\"Paşinyan özü də fərqində olmadan Azərbaycana xidmət göstərir\"

“Ölkə.Az” xəbər verir ki, bunu millət vəkili Sahib Alıyev Nikol Paşinyanın avqustun 5-də Azərbayanın işğal olunmuş Xankəndi şəhərində səsləndirdiyi bəyanatla bağlı mövqeyini açıqlayarkən deyib.

“Hayların təbirincə desək, Sut Nikol (yəni- yalançı Nikol) dünən Xankəndində yenə ağzı köpüklənə-köpüklənə Ermənistanın böyük perspektivindən dəm vururdu. Guya 30 ilə onların ordusu dünyadakı 20 ən güclü ordudan biri olacaqmış. ÜMD-ni 15 dəfə, Ermənistanda yaşayanların sayını 2,5 dəfə artıracaqlarmış. 

Bunu özü də o adam deyir ki, cəmisi iki gün ondan qabaq dövlətinin iflic vəziyyətində olduğunu bildirirdi. Əlbəttə, hazırda depopulyasiya ilə üzləşən əhalisi və Ümumi Daxili Məhsulu Azərbaycanınkından təqribən 4 dəfə az olan, “Global Firepower”-in 2019-cu il üçün tərtib etdiyi reytinq cədvəlində ordusu bizimkindən 44 pillə geridə qalan, bütün regional və qlobal layihələrdən təcrid edilən, sərhədlərini özü qoruya bilməyən bir ölkənin 30 ilə regionun ən qüdrətli dövlətinə çeviriləcəyi elə “Böyük Ermənistan” xülyasının reallaşması kimi bir şeydir. Və müstəqillik əldə edəndən üzü bəri Ermənistanın keçdiyi yol, üzləşdiyi problemlər göstərir ki, rəsmi İrəvan regionda yeridilən işğalçılıq siyasətində alətçilikdən əl çəkməsə, haylar Paşinyana sadəcə, Sut Nikol deməyəcək, Köçəryan-Sərkisyan cütlüyü kimi onu da lənətləyəcəklər. 

O ki qaldı Sut Nikolun pan-hay oyununda səsləndirdiyi “Qarabağ Ermənistandır” fikirlərinə, bu, bir daha onun populist olduğu qədər də məsuliyyətsizliyindən xəbər verir”-S.Alıyev bildirib.

Deputat əlavə edib ki, Paşinyan  bununla özü də fərqində olmadan torpaqlarımızın geri qaytarılmasının tezləşdirilməsi üçün bir növ Azərbaycana xidmət göstərir: “Çünki belədə biz həmsədr dövlətlərdən soruşa bilərik və soruşuruq: əgər Ermənistanın başında duran adam Qarabağı ölkəsinin bir parçası sayırsa, onunla hansı danışıqlar, nəyin danışıqları aparılmalıdır və məsələ təkid etdikləri kimi necə ancaq sülh yoluyla həllini tapmalıdır? Bir daha vurğulayırıq, Paşinyan bu sərsəmləmələriylə əslində, bizə qarşı çıxış etmir, havadarlarına riyaraklıq və məkr üçün manevr imkanı buraxmır”. 
“Qarabağın Ermənistan olması”na gəldikdə millət vəkilinin fikrincə, paşinyanlar yaxşı düşünsələr görərlər ki, həm tarixi, həm də bugünkü reallıqlar baxımından Ermənistanın Azərbaycanın bir hissəsi olmaq perspektivi daha böyükdür.

Mürtəza
Ölkə.Az