OPEC+ əməkdaşlığı nəticəsində qlobal bazarda pozitiv dinamika hiss olunur

“Ölkə.Az" xəbər verir ki, bunu Azərbaycan energetika naziri Pərviz Şahbazov Bakıda OPEC və qeyri-OPEC ölkələri Nazirlərin Birgə Monitorinq Komitəsinin (JMMC) 13-cü iclasının açılışında bildirib.

"Bu tədbir Azərbaycan Prezidenti İlham Əliyevin OPEC və qeyri-OPEC ölkələrinin tədbirlərinin Bakıda keçirilməsi təklifi ilə baş tutur. Hələ 2016-cı ilin yanvarında Azərbaycan Prezidenti qiymət sabitliyinə nail olmaq üçün Davos Forumunda belə bir əməkdaşlıq təşəbbüsünü irəli sürərək bildirib ki, OPEC üzvləri və OPEC üzvü olmayan böyük istehsalçılar arasında istehsalın azaldılması istiqamətində daha yaxşı koordinasiya olsa, nəticə əldə edilə bilər", - P.Şahbazov deyib.

O qeyd edib ki, bu iclasın keçirilməsi həm də sənaye üsulu ilə ilk neft hasilatçısı kimi Azərbaycanın tarixi rolunu təsdiqləyir.

"Azərbaycan qlobal bazara böyük həcmdə neft ixrac etmir, amma regionun enerji təhlükəsizliyinin təminatında böyük rol oynayır", - nazir əlavə edib.

Nazir OPEC+ əməkdaşlığının müsbət nəticələrinin olduğunu əlavə edib: "Hazırda neft bazarında müsbət dinamika müşahidə olunur. Bu bizim ümumi nailiyyyətimizdir və işləri davam etdirməliyik".

O qeyd edib ki, OPEC+ əməkdaşlığı nəticəsində qlobal bazarda pozitiv dinamika hiss olunur.

Ölkə.Az