Özündən 8 yaş kiçik xanəndəyə ərə getdiyi deyilən sənətçi

Sənətçi "Ölkə.Az"ın əməkdaşıyla söhbətində bildirib ki, yazılanlar həqiqəti əks etdirmir:

"Yazırlar ki, xanəndə Seyran Əliyevin ailəsini dağıdıb onunla ailə qurmuşam. Tamamilə yanlış fikirlərdir. Hətta bu yazılara görə həmin saytları məhkəməyə də verə bilərəm. Seyran Əliyev bu ilin yanvar ayının 8-də tanımışam, ünsiyyətimiz yaranıb. Ancaq evli deyilik. Amma bu barədə düşünürük. Çünki Seyran hələ həyat yoldaşından boşanmayıb. Bu, həm də qanunlarımıza ziddir. Bir kişi iki qadınla rəsmi nikahda ola bilməz. Digər tərəfdən həm onun, həm mənim ağsaqqallarımız var. Bir-birimizi tanıyaq, xarakterlərimiz, fikirlərimiz qane edərsə, ailə qurağacıq. Məgər ailə qursam burada qəbahətli nəsə var? Yazırlar ki, Seyran Afətdən kiçikdir. Bəli, doğrudur. Əgər maraqlıdırsa, neçə yaş kiçik olduğunu da açıqlaya bilərəm. Səkkiz yaş fərqimiz var. Sənətçi olmayan o qədər insanlar var ki, 10-15 yaş kiçik insanla ailə qururlar. Amma biz ailə qurmamışıq. Haqqımda "yuvayıxan" ifadəsini işlədən, xoşagəlməz sözlər yazanların cavabını sosial şəbəkədə necə lazımdırsa vermişəm, əcəb eləmişəm. Çünki bilmədiklərini iddia ediblər. Bir evdə yaşadığımızı deyənlər, yazanlar bizimlə o evdə neçə gün yaşayıblar ki, xəbərləri də var? Bir daha deyirəm, ailə qurmaq qəbahət deyil. Əgər belə bir şey olsa, mətbuat da biləcək, tamaşaçılar da. Hər gün bir yerdə olmağımız haqda yazılanlar isə doğrudur. Bəli, hər gün məclislərdə oluruq, birlikdə məşqlər edirik. Bəs məşqi harda edək? Kafedə, yoxsa restoranda?".

A.Fərmanqızı gəlin libasındakı fotoya da aydınlıq gətirib: "O fotolar bizim klipimizdəndir. Gərək bunu da araşdırıb, sonra yazaydılar". 

Qeyd edək ki, bu gün bəzi saytlarda Afət Fərmanqızının xanəndə Seyran Əliyevlə ailə qurması barədə xəbərlər yayılıb.

İntiqam VALEHOĞLU 
Ölkə.Az