına görə pozulubmuş.

Belə ki, "Azdrama"nın repertuarının səksən faizini daşıyan Qurbanova bu rolun Leyla Bədirbəyliyə verilməsinə etiraz edir və aktrisalar küsülü qalırlar. Ancaq sonrada Qurbanova da bu obrazı canlandırır və deyilənə görə, bunu Bədirbəylidən daha uğurlu edir. 

Siyavuş Aslanla Hacıbaba Bağırovun münasibətləri isə vəzifə üstündə pozulmuşdu. Siyavuş Aslan "Muzkomediya"nın direktoru olmaq istəyirmiş. Amma son anda Hacıbaba Bağırovun direktor təyin edilməsi barədə qərar qəbul edilir. Qərara etiraz edən S.Aslan "Muskomediya"nı "Azdrama"ya dəyişir.

İntiqam VALEHOĞLU
Ölkə.Az

ŞƏRH YAZ
0

Ən yaxşı ssenari yazanlar bəlli oldu — Siyahı

Ən yaxşı ssenari yazanlar bəlli oldu
16:55
16.11.2017
207
Mədəniyyət
A
Azərbaycan Respublikası Kinematoqrafçılar İttifaqında növbəti iclas keçirilib.

İttifaqın mətbuat xidmətinin rəhbəri Əli Vəliyev "Ölkə.Az"a bildirib ki, "Zaman və Məkan" adlı qısametrajlı sənədli filmlərin ssenari müsabiqəsinin qaliblərinin müəyyən edilməsi ilə bağlı keçirilən iclasda, İttifaqın sədri professor Şəfiqə Məmmədova, qrumun birinci katibi əməkdar incəsənət xadimi Cəmil Quliyev, kinorejissor xalq artisti Oqtay Mirqasım, kinorejissor əməkdar incəsənət xadimi Rafael Qəmbərov, əməkdar incəsənət xadimi Yavər Rzayev iştirak ediblər.

İclasda iştirak edən Münsiflər heyətinin (Kinorejissor, xalq artisti Oqtay Mirqasım, kinorejissor, əməkdar incəsənət xadimi Rafael Qəmbərov, əməkdar incəsənət xadimi Yavər Rzayev) qərarı ilə ssenari müsabiqəsinin qalibləri aşağıdakı kimi qiymətləndirilib.

1-ci yer 1500 manat pul mükafatı (Heç bir ssenari qalib olmayıb)

2-ci yer 1000 manat pul mükafatı, 24 balla “Şükriyyə taleyim” ssenarisi 

3-cü yer 500 manat pul mükafatı, 23 balla “Bakının su əfsanəsi” ssenarisi

Həvəsləndirici “Ümid” mükafatı 500 manat pul, 20 balla “Qara Qızıl” ssenarisidir.

Qeyd edək ki, “Şükriyyə taleyim” ssenarisinin müəllifi Cavid Zeynallı, “Bakının su əfsanəsi” ssenarisi Rəşad Şükürovun, “Qara Qızıl” ssenarisinin müəllifi isə Seyram Əmirovdur.

ŞƏRH YAZ
0

İTV-dən — SƏRT ETİRAZ

İTV-dən
09:26
15.11.2017
351
Mədəniyyət
A
İctimai Televiziya və Radio Yayımları Şirkəti Avropa Yayım Birliyinin Baş direktoru Noel Kerrana məktub ünvanlayıb.

"Ölkə.Az"ın məlumatına görə, məktubda qeyd edilib ki, Ermənistan təmsilçisi Mişa Qriqoryanın Gürcüstanda keçiriləcək “Uşaq Avrovizya-2017” mahnı müsabiqəsində siyasi təxribata yol verəcəyi haqqında əldə olunan məlumatlar torpaqlarının 20 faizi Ermənistanın işğalı altında olan Azərbaycanda böyük narahatlıq doğurub.

“İctimai Televiziya və Radio Yayımları Şirkəti bəyan edir ki, Mişa Qriqoryanın Xankəndi əsilli olmasını bəhanə edərək, qondarma “DQR”-ə məxsus bayrağı nümayiş etdirməsi və “Artsaxın səsi” adı altında musiqi qrupunun üzvü olduğunu vurğulaması yolverilməzdir.

İnanmaq istərdik ki, siyasi oyunlardan uzaq olduğunu dəfələrlə və israrla bəyan edən Avropa Yayım Birliyi bu həssas məsələdə Azərbaycanın mövqeyini anlayışla qarşılayacaq, siyasi təxribatın qarşısını qətiyyətlə alacaq, bütün Avropanın nəzərlərinin dikildiyi səhnədə uşaqların separatizmin qurbanına və siyasi oyunbazların alətinə çevrilməsinə imkan verməyəcək.

Hesab edirik ki, “Uşaq Avrovizya-2017” mahnı müsabiqəsi musiqi meydanıdır və bu möhtəşəm tədbir bütün dünyadakı uşaqlara sevinc gətirməli, xoş anlar bəxş etməlidir”.

ŞƏRH YAZ
0
BAĞLA