Palıd ağaclarını məhv edən meşəbəyi və digər şəxslər barədə nazirlikdən
Qusar rayonunda Əniğ meşəsindən 50-yə yaxın palıd ağacını qanunsuz kəsərək məhv etməkdə şübhəli bilinən şəxslər saxlanılıb
"Ölkə.Az"-ın əldə etdiyi məlumata görə saxlanılanlar arasında Qusar Rayon Meşə Mühafizə və Bərpa Müəssisənin meşə gözətçisi (meşəbəyi) də var.
Baş verən hadisə ilə bağlı Ekologiya və Təbii Sərvətlər Nazirliyi mətbuat xidmətinin rəhbəri İradə İbrahimova "Ölkə.Az"-a açıqlamasında bildirdi ki, məlumat daxil olan kimi hadisə yerinə dərhal nazirliyin əməkdaşları göndərilib:
"Bu hadisə bizim üçün çox fövqəladə hadisədir. Araşdırmalar aparılırır, araşdırmanın nəticələrinə görə ən ciddi və sərt cəza tədbirləri görüləcək".
Baş verən hadisəni araşdırmaq üçün Qusar rayonuna ezam olunan nazirliyin Meşələrin İnkişafı Departamentinin sektor müdiri Sadiq Salmanov "Ölkə.Az"-a açıqlamasında qeyd etdi ki, nazirliyə məlumat daxil olan kimi dərhal hadisə yerinə araşdırma qrupu göndərib:
"Hazırda burada araşdırma aparılır. Araşdırmanın nəticəsi olaraq və qəti tədbirlər görüləcək", - deyə nazirlik rəsmisi qeyd edib.
Sadiq Salmanov bildirib ki, kəsilən ağacları və hadisənin kimlər tərəfindən törədildiyi hələlik barədə dəqiq məlumat əldə etməyiblər. Bu barədə araşdırma başa çatdıqdan sonra daha dəqiq məlumat verəcəklər.
Meşəbəyinin polis əməkdaşları tərəfindən saxlanılması məsələsinə də münasibət bildirən sektor müdiri heç bir meşəbəyi saxlanılmadığını qeyd edib. O, araşdırmalar yekunlaşdıqdan sonra günahkarlar məlum olacağını vurğulayıb.
Qeyd edək ki, Əniğ meşəsində qanunsuz ağac kəsməyə icazə verən "Ölkə.Az"-ın yaydığı məlumata görə, Qusar Rayon Polis Şöbəsinin Şahdağ Polis Bölməsinin əməkdaşları tərəfindən keçirilən əməliyyat tədbirləri nəticəsində yaşıllıqları məhv edərək ziyan vuran Qusar rayon sakinləri Rövşən Xudaverdiyev və Qurban Ərzimanov tutulublar. Eyni zamanda saxlanılan şəxslərin ətraflarında həyata keçirilən istintaq-əməliyyat tədbirləri zamanı saxlanılan şəxslərə Əniğ meşəsində qanunsuz ağac kəsməyə icazə verən dəstənin digər üzvü - Qusar Rayon Meşə Mühafizə və Bərpa Müəssisənin meşə gözətçisi (meşəbəyi) Cabir Zərbəliyev də polislər tərəfindən şübhəli şəxs qismində saxlanılıb.
Səxavət Məmməd
Ölkə.Az