\"PKK və digər kürd terrorçuları Ermənistan ordusunun tərkibində təlim keçirlər\"

Bu iddianı Əsassız Erməni İddialarına qarşı Mübarizə Dərnəyinin başqanı Göksül Gülbey irəli sürüb. Onun sözlərinə görə Sevan gölü yaxınlığındakı Vardenis bölgəsində və işğal altındakı Qarabağ torpaqlarında PKK-çılar üçün 12 təlim-yerləşmə düşərgəsi fəaliyyət göstərir.

Göksül Gülbey bildirib ki, ötən ilin aprel döyüşlərindən sonra kürd terror qruplaşmalarının 400-dən çox üzvü Ermənistana, oradan da Dağlıq Qarabağa keçib. Dərnək başqanı bununla bağlı əlində video görüntülərin olduğunu da qeyd edib.

Məsələ ilə bağlı politoloq İlqar Vəlizadə "Ölkə.Az"-a açıqlama verib:

"Birinci növbədə Ermənistan hakimiyyəti marağında deyil ki, bu qrupun Ermənistan və Dağlıq Qarabağdakı izi aşkar olunsun. Çünki bu hal Ermənistanı kifayət qədər böyük risklə üzləşdirə bilər. Ona görə də, düşünmürəm ki, terrorçu qruplar Ermənistan və Dağlıq Qarabağ ərazisində mütəşəkkil şəkildə fəaliyyət göstərirlər. Həmin terrorçu qruplar çox güman ki, o ərazilərdə var, ancaq başqa formada fəaliyyət göstərirlər".

PKK ilə Ermənistanın münasibətinə gəldikdə isə politoloq qeyd etdi ki, PKK ilə Ermənistanın arasında çox sıx əlaqələr var:

"Bu əlaqələr illərdir ki, davam edir. PKK və digər terrorçu qruplar Ermənistan ordusunun bazalarında, hərbi birləşmələrinin tərkibində təlim keçirlər. Beləliklə, erməniləri günahlandırmaq da olmaz, çünki cavabları o olacaq ki, bunlar bizim əsgərlərdir.

PKK ilə Ermənistan arasında əməkdaşlıq o cümlədən bir-birinə kəşfiyyat xarakterli materialların ötürülmüsəndə də mövcuddur. PKK terrorçuları çox güman ki, Ermənistana keçərkən hazırki vəziyyətlə bağlı operativ informasiyalar da ötürürlər. Bu informasiyalardan isə təkcə Ermənistan bəhrələnmir.

PKK ilə Ermənistan arasındakı münasibəti aşkara çıxarmaq çətindir. Çünki məxfi şəkildə iş aparılır və uzun illərdir davam edir. Ermənilər  PKK və digər terrorçu qruplara təlim keçirlər. Sadəcə olaraq bunu sübut etmək çətindir".

PKK ilə Ermənistanın münasibətinə qarşı Azərbaycan və Türkiyənin atacağı addımlara gəldikdə isə İlqar Vəlizadə qeyd etdi ki, öncə bu qrupları aşkar etmək lazımdır:

"Bu münasibətlər tam ortaya çıxmayınca Türkiyə və Azərbaycan tərəfinin əməliyyat keçirməsi mümkünsüzdür. Hal-hazırda hansısa anti-terror əməliyyatlarının aparılmasını da iddia edə bilmərik".

Səxavət Məmməd
Ölkə.Az