Ölkəmizdə ipoteka kreditləri kimlərə verilib?
"Ölkə.Az" Report-a istinadən xəbər verir ki, bu barədə Azərbaycan İpoteka Fondunun məlumatında bildirilib.
Hesabata əsasən, aylıq gəliri 750-1000 manat olanlar cəmi borclanların 24,1%-i, 500-750 manat aylıq gəliri olanlar borcalanların 19,7%-i əhatə edir. Aylıq gəliri 500 manatadək olanlar isə cəmi borclanların 4,2%-i təşkil edir.
Cari il aprelin 1-nə əsasən, AİF xətti ilə ipoteka alanların 68%-i evli, 32%-i subay, 83%-i kişi və 17%-i qadınlardır. Hesabata əsasən, ipoteka predmeti cəmi 8,6% halda fərdi mənzil, qalan hallarda isə çoxmənzilli binada fərdi mənzil olub.
“Azərbaycan İpoteka Fondu” ASC (AİF) xətti ilə cari il aprelin 1-nə qədər 18 min 758 ipoteka krediti verilib. Bu kreditlərin ümumi məbləği 778 milyon 956 min 830 manat olub.
AİF portfelində ipoteka predmetinin dəyər bölgüsünə əsasən, daha çox dəyəri 30-60 min manat olan mənzillər (50,2%) üstünlük təşkil edib. Portfeldə ən az xüsusi çəkisi olan ipoteka predmeti isə dəyəri 120 min manatdan artıq olanlardır (2,4%). Dəyəri 30 min manatdan az olanlar cəmi portfelin 2,6%-i tutub.
Qeyd edək ki, 2017-ci ilin yanvar-mart aylarında ölkə iqtisadiyyatında muzdla çalışan işçilərin orta aylıq nominal əmək haqqı 514,3 manat təşkil edib. İqtisadiyyatın mədənçıxarma sənayesi, maliyyə və sığorta fəaliyyəti, informasiya və rabitə, tikinti, eləcə də peşə, elmi və texniki fəaliyyət sahələrində orta aylıq nominal əmək haqqı daha yüksək olub.
Xatırladaq ki, AİF 2005-ci ildən fəaliyyət göstərən Azərbaycan Mərkəzi Bankı yanında İpoteka Fondunun bazasında ötən il avqustun 18-də yaradılıb. Onun nizamnamə kapitalı 307 mln. 239 min manatdır.
