“Paşinyanın məntiqsiz bəyanatları daxili auditoriyaya hesablanıb”

Bunu “Ölkə.Az”a açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.
Onun sözlərinə görə, Dağlıq Qarabağ həm tarixi, həm də hüquqi baxımdan Azərbaycanın ayrılmaz tərkib hissəsidir və münaqişənin digər həlli variant yoxdur.

Tərəflər arasında atəşkəs sazişinin imzalanmasından artıq 25 il ötməsinə baxmayaraq hələ də münaqişənin həllində müsbət nəticənin əldə olunmamasına gəldikdə S.Fətəliyeva deyib ki, münaqişənin indiyədək  həll olunmamasında  məsuliyyət Ermənistanın üzərində düşür:
 “Çünki Ermənistan  bu müddət ərzində münaqişənin həlli istiqamətində hər zaman destruktiv mövqe sərgiləyib. Ermənistanda hakimiyyətə gələn Nikol Paşinyanın siyasəti Dağlıq Qarabağ münaqişəsinin  danışıqlar yolu ilə həlli istiqamətində atılan addımlarla  ziddiyyət təşkil edir. Onun bu hərəkətləri sadəcə, təəssüf doğurur. Populist vədlər verərək hakimiyyətə gələn Paşinyan mövcud reallıqları dərk etmək gücündə deyil. Bu günədək onun bu istiqamətdə həyata keçirdiyi fəaliyyətdən hiss olunur ki, o, atəşkəs rejimindən sui–istifadə edir və bununla da öz məqsədlərini həyata keçirməyə çalışır. Paşinyan sələflərinin siyasətini davam etdirən təxribatçı və hərbi avantüra xarakterli addımları, ziddiyyətli və cəfəng fikirləri ilə siyasətdən bir daha uzaq olduğunu sübuta yetirir”.

Deputat onu da əlavə edib ki, onun məntiqsiz bəyanatları daxili auditoriya üçün keçərlidir:

 “Bununla o, hakimiyyətdəki mövqeyini saxlamağa çalışır və beynəlxalq ictimaiyyəti aldatmaq mövqeyini ortaya qoyur. Reallıq isə bundan ibarətdir ki, Azərbaycanın torpaqları hələ də işğal altındadır, bir milyondan çox insan qaçqın və məcburi köçkün vəziyyətinə düşüb. BMT Təhlükəsizlik Şurasının münaqişə ilə əlaqədar qəbul etdiyi qətnamələrdə işğalçı qüvvələrin Azərbaycanın işğal olunmuş bütün ərazilərindən dərhal və qeyd-şərtsiz çıxarılması tələb olunur. Ermənistan bu sənədlərə əməl etməlidir. Azərbaycan xalqı və dövləti işğalla heç vaxt barışmayacaq. Ölkəmizin ərazi bütövlüyü müzakirə mövzusu ola bilməz və beynəlxalq hüququn normaları da Ermənistan qoşunlarının işğal edilmiş Azərbaycan torpaqlarından çıxarılmasını tələb edir. Eyni zamanda, Ermənistan rəhbərliyi anlamalıdır ki, özünün gələcəyi və inkişafının yeganə yolu yalnız və yalnız işğalçılıq siyasətinə son qoymasından, zəbt etdiyi torpaqları dərhal tərk etməsindən asılıdır”.

Mürtəza
Ölkə.Az