"Oğurluqla məşğul olan bələdiyyə sədri tutulmalıdır"

"Əgər bələdiyyələr və bələdiyyə sədrləri oğurluqla məşğul olursa, o zaman onlar tutulmalıdır. Burada heç bir güzəştdən söhbət gedə bilməz!".

"Ölkə.Az" xəbər verir ki, bu fikirləri Milli Məclisin Regional məsələlər komitəsinin bu gün keçirilən iclasında çıxışı zamanı millət vəkili Fəzail İbrahimli bildirib.

Deputat deyib ki, bələdiyyə sədrlərinin nüfuzu aşağıdır:

"Boynubükük, qulağısallaq bələdiyyə sədrinə kim hörmət qoyacaq? Onu Bələdiyyələrlə İş Mərkəzi də çək-çevirə salacaq, icra başçısı da əzəcək. Diri, özünəinamı olan, işini düzgün quran bələdiyyələrə, bələdiyyə sədrlərinə heç kim heç nə edə bilmir və edə bilməz. Mən bələdiyyələrə, bələdiyyə üzlərinə, bələdiyyə sədrlərinə qürur, şux qamət arzu edirəm. Nəfslərinə deyil, ağıllarına önəm versinlər. Bilirsiniz, Sovet İttifaqı Komunist Partiyası Mərkəzi Komitəsinə Stalin də rəhbərlik etdi, Çernenko da. Bələdiyyə sədrləri özlərini Çernenko kimi aparanda, təbii ki, vəziyyət gəlib bu yerə çıxacaq. Ona görə bələdiyyə sədrləri özlərinə hörmət qoymağı bacarmalıdırlar. Özünə hörmət qoymayan insana da heç kim hörmət qoymayacaq”.

Vasif Həsənli
Ölkə.Az